«ЫРАХХЫ ААЛДА» - ОЙЫН
23.03.2022
Хабарлар
Чапсых проект. Н.Ф.Катановтың адынаң национальнай гимназияның 9-ӌы класстағы ӱгренӌізі Алина Бурнакова піліс сыныхтаӌаң наа ойын сағын таап алған
Пала кинде хығырарға хынминчатса, ниме идерге? Ана пу сурығ полған на іҷе-пабаның сығыс килче, неке. «Ойын пастыра кӧӧктірерге!» - нандырығ пирер оларға Алина Бурнакова. Национальнай гимназияның 9-ҷы класстағы ӱгренҷізі стол кистінде ойнаҷаң наа ойын сағын таап алған нооза. Пастап олаңай ла «чӧрҷең» ойын тіп пілдірче, че толдырар тоғыстары андағ ла оой нимес! Олар саблығ писатель Николай Георгиевич Доможаковтың чуртас чолына паза чайаачызына чарыдылча.
Ойын оңдайларының ӧӧні писательнің чуртас чолының танығларын, аның саблығ «Ыраххы аалда» романын паза хакас литературазы программазынзар кирілген пасха произведениелерін пілері полча.
Ойынны фишканы «старт» клетказар турғызып пастирға кирек. Ойнапчатханнар, теестезіп, кӧріл парған «чолҷа» парчалар. Нинҷе «хаалағ» идері алты сарилығ кубик хайди тӱс парарынаң палғалыстығ. Аның полған на саринда санны таныхтапчатхан точкалар пар - 1-дең 6-аа теере. Ол точкаларның саны сурығның саны полча. Сурығлар, тізең, аймах ӧңніг карточкаларда пазыл парғаннар. Оларны ідӧк хабыҷахтаң сығара тартып аларға кирек.
Кӧзідімге, ноған карточкада Доможаковтың чуртас чолынаңар сурығлар, хызылда - «Ыраххы аалда» романнаңар, тигір кӧк, тізең, «хахпан» полча. Анда тиксі хакас литературазынаңар сурығ пол парарға айабас.
Пу ойынға кирек ниме-нооны автор позы тимнеен. Карточкалар хабыҷахтарын на Алинаа ууҷазы тік пирген, сурығларны тимнирге орыс тілі ӱгретчізі Екатерина Субракова полысхан.
Автор :
Эльвира САГАЛАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде