ТӰЗІМНІГ САЛТАРЛАР
23.03.2022
Хабарлар
Чыылығ. Хакас чонның Таштып аймаандағы улуғлар чӧбінің кнезі Вера Сазанакова чӧптің кізілеріне, чыылығ аалҷыларына тоғыс салтарларын искірген
Пылтыр иң пастағы чыылығлар 2, 10 апрельде ирткеннер, анда чағдапчатхан пис чылға ӧӧн кӧстеглер паза улуғлар чӧбінзер наа кізілер таллалған. Чӧптің наа кнезіне Вера Сазанакова табылған, аның орынӌызына Таштып аймааның депутаттар чӧбінің депутады Александр Миягашев турғызылған. Пу чыылығлардаң пасха, пылтыр ӱс хатап тоғасханнар.
15 апрельде 2021 чылда ирткен хакас чонның 14-ӌі съездінде Таштып аймааның делегациязы ӧткін араласхан, аймах чуртағӌыларының сурыныстарын читірген. Кӧзідімге алза, Пыдырахта Культура туразы тиксі тыхтағ тоғыстарын кирексіпче, Ибіг аалда Культура туразы чоғыл, Арбыт, Улуғ Арбыт аалларда ФАП-тар, пасталығ школалар кирек, Чыланнығда пасталығ школа хаӌанох иргілен парған. Чоллар пӱдірии, наа хакас кинделер сығарары, чииттерге полызары паза пасха даа ағырсымнығ сурығлар, ӱлгӱнің хайиина сығарылып, кӧместең пӧгілчелер.
Улуғлар чӧбінің кізілері аймахтың халых чуртазынаң, политикадаң оортах полбасха сіренчелер, «Земля таштыпская» газета хабазиинаң чуртағӌыларзар чуғынӌах ағырығдаң тоғыр вакцинация, чонны санға алары хоостыра айланыстар сыххан. Аал чӧптерінде иртірілчеткен чыылығларда, Мадыр аалда ирткен «Традиции малых народов как основа сохранения идентичности и формирования единства страны» проектте, «Тӧреен тіл - чонның худы» сӧбірелер аразында иртчеткен республика мариинда, ідӧк Пыдырахтағы школада Венедикт Григорьевич Карповха хумартхы чарды азылчатханда, ӧткін араласханнар. Часхызын Индіркі Сир аалда «Чиңіс сады» акцияӌа ағастар одыртханнар, наа чылға республиканың Ӧӧркі Чӧбінің экономика политиказынӌа, промышленностьча, пӱдірігӌе паза транспортча комитедінің кнезі Василий Шулбаевнең хада Пыдырахтағы олғаннарға тадылығ сыйыхтар паза саналар читіргеннер.
Ӱр ниместе Улуғ Сии аалда кӱресчілер аразында ирткен «Тебе, женщина, посвящается!» марығ чиңісчілеріне сыйыхтар аларына ідӧк хабас пирген Василий Иванович. Таштыпта аба скульптуразына ахча олох таап пирген, абанаң хада хакас хызыӌах, Таштып аалзар кірчетсең, «Изеннер» площадкада турарлар, ол ам даа азылғалах. Аал чӧбінің ӱлгӱзі ол площадканың проектін Вера Сазанакованаң хада чӧптезіп тимнееннер.
Чуртағӌылар айланызы хоостыра улуғлар чӧбі, чыылығ иртіріп, Таштып аймааның пазы Алексей Дьяченкозар ызых сында сарчын хыринда турғызылған кірӧсті пасха чирзер турғыс саларға айланғаннар, че ӱлгӱ пасха сағынча. Хакас Республиканың Ӧӧркі Чӧбінде пу сурығӌа тоғысчы ӧме тӧстелген, талазығлар ам даа парча. Улуғлар чӧбі Таштып аймааның пазына аннаң андар хада тоғынардаңар чӧптезіг пічиин ызыбысхан.
Тӱзімніг тоғыс аймахтың ӱгредіг управлениезінең апарылча, ол теелче ирткен Хакас чонның алыптығ нымағы чылына, Хакас тілі кӱніне, «Минің сӧбірем», «Хакас чонның алыптығ нымахтарынаң танысчабыс». Илбек Ада чааға чарыдылған «Костер памяти» мероприятиеде (Улуғ Арбытта) улуғлар чӧбі полғанох. Чуртағӌыларның сурыныстарын улуғлар чӧбі, республика синіндегі ӱлгӱзер айланып, пӧкче. Улуғ Сиидегі культура туразы алғым тыхтағ тоғызын кирексіпче, андох ветучасток пӱдірібізерге сурынчалар. Полған на аалда ағырсымнығ сурығлар табылча, хакас чоны позының кізілерінзерӧк айланча. Улуғлар чӧбі ол сидіксіністерні ӱлгее читірче.
Чыылығның пасха сурығлары иртер табығларға, халых тоғыстарға, улуғлар чӧбінің нааӌыланызына теелгеннер. Полған на араласчы позының кӧрізін читірген.
Автор :
Тарина БУТОНАЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде