ПӰДІРІГ ПАЗА ЖКХ СУРЫҒЛАРЫ ЧАРЫДЫЛДЫ
30.03.2022
Хабарлар
Кӧні эфир. Хакасия пазы Валентин Коновалов паза республиканың пӱдіріг паза ЖКХ министрі Валерий Келин кӧні эфирде чуртағҷыларның сурығларына нандырғаннар
Кӧні эфир Хакасияның пӱдіріг паза ЖКХ министрі Валерий Келиннің хысхаҷах искіриинең пасталған. Алынҷа танығлар чылығ пирҷең тус хайди ирткеннеңер иділген. Министрнің искіриинең, ол алындағы хысхыдағызынаң чахсы ирткен, саайлар хай-хай асхынах полған.
- Чоохтирға кирек, піс кӧбізі сидік город-аалның сурығларын пӧгібіскебіс, - хосхан Валентин Олегович. - Ахча таап алғабыс, ол санда федеральнай бюджеттең, кӧзідімге, ЖКХ реформазын иртірчең чыындыдаң, паза инвесторларны тартхабыс. Сидік орыннар санында халча: Асхыс, Сорығ, Тӧӧ пазы, Приисковай. Министерствоның полған на орынча тоғыс планы пар, муниципалитеттернең тоғыс апарылча, проекттер тимнелче, пӱдіріглерге ахча тілепчебіс.
Валерий Келиннің искіриинең, 2022 чылда пӱдіріг министерствозы алнында ідӧк улуғ пӧгіннер турча. Ирткен чылда прай программаларча 780 миллион салковай тузаланылған полза, пӱӱл аның сині - 2 миллиард 100 миллион салковай. Пӱдіріглер саны ирткен чылда 7 полған, пӱӱл - 21 пӱдіріг.
Мыннаң Валентин Коновалов паза Валерий Келин чуртағҷылар сурығларына нандырып пастааннар. Оларның чардығы азынада кірген, чардығы - кӧні эфир тузында.
- Квартирада чуртир оңдай чоғыл. Ізіг. Хайдар айланарға? - пастағы сурығ пирілген.
- Пастап устапчатхан компаниязар алай чуртағҷыларның пірігізінзер, диспетчер службазынзар сығдырадып айланарға кирек. Нандырығ чох полза - чурт инспекциязынзар. Сыныхтағ иртірілген соонаң нандырығлығ тоғынҷыларға сизіндіріг читірілер, - нандырған Валентин Коновалов.
- Часхы килген. Тасхар пас чӧрҷең чир чоғыл. Ибіре суғ турча. Сорығ город, Киров орамазы, 31. Устапчатхан компания хайбинча.
- Пу тураның устапчатхан компаниязы чоғыл, аннаңар чуртағчыларға, чыылығ иртіріп, наа устапчатхан компанияны таап аларға кирек. Олох чыылығда суғ турчатханын пӧкчең оңдай табарға чарир. Таныхтирға кирек, полған на чурт ээзі тураның сурығларын пілерге паза оларны пӧгерінде аралазарға кирек, - нандырған Валерий Келин.
- Кӧп квартиралығ тураны тиксі тыхтирынаңар искірігні хайда табарға чарир?
- «Хазна полызығлары» портал пастыра ГИС системада таап аларға чарир. Анда толдыра искіріг пар. Тиксі тыхтағның алынҷа пӧлии пар, хайда турада хаҷан паза хайдағ тоғыстар толдырыларынаңар піліп аларға чарир. Ідӧк тиксі тыхтағ чыындызынзар сығдырадып, кирек искірігні алып аларға чарир: 8(3902)24-32-50. Специалисттер ідӧк нандыр пирерлер. Устапчатхан компанияда тиксі тыхтағча искіріг парох, - чарыт пирген республика пазы.
- Аалда сӧп-сап тартчатхан машина чӧрче, че аннаң пірдеезі тузаланминча, тӧлег квитанциязы, тізең, килче. Чарир ба ол полызығнаң тузаланмасха?
- Чарабас. Сӧп-сапты сығарарынҷа тӧлег хайди даа тӧлелҷең полызығлар санына кірче, хаҷан субъекттің толдырығлығ ӱлгӱ органынаң паза регион операторынаң чӧптезіг иділче. Пістің республикада Хакасияның чир-чайаан ис-пайы паза экология министерствозы «Аэросити-2000» компаниянаң чӧптезіг иткен, - чарытхан Валерий Келин.
- Сірер чуртапчатхан аал алай город полызығ читірілчеткен орыннар санына кирілген полза, тӧлег ай сай алылча. Законда іди чарадыл парған. Піс алынча туралардаң сығарылған сӧп-сап ӱчӱн тӧлег алыларынаңар пастағларнаң чарасчабыс. Пӱӱнгі кӱнде ол алызығлар федеральнай законға кирілбееннер, - хосхан Валентин Коновалов.
- Тура хыринда пір ле чилеңмес. Олғаннарға ойнаӌаң орын турғызар ӱчӱн ниме идерге кирек?
- Пу сурығны ікі оңдайнаң пӧгерге чарир: пастағызын - чурт ээлерінің чыылиинда ол тоғыстарны, аның ӱчӱн тӧлег кӧр салып, пос кӱзінең толдырарға чарат саларға; ікінҷізін - «Городтағы осхас оңдайлар тӧстирі» программаа кірерге, аның ӱчӱн орындағы пос устаныс органынзар айланыс пазарға кирек. Программада аралазарына ідӧк чуртағҷыларның ахчазы киректелче. Полған на город-поселокта аның сині пасхалалча, че 30 процентті аспинча. Аннаңар оңдайлар пар, чуртағҷыларның ӧткіні ле киректелче, - нандырған республиканың пӱдіріг паза ЖКХ министрі Валерий Келин.
- Пригорсксар суғ тартарынҷа тоғыстарны толдырӌаң подрядчик табылды ба?
- Сидік сурығ. Піс ол сурығны ӱр пӧккебіс. Пӱӱнгі кӱнге подряд пірігізі табылған. Ол полар «ПРСУ» ООО. Кӧрік айы тоозылғанҷа аннаң чӧптезіг иділер. Чыл тоозылғанҷа тоғыстар толдырыларға кирек. Муниципалитет устағ-пастаа министерствонаң хада аны хайығда тударлар, - нандырған республика пазы.
- Ағбан городтың Чертыгашев орамазындағы 106 тураның чуртағҷылары чарытхы полызиинаң чиис пызырчалар. Тура хаӌан-да газнаң тузаланӌаң, амды - чарытхынаң. Тура чӧбіне чарытхаа кірчеткеннеңер пічіктер 2020 чылдох пиріл парған, че чарытхы ӱчӱн тӧлеглер олох синде халғаннар: киловатт ӱчӱн 2,26 салковай. Хаӌан чарытхаа кирерлер?
- Ағбанда газтығ тураларны чарытхаа кирерінҷе тоғыс толдырылған, аннаңар кирек хайди апарыларын пілчебіс. Сидіксіністер пар полза, министерство полызарға тимде. Піс пу киректі хайыға аларбыс, - нандырған Валерий Келин.
- Піс искебіс, Ағбанда паза Алтай аймаанда алынҷа тураларны чарытхынаң чылығ пиреріне кирерлер. Піс Абазада чуртапчабыс, ідӧк чарытхынаң чылығ пиреріне кірерге паза ниик паанаң чарытхы ӱчӱн тӧлирге сағынчабыс.
- Сынап Ағбаннаң Харатас «Арығ кии» программаа кирілгеннер. Хакас-Минсуғ ойымында хысхызын кии турчатхан сылтаанда, ыс тарабинча. Россияның чир-чайаан ис-пайы министерствозы, правительство кнезінің орынҷызы Виктория Абрамченко піске пу сурығны пӧгерге хабасханнар. Чарытхы сетьтерін нааҷылиры, алынҷа тураларда чылығ пирҷең оңдайны алыстырары паза ниик паанаң тӧлег турғызары ідӧк чарадыл парған. Че Абазада киинең андағ сидіксіністер чоғыл, аннаңар ниик паа кирілері кӧрілбинче. Олох туста республикада чарытхы ӱчӱн паалар иң тӧбіннер санында. Специалисттернің сананыстарынаң, чылығ пирерін ипти итсе, пу даа паанаң чарытхынаң чылығ пирері ниикке сых парча.
- Хакасияда хоных наа ла хонғаннарға чурт аларға хабасчаң программалар пар ба?
- Чиит сӧбірелерге чурт аларға хабасчаң программалар пар. Кӧзідімге, «Чурт» программаның «Чиит сӧбірелерге чурт алары» хоза программазы тоғынча. Кирексіністер пар: ирепчі 35 часты аспасха, чурт оңдайларын чахсыландырарға кирексирге паза ипотека аларға килістіре поларға кирек. Анда аралазар ӱчӱн орындағы ӱлгӱлерзер айланарға кирек.
- Сӧп-сап бактаң удаа чирзер тӱс парча, кем ол чирні арығлирға кирек?
- Ол тоғыс устапчатхан компанияа артылған. Сӧп-сап чығчаң орын кӧп квартиралығ тураның чиріне кірбинчетсе, аның ӱчӱн муниципальнай пӱдіс нандырча.
Чуртағҷылар ідӧк сан пирісте нандырығ пирілген сурығларны пиргеннер. Оларның санында полған Ағбан г., Чоннар ынархазы ор., 41 адресче читіре пӱдірілбеен тураның мыннаң мындархы ӱлӱзі. Тураның 3-ҷі, 4-ҷі паза 5-ҷі теестерін читіре пӱдіреріне 380 миллион салковай Орыннар тилізі чыындызынаң позыдылар. Хорадығлар пӱӱнгі кӱннің пааларынча саналған. Тӱрчедең пӱдіріге марығ чарлалар. 2023 чыл тоозылғанҷа тура тимге сығарыларға кирек. 151 кізі пос чуртына кіріп алар.
Валентин Коноваловнаң Валерий Келин чуртағҷыларның алынҷа сурығларына нандырғаннар. Кӧні эфирнің толдыра кӧзідиин Хакасия пазының ВКонтакте социальнай сетьтегі страницазында таап аларға чарир.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде