ВАГОННАР ТЫХТАП ПАСТАПЧА
08.04.2022
Хабарлар
Сомда: пастыхтар вагоннар тыхтаҷаң орында хабарҷылар сурығларына нандырчалар
Тоғыс чорығы. Хакасия пазы Валентин Коновалов, «Ағбанвагонмаш» завод тоғызынаң танызып, вагоннарны тыхтаҷаң полызығларны азарында араласхан «АҒБАНВАГОНМАШ»
АҒБАН ГОРОДТЫҢ КИЛКІМ ПРОМЫШЛЕННОСТЬ ПРЕДПРИЯТИЕЛЕРІНІҢ ПІРСІ - «АҒБАНВАГОНМАШ». ПӰӰНГІ КӰНДЕ ПРЕДПРИЯТИЕ, АЗАХХА ТУРЫП, АЛҒЫПЧА. 2017 ЧЫЛДАҢ СЫҒАРА «АҒБАНВАГОНМАШ РМ РЕЙ» КОМПАНИЯ УСТААНЫНАҢ КОНТЕЙНЕРЛЕР СЫҒАРЫЗЫ ТӦСТЕЛГЕН. АНАҢ МОДУЛЬЛЫҒ ПӰДІРІГЛЕР ЧАРДЫХТАРЫ ТИМНЕЛ СЫХХАННАР. ЧЫЛДАҢ ЧЫЛҒА ЧАХЫҒЛАР САНЫ ӦСЧЕ. АНЗЫНАҢАР ХАКАСИЯ ПАЗЫ ВАЛЕНТИН КОНОВАЛОВХА ПАЗА ПРАВИТЕЛЬСТВО ДЕЛЕГАЦИЯЗЫНА КОМПАНИЯНЫҢ УСТАПЧАТХАН ДИРЕКТОРЫ АЛЕКСАНДР ГИРИЧ ЦЕХТАР ТОҒЫЗЫНАҢ ТАНЫСТЫРҒАНЫНДА ПОЗЫ ИСКІРГЕН.
Чоохтирға кирек, республика пазы Валентин Коновалов пу предприятиеде пастағызын на полбинча, аннаңар алызығларның харахха тасталчатханын таныхтаан.
Иң пастағызын, алызығлар тоғынӌыларға истіг тоғыс оңдайларын тӧстиріне теелче. Предприятиеде тоғысха наа ла алылчатхан тоғынӌыларны ӱгретчең ӧнетін класс азылған, анда, компьютер техниказынаң пасха, ідӧк тимір хабыстырарына ӱгретчеткен VR-аппарат пар. Делегация ӱгредіг клазынзар кіргенде, ол аппаратнаң коммунальнай техникум студенті Николай Бойко тоғынчатхан. Аппарат тимір хабысханын сах андох сыныхтабысча. Чоохтирға кирек, ол студенттерні тимір хабыстырӌаң сын аппаратнаң орта тоғынарға чахсы ӱгретчеттір. Практикаа килген студенттернің 12-зі тоғысха алылтыр.
Аннаң пасха, предприятие тоғынӌыларына кип-азах чуғӌаң пӧлік азылған. Амды тоғынӌылар кірліг формаларын ибзер чуурға ал чӧрбестер. Полған на тоғынӌаа ікі форма пирілчеттір. Пуох хадылда тоғынӌыларға хазых пункты азылған. Анда оларға хан кӧдірізін, кислородты синир оңдайлар пар.
Паза пір чахсы алызығ - столовай. Чарых столовайда столлар ікі паза тӧрт кізее кӧрілген. Тоғынӌыларға ікі обед сӧлелче: 170 паза 210 салковайға турчатхан. Тимде чиисті ідӧк алынӌа аларға чарир. Че иң ӧӧні - предприятие ізіг чиис паазының 140 салковайын айландыр пирчеткені.
Предприятиенің цехтарында наа тиріглер турғызылтыр, кізі хазиина хорғыстығ тоғыстарны пос алынӌа тоғынчатхан тиріглер полызиинаң толдырчаттырлар. Кӧзідімге, контейнерлерні сырлиры, килкім тимір чардыхтарын хабыстырары паза пасхазы. Тоғынӌылар тиріг соонаң читіре хабыстырылбаан орыннарны хабыстырчалар. Предприятие, чоннар аразындағы кирексіністерге тудынып, контейнерлерні сығарча. Андағ кирексіністернің пірсі - контейнер пір дее тизік чох полары.
2021 чылда заводта тӧрт наа контейнер сығарып пастааннар, пӱӱл пис наа кӧрімніг контейнер сығарысха тимнелер. Наа контейнерлер - «Ағбанвагонмаш» завод ӧмезінің наука-істезіг паза опыт-конструктор тоғыстарының салтары.
Предприятиенің ӧӧн тоғызынаң танысхан соонаң Валентин Коноваловтың устаанынаң делегация наа полызығнаң танызарға парған. Кӧрік айының халғанӌы кӱннерінде «Ағбанвагонмаш» ТР-1 паза ТР-2 таарлағ вагоннарын тыхтап сыххан. Пу тоғыстарны толдырарға Тимір чол транспортының федеральнай агентствозынаң аттестат алылған. Андағ оңдайнаң предприятиее, вагоннарны тыхтап, анда 4506 ӧнетін таңма турғызарға чарир. Полызығларны читірер ӱчӱн ӧнетін орын тимнелген. Анда тоғынӌыларға паза устағ-пастаға тура, хоза чардыхтарны хайраллаӌаң пӧліктер паза тыхтағ иртірӌең тиріглер
турғызылған.
Пӱӱнгі кӱнде сменада читі кізі тоғынча: алтызы тыхтағ тоғыстарынаң айғасча, пірсі хоза чардыхтарны санға алча. Олар тыхтаға кірген вагонны прай саринаң істесчелер, анаң хабыстырӌаң, алыстырӌаң чардыхтарны таныхтапчалар. Полызығлар санында тегілектерні алыстырары пар. Тоғыс чорығы кӱнінде тоғынӌылар тӧрт вагонны тыхтабысхан полғаннар, ікізін тыхтапчатханнар.
Предприятие устағ-пастаа искіриинең, проектче 10 муң вагон тыхтиры паза 5 муң тегілек паразын алыстырары кӧріл парған. «Ағбанвагонмаш РМ Рейл» компания пу кӧстегӌе 2024 чылға теере толдыра кӱснең тоғынарына сығарға пӧгінче. Пу тусха тиксі 450 миллион салковай инвестиция иділерге кирек. Тоғысха 300 кізі алылары кӧрілче. Пӱӱнгі кӱнде вагоннарны тыхтирына даа, контейнер сығарызына даа тоғынӌылар киректелче, ол санда тимір хабыстырӌаңнар, слесарьлар, фрезеровщиктер, токарьлар паза газнаң кисчеткеннер. Ортымах чал ахчазы 53 муң салковайдаң 63 муң салковайға читче.
- Пӱӱнгі кӱнде Хакасияда вагоннар тыхтачаң предприятиелер Асхыста паза Саяногорскта саналча, че Ағбанда пу полызыға кирексініс парох, ағаа хоза тимір чол транспортында таарлағ вагоннары чидіспинче. Наа вагоннар ӱс чыл сайбалбин тоғынчалар, анаң оларны тӧреміл тыхтирға киректелче, - чарытхан Александр Гирич. - Іскеркі саринзар тимір чол алғыдылчатханда, таарлағ сині ідӧк ӧзерін сағыпчабыс, андада вагоннарны тыхтирынча полызығ уламох кирексіністе полар.
Республика пазы Валентин Коноваловтың таниинаң, предприятие регион экономиказын тилідеріне улуғ хозым итче. Хызылчардағы экономика форумында хол салылған чӧптезіг сылтаанда республика правительствозы предприятиее тоғынӌыларны тимнирінӌе хабасча. Мыннаң мындар пасха даа хабазығлар читірері ӱзӱрілер.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде