АРЫҒ КИИ ӰЧӰН
08.04.2022
Хабарлар
Сомда: Ағбан городтың пазы Алексей ЛЁМИН, республиканың чир-чайаан ис-пайы паза экология министрі Владимир ЛЕБЕДЕВ паза Хакасияның пазы Валентин КОНОВАЛОВ
Кӱн сурии. Хакасияның пазы Валентин Коновалов Ағбан городтағы 10-чы чурт аймаанда город ӱлгӱлерінең паза орындағы чуртағҷыларнаң тасхар чыылығ иртірген
Ӧӧн сурығ - хайди андағы олаңай пос тураларны хара тас орнына чарытхы кӱзінең чылыдары. Халғанӌы чылларда Ағбан городтың тастынзархы чирлерінде олаңай туралар саны табырах хозылча. Оларның ээлері хысхызын ӧӧнінде хара таснаң иблерін чылытчалар. Анаң чил чох кӱннерде город ӱстӱнде тигір ол пестер ызына харалып ла турча. Кии тынӌаа чох иде пуртахтал парча.
Аннаңар Хакас Республиканың правительствозы Ағбан паза Харатас городтарны «Арығ кии» федеральнай проектке кирерге пічіктер тимнеен. Ол проект хоостыра тураларны хара тас алай одың орнына чарытхы кӱзінең чылыдарға ӧнетін сынағлығ проектті чуртасха кирер сурығны ӱзӱріп пастадылар.
Аны толдырары оой ла нимес. Россияда мындағ эксперимент пастағызын на иртірілче. Тураларны хара таснаң чылыдары ниик полча. Іди пір тура ээзі чылда ортымахти 15 - 20 муң салковай хорат салчатхан полза, чарытхы кӱзінең ол аарлыға сых парар. Анаң 10-ӌы чурт аймааның пастағы хаалағларына нинӌе-де ораманың тураларын чарытхы кӱзінең чылыдарына кирерлер. Полған на тура ээзінең чӧптезіг иділер. Пу киректең тоғыр полчатхан чуртағӌыларны андағ чӧптезіг идерге кӱстебестер.
Тураларға чарытхы кӱзі чидер ӱчӱн, хоза подстанциялар турғызылар. Пуох чурт аймаанда школаның паза олған садының пӱдіриин пастиры кӧрілче.
Пӱӱл апрель паза май айларда, прай ниме санап, кирек пічіктер тимнирлер. Анаң ӧӧн тоғыстар апарылар. Чарытхаа хайдағ тариф турғызарын чарадарлар. Сынағлығ проектте араласчатхан чуртағӌыларға субсидиялар пирерлер. Сынағлығ проект пір чылӌа иртсе, анаң кӧрерлер - пу тузалығ кирек алай чох. Прай ниме чахсы полза, ікінӌі чардығына кірерлер. Пастағы чардығы хоостыра сынаға 136 тураны алып аларлар. Ікінӌі чардығында олох син.
Пу прай киректер пістің хазиибыс ӱчӱн иділче. Кии арығ полза, пістің дее хазиибыс чахсы полар. Сағам тиктең нимес городта онкология ағырығлары ӧсче тіп чоох-чаах парча. Хаӌан-полза тураларыбысты газнаң даа чылыдарбыс, неке, Европадағы чіли.
Автор :
Илья ТОПОЕВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде