ХАКАСИЯНЫҢ ЧИИТТЕРІ - УЛУҒ КӰС
08.04.2022
Хабарлар
Чииттер форумы. 4 апрельде Абазада «Чиит Хакасия» форум ирткен, ол 14 - 35 частығ оол-хыстарға кӧрілген. Аның пӧгіні - амғы туста чииттерге сағынған сағыстарын чуртасха кирерге хабас пирері
Форум араласчылары Хакасияның аймах-городтарында чыылысчалар. Абазадағылар Таштып аймаандағы ӧткіннерні постарынзар орындағы Культура туразынзар хығырып алғаннар. Хакасияның ӱгредіг паза наука министрі орынӌызының тоғызын толдырчатхан Юлия Ворошилова форум пасталчатханда чоох тутхан:
- Хакасияның чииттері - ол андағ кӱс, хайзы пістің не регионның нимес, че тиксі Россияның тилізіне хабазығ пирче. Федеральнай синде пар хынығ проект, хайда пу тустағы сурығларны пӧгер иң ӧткін сағыстар чыылча. Прайзыбыс пілчебіс, хайдағ экономика санкциялары пістің хазнаа кирілген. Сидіксіністерні тобырар ӱчӱн, чиит улус оларнаң хайди харбазарынҷа позының кӧрізін чарытча.
Форумның пис площадказында чииттер волонтер киреен, чир-чайаанны хайраллирын, чайаачылар паза бизнес сурығларын кӧдіргеннер. Ідӧк чуртасты чахсыландырар проекттерінең ӱлескеннер.
Бизнес площадказынаң идінӌіктерге хабасчаң кіннің устағӌызы Екатерина Эклер устаан. Ол чииттер алнында чоох тударға Таштыптағы идінӌек Дмитрий Калининні хығыртыр. Дмитрийге 36 час, позының чазына бизнесте пӧзік чидіглерге чидіп алған. Оол-хыстарға пос киреен хайди пастирға, нинӌе ахча ол позының ӱгредиине хорат салған, ниме андағ «себестоимость», «инвестпортфель» паза пасха даа нимелердеңер чоохтаан. Уғаа хынығ полған аны истіп аларға.
Анаң чыылған улус, ӧӧнінде школа ӱгренӌілері, постарының кӧрістерінең ӱлескен, піреезінің орында бизнесті тилідер сағыстар тӧреен. Кӧзідімге алза, турист маршрудын Абаза хыриндағы хайаларзар алғым арах тилідерге алай ба аарларнаң айғасчатхан экоферма азып аларға. Площадкаларда тоғынған соонаң чииттер, пазох улуғ залда чыылызып, сценаа сығып, постарының проекттерін арачылааннар. Форум тоғызында ідӧк Абаза городтың пазы Валентина Филимонова паза Хакасия пазы аппарадының устағӌы орынӌызы Игорь Ефремов араласханнар.
Автор :
Тарина БУТОНАЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Россияда
Тилекейде