Кӱн суриинда – паалар, имнер, ипотека программалары
08.04.2022
Хабарлар
Киҷее Хакасия правительствозында кризистең тоғыр штабтың теестегi чыылии ирткен. Кӱн суриина республикада чонға хорғыс чох поларынҷа, часхы хыра тоғыстарына тимненiсче, пааларны сыныхтаанынҷа, банк полызығларынҷа паза пасха сурығлар сығарылған. Республика пазы Валентин Коновалов iдӧк чайғызын олғаннар хазиин пиктирiнҷе кампанияны чахсы иртiрiбiзерiне хайығ айландырған.
Пастағы искiрiгнең чоох тутхан юстиция киректерiнҷе паза регион безопаснозынҷа министр Сергей Ромашов. Министерство ирткен читi кӱн аразына республиканың толдырығлығ ӱлгӱ органнарының хорғыс чох поларына тимненiзi сыныхталған. Чарадығ чох ӱлгӱ тоғызынаң тоғыр акциялар иртiрiлбеен. Че хосхар айының 3-ҷi кӱнiнде ирен Хакас муниципальнай банктың офизiнде чара чачыратчаң нимедеңер искiрген. Сыныхтағ искiрiг тайма полғанын iлезiне сығарған. Банк иреннiң картазының тоғызын туюхтабысхан ӱчӱн iди хылынтыр. Хосхар айының 6-ҷы кӱнiнде Хакасияҷа МВД-зар республикадағы прай вокзалларда чара чачырас тимнелчеткеннеңер искiрiг кiрген. Ол iдӧк тайма полған. Чоохтирға кирек, андағ искiрiглер тиксi хазнаҷа тарадылча. Право хайраллаҷаң органнар оларны хайди даа хайыға алчалар паза сыныхтапчалар. Валентин Коноваловты Z таңмалығ iкi машинаны ӱреткеннеңер искiрiглерҷе хайдағ тоғыс апарылчатханы сағыссыратхан. Сағам ол киректер сыныхталча. Республика пазы МВД тоғынҷыларын пу киректернi хайди даа читiре iстезерге сурынған.
Хакасиядағы садығ тураларында, чырғалларда чонға кирек ниме-ноо пааларын сыныхтиры узарадылча. Республиканың экономика тилiзi министрi Виктор Богушевичтiң искiриинең, халғанҷы неделяда пааларның тың алысханы таныхталбинча, паалар 2-3%-ке пасхалалча. Иң пiлдiрте ӧс парған ас-тамах санында: муксун (+8%), свекла (+7,5%), сӱт (+4%). Шоколад, рис, вермишель, пӧзiк сорт уны паазының улуғ нимес ӧзiзi таныхталча. Алтай паза Ағбан пилтiрi аймахтарының ӧӧн аалларының садығ тураларында паалар сыныхталған. Сыныхтаға полған на аалның алты садығ туразында паалар санға алылған. Салтарында пiрее ас-тамахха ортымах паа городтағызынаң даа ниик полған. Кӧзiдiмге, таңах идiне.
Экономика тилiзi паза аал хонии министерстволары садығ тураларынзар орындағы ниме-ноо сығарчатханнарның нимелерiн кирерiнҷе тоғынчалар. Пӱӱнгi кӱнде килкiм садығ тураларына чир тамаа киректелчеттiр.
Пӱдiрiг ниме-нооларына паалар iдӧк хайығда тудылча. Кiрпис паазы 20%-ке ӧскенi таныхталча. Хакасияның пӱдiрiг паза ЖКХ министрi Валерий Келиннiң таниинаң, хум паза сай паазы пiр синде турыбысхан.
Монополиядаң тоғыр федеральнай службаның (ФАС) Хакасияҷа управление пастығы Ксения Лебедева пааларны сыныхтирынҷа тоғыстар узарадылчатханнаңар искiрген, ол санда таңах паазы тың ӧсчеткенi хоостыра.
Имнер чыындызы тӧстелчеткенiнеңер искiрiг соонаң штаб араласчыларын льготалығ имнернiң Авито садығ платформазында сых килчеткенi сағыссыратхан. Олар право хайраллаҷң органнарға ол сурығҷа хатығлас парын сыныхтирға сурынғаннар. Хазых хайраллаҷаң министрi Олег Ананьевскийге, тiзең, льготалығ имнернiң пирҷең изерiстi хати кӧрерге, чӧреес ағырығларнаң ағырчатханнарға имнернi 3-6 айға пирбин турарға.
Чол пӱдiриинде тузаланылчатхан ниме-нооға паалар ӧзiзi ӱзӱрiге сығарылған. Хакасияның транспорт паза чол хонии министрi Дмитрий Василиадинiң искiриинең, иң пiлдiрте битум паазы ӧс парған. Пiр чыл мының алнында пiр тонна 22 муң салковайға турған полза, пӱӱнгi кӱнде ол 32 муң салковай турча. Кӱскӱзiн аннаңох аарлығ полтыр. Пу ачинсктегi заводтың паазы полтыр. ФАС-тың Хакасияҷа управлениезi аны хайыға алар.
Паза пiр сурығ – транспортха хоза чардыхтар паазы ӧсчеткенде, транспорт полызығларына пааларны ӧскiрерi. Сағам штаб араласчылары андағ чарадығ аларға сылтағ кӧрбинче, че сурығ iстезiлер.
Республикадағы партиялар паза халых пiрiгiстерi кризистең тоғыр кӱресчең чӧптерiн читiрген. Правительство аппардының устағҷы орынҷызы Ирина Емельянова оларны министерстволарға читiр пирген. Пазағы штабха тоғысха алылар чӧптердеңер искiрiлер.
Хакасияның финанстар министрiнiң тоғызын толдырчатхан Игорь Тугужеков банктарның полызығларынаңар искiрген. Чоохтирға кирек, Россияның ӧӧн банкы ставканы 20%-ке тиңнестiрiбiскенде, банктар кредиттерҷе паза вкладтарҷа ставкаларны iдӧк ӧскiрiбiскеннер. Анзы чонның ипотека кредидiн алар кӧңнiне ле нимес, iдӧк ал поларына теелче. Россия правительствозы алында тоғынған льготалығ кредиттернiң тоғызын тохтатхан. Тоғыста пiр ле льготалығ ипотека кредидi халған: сӧбiре ипотеказы пӱдiрiлчеткен турада чуртты аларға 6% ставкалығ пирiлче. Ол 2023 чыл тоозылғанҷа тоғынар, че пу чылға кӧрiлген хабазығ тоозыл парған. Амды правительствоның лимиттернi ӧскiрерiн сағыпчалар. Андағох кирек аалдағы ипотека программазынҷа. Пастағы чарадығҷа льготалығ ставка 12%-ке тиңнелер, ол iдӧк пӱдiрiлчеткен турада чурт аларына пирiлер. Регионнарда ипотека кредидiнiң синi – 6 миллион салковай. Льготалығ ипотека кирiлзе, пӱдiрiг турбас тiп iзенiс пар.
Кризистең тоғыр оперштабтың теестегi чыылиинаңар алғым материалны газетаның хосхар айының 13-ҷi кӱнiндегi сығарызында хығырыңар.
Автор :
Наталья Субракова
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде