XXI ЧӰС ЧЫЛНЫҢ ШАХМАДЫ
27.04.2022
Хабарлар
Киберспортчаспорт федерациязыныц устағҷызы Денис ШПИГАЛЬСКИЙ (сол саринаң) марығ араласчыларынаң хада
Спорт. Хакасиядағы саарбахтарның паза чииттернің киберспортта кӱстерін сынир оңдайы пар
АМҒЫ ТУСТАҒЫ ОЙЫННАР
Тилекейде спорт кӧрімнері илееде. Олардаң иң табырах киберспорт тиліпче тізе, саба полбас, неке. Ол компьютер ойыннарынаң тӧстелген.
Ойыннарға хынчатханнарны геймерлер тіп адапчалар. Халғанӌы танығлардаң, тилекей чуртағӌыларының 40 %-і геймер полча. Оларның ӧӧн чардығы пос туста тынанар пӧгіннең ойнапча. Профессионаллар парох. Геймингті профессияа таллап алғаннар хомай нимес ахча тоғынып алар оңдайлығлар. Итсе-де, пӧзік тее синде ойнапчатхан геймер киберспортсменге саналбинчаттыр.
КИБЕРСПОРТ ОҢДАЙЛАРЫ
Киберспорт алай пічіктер хоостыра компьютер спорты 1997 чыл-да США-да тӧстелген. Компьютер ойыннарына хынчатханнар, лигаа пірігіп, улуғ марығлар иртірерге чаратханнар. Ол син тус аразына киберспорттың оңдайлары пір ле хати алыспаан. Мында ӧӧні араласчылар, компьютернең нимес, удур-тӧдір, хыйға пылазып, марығласчалар. Аннаңар киберспортты XXI чӱс чылның шахмады тіп адапчалар. Компьютер, тізең, спорт инвентарьына саналча. Амғы туста тилекейде 80 муң артиинаң компьютер ойыны санға алылтыр, олардаң 40 ла кибер-спорт ойыны полча. Нименең олар пасхалалчалар? Иң пастап, кибер-спорт ойыны полтазы чох полча. Ікінӌізі, ол хысхаӌах тус аразына иртірілерге кирек. Ідӧк спортсменнер тӧӧй оңдайларда устарынаң сынасчалар. Марығларда ӧменең алай алынӌа аралазарға чарир.
ДИСЦИПЛИНАЛАР
Пістің хазнада киберспорт тиксі Россиядағы спорт кӧрімнерінің реестріне 2017 чылда киріл парған. Пастап 4 дисциплина - «Чааӌы марии», «Табырах сағыстығларға марығ», «Техника симуляторы», «Ойын тузында иртчеткен стратегия» - санға алылтыр. 2018 чылдаң компьютер спортының дисциплиназына «Спорт симуляторын» санап сыхханнар, 2019 чылдаң - «Компьютерӌе тудыс-хабысты» (файтинг). Полған на кӧрімзер нинӌе-нинӌе ойын кірче. Кӧзідімге, Dota 2 паза League of Legends «Чааӌы марии» дисциплинаның ойыннары полча, Mortal Kombat паза Tekken 7 - «Компьютерӌе тудыс-хабыстың». Компьютер ойыннарына хынчатханнар удаа шутерлерде устарын сынапчалар. Пу дисциплиназар CS:GO паза World of Tanks ойыннар кірче. Че пістің хазнада олар спорт ойыннарына саналбинчалар.
РОССИЯНЫҢ ЧИДІГЛЕРІ
Тилекейде киберспортча аймах марығлар иртірілче. Иң танығлығ турнирге World Cyber Games саналӌаң. Ол 2000-2013 чылларда иртірілген. Аны геймерлер Олимп ойыннарынаң тиңнестірӌеңнер. Амғы туста киберспортсменнер Dota 2 ойынӌа The International турнирде паза League of Legends ойынӌа тилекей чемпионадында аралазарға хынадырлар.
Пылтыр октябрьда Team Spirit Россияның командазы пастағызын на Dota 2 ойынӌа тилекей чемпионадында чиңіс тутхан. Ол улуғ чидіг. Алында пістің киберспортсменнер сыйыхтығ орыннарға сыхпаӌаңнар. Чиңісчілернің санында тува чонның оолғы Александр Хертек. Аның никнеймі (сола ады. - Авт.) TORONTOTOKYO. Компьютер ойыннарында прайзы сола аттарнаң тузаланча. Ол МГУ-да ӱгрентір, 30 апрельде спортсменге 25 час толар. Аннаң хада командада Магомед Халилов, Ярослав Найденов, Илья Мулярчук паза Мирослав Колпаков ойнааннар. Тренер - Айрат Газиев. Tеam Spirit ӧме 18,2 миллион доллар утып алған. Полған на араласчы холға 150 миллион салковай алтыр.
СПОРТ ФЕДЕРАЦИЯЗЫ
Хакасияда киберспорт пастағы хаалағлар итче тиирге чарир. Республикада спорт федерациязы 2018 чылдох тӧстелтір, че толдыра кӱзінең пірігіс пылтыр октябрьда тоғынып пастаан. Аннаң Денис Шпигальский устапча. Денис Олегович ХТИ-да директор орынӌызы полып істенче. Ол чоохтапча:
- Паба-іҷелер пала, киберспортнаң айғазып, компьютер ойыннарынаң «азырыл полбиныбызар» тіп чочынча. Сынында спортсменнер ойыннарға ікі хати асхынах тус хоратчалар. Олар чахсы пілчелер: кізі иртен-иир компьютер кистінде ойнапчатса, аның хазии хомайланар. Киберспортта чітіг сағыстығ, пик хуйахтығ поларға кирек. Удаа ӧме марығлары иртірілче. Оларда чиңіс тударға пӧгінчетсең, арғыстарыңнаң хада-пірге тудынарға кирексің. Піс Хакасияның физическай культура паза спорт министерствозының холында тоғынчабыс. Амғы оңдайларҷа киберспортсмен ГТО нормативін толдырбаза, аны марыға сығарарға чарабас. Федерация чииттерні хазых чуртасха тартарға кирек нооза.
Денис Олеговичтің таниинаң, пічіктер хоостыра киберспортнаң 14 частаң аралазарға чарир. Итсе-де, ол тусха саарбахтар аймах ойыннарда устарын сынирға маңнанчалар. Хакасияда тренерлер паза чарғыӌылар читпинчеттір. Марығларға чарғыӌыларны хонӌых регионнардаң хығырарға килісче. Денис Шпигальский анзын сидіксініске санабинча, ол пос специалисттерін тимнирге пӧгінче. Оборудование читкіӌе, техниканы федерация аймах организациялар полызиинаң садызып алчаттыр. Пірігістегілер компьютерлерні, программаларны нааӌылирға кӱстенчелер.
Федерация марығларны, тренировкаларны «CyberArena» клубта тикке иртірчеттір. Клуб Ағбанда Советскай орамада, 113 турада орныхча. Андар полған на кізі айланар оңдайлығ. Хайди таныхтаан Денис Шпигальский, оларның ӧӧн пӧгіні - компьютер ойыннарына хынчатхан улусты піріктірері. Пылтыр федерация иртірген арға-мӧрійлерде тӧртче муң кізі араластыр. 2021 чылда аккредитация иртібіскен соонда федерация официальнай оңдайнаң тоғынча. Амды Хакасия чемпионадының чиңісчілері спорт разрядтарына турысчалар. Чоохтирға кирек, киберспортта нормативтерні толдырыбызарға оой нимес. Тилекей чемпионадында чиңіс тутсаң на, Россияның спорт узы атха турызарзың. Анзын піліп аларға чапсых полған.
Федерация марығларны ікі оңдайнаң иртірче. Прай спортсменнер, пір орында чыылызып, аймах ойыннарда кӱстерін сынапчалар. Алай Интернет пастыра палғалыс тудып, марыға аймах орыннарнаң сыхчалар. Киберспортта хайди даа стрим апарылча. Хакас спортсменнердең Роман Трояковты паза Андрей Косточаковты таныхтирға кирек. Ікінӌі спортсмен - Россия Кубогының араласчызы. Пылтыр ХТИ-да киберспортча олғаннарға секция тоғынып пастаанда, чир-суғӌыларыбысты тренер тоғызына хығырғаннар. Секцияда «Компьютерӌе тудыс-хабыс» дисциплинаның Моrtal Kombat паза Tekken 7 ойыннарынӌа ӱгредіг апарылча. Чоохтазығның халғанӌызында Денис Шпигальский теен:
- Пала компьютер ойыннарынаң айғазарға сағынчатса, харығ полбаңар. Саарбахха ойнирға чаратпазаңар, ол ӧнетін ӧчезер. Че паланы сыныхтағда тударға паза орта кӧстирге кирек. Полызығ кирек полза, піссер айланарға чарир. Федерацияны «ВКонтакте» социальнай сетьте таап аларзар, анда прай телефоннар кӧзіділік. Чӧптернең полыс пирербіс. Киберспорттың таңдағызына киртінчем. Ол прайзына оңдай пирче. Александр Хертек Кызыл городтаң, чиңіс соонда ол тилекейге саблан парды. Хакасияда таланттығ чииттер кӧп. Ізенчем, хаҷан полза, піреезі андағох чидіге чидер. Пос кізілеріне киртінерге кирек.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы