Кризистең тоғыр штаб: Iстенiс оңдайлары - хайығда
04.05.2022
Хабарлар
Хакасия правительствозындағы кризистең тоғыр штабтың теестегi чыылиинда республиканың юстиция паза региондағы безопасность киректерiнҷе министр Сергей Ромашов ирткен неделя хайди ирткеннеңер искiрген. Тиксi алза, пу кӱннер амыр ирткен, тоғырланыс акциялары чох, чонға хорғыс ағылчатхан сайбағлар санға алылбаан, че алынҷа киректер право хайраллаҷаң органнарның хайиин тартхан. Ағбан чуртағҷызы воинскай часть чирi хыринда ӱгредiг миназын таап алған, искiрiгҷе тоғынғанда, хоза нинҷе-де мина табылған. Право хайраллаҷаң органнарзар чара чачырастардаңар iкi искiрiг кiрген. Хызыл хайа аалның чуртағҷызы аалдағы клубта чара чачырастаңар искiрген, Ағбан город чуртағҷызы iдӧк чара чачырастаңар тайма искiрiг читiрген. Иреннернең право хайраллаҷаң органнар тоғынча. Сергей Ромашовтың таниинаң, Хакасияҷа МВД чон араласчатхан мероприятиелерде хорғыс чох поларын хадарчалар.
Пу тынағ кӱннерiнде iдӧк илееде мероприятиелер кӧрiл парған, ол санда хосхар айының 30-ҷы кӱнiнде республика ипподромында «Zа наших» Россияның чааҷыларына хабазығ мероприятиезi, аал хонии ярмарказы ирткен паза ат чарысчаң тус азылған. 1 Майда Ағбанда паза Харатаста тоғыс ӧмелерiнiң митингтерi кӧрiлген. Аннаң пасха, Сергей Ромашов олған садында палаларны чох иткенi хоостыра республикадағы школа алнындағы учреждениелерiнде палаларға хорғыс чох поларына тимненiстi хатап сыныхтабызарға сурынған. Хакасия пазы Валентин Коновалов чӧпнең чарасхан, iдӧк сiлкер айының ӱлӱкӱннерiне чарыдылған полған на мероприятиеде чонға хорғыс чох поларын алынҷа хайығда тударға чахаан.
Пааларны сыныхтапчатханнаңар кӧстеглiг министерство кiзiлерi сан-пирiс иткеннер. Хакасияның экономика тилiзi министрi Виктор Богушевичтiң таниинаң, ас-тамахха пааларның ӧзiзi ам даа таныхталча. Кӧзiдiмге, муксун пiр неделя аразына 18 %-ке ӧс парған. УФАС устағҷызы Ксения Лебедеваның искiриинең, муксун паазы тӧстеглiг ӧскiрiлче. Кӱскӱде сыххан муксун тоозыл парғаннаңар, наа ӧскiрiлген муксун садыға сығарылча. Че УФАС таңах паазына чӧпсiнминче. Управление аның паазын тӱзедерiнҷе нинҷе-де неделя тоғын парир, че чӧпсiнiстiг салтарға ам даа килбинче. Мыннаң мындар таңах сығарчатханнарнаң тоғыс узарадылар.
Садығ тураларында ас-тамах чыындызы 70-90 кӱнге пар, ниме-нооларның - 40-50 кӱнге. Министерстводағылар паза УФАС-тағылар полған на айланысча чапчаң тоғынчатханнаңар искiргеннер.
Хакасияның экономика тилiзi министерствозы iдӧк республиканың кiчiг паза ортын пос киреенең айғасчатханнарға урунчатхан сидiксiнiстернi пӧгерге, хазна хабазығларынаң тузаланарға полысчалар. Аның ӱчӱн министерствода ӧнетiн комиссия тӧстелген. Пӱӱнгi кӱнде ӧӧн пӧгiннернiң пiрсi – орында ниме-ноо сығарчатханнарны улуғ садығ тураларынзар кирерi. Кӧстеглiг министерство садығ тураларынаң чӧптезiглер апарча.
Пӱдiрiг материалларына паалар ӧсчеткенi ам даа таныхталча. Халғанҷы неделяда кiрпис, хум, кискен ағас паазы ӧскенi таныхталған, цементке, тимiр ниме-нооға тӱскен. УФАС паалар ӧзiзiн сыныхтапча. Сағам орында сығарылчатхан ниме-нооға паалар ӧскiрiлчеткенi пiлдiзi чоғыл.
Иң кирек имнерге паалар неделя аразына 3,5 %-ке ӧскен, пасхазына – 10 %. Аннаңар искiрген Хакасияның хазых хайраллаӌаң министрi Олег Ананьевский. Ӧӧн сылтағ – садысчатхан паза читiрчеткен оңдайлар алысханы.
Таарығ тузы хыызында парча. Аал хонии паза ас-тамах министрi Сергей Труфановтың искiриинең, хыраҷылар ГСМ-ны читкiҷе садызып алғаннар. Аал хонии техниказына хоза чардыхтар паазы ӧспинче, дилерлернең кӧнi палғалыс апарылча. Техника iдӧк тимде. Хазна хабазии пу кӱннерде тиксi читiрiлерге кирек.
Кризистең тоғыр штабтың теестегi чыылиинда Хакасиядағы iстенiстiң хазна инспекциязының устағҷызы Ольга Токман чоох тутхан. Аның искiриинең, пу чылға сыныхтағларны хазна синiнде хыйа иткен сылтаанда инспекция тоғыс пирчеткеннерзер профилактика кӧстеенең не чӧр поларлар. Андағ чорыхтар пу чылда план хоостыра кӧрiлген сыныхтағ иртiрҷең предприятиелерзер идiлер, iдӧк тоғыс пирчеткеннерге хазна инспекциязын пос кӧңнiнең хығырарға чарир. Специалисттер андағ чорых тузында iлезiне сығысхан читпестерге хайығ айландырчалар. Идiнҷектерге оларны чох идерiнҷе чӧптер пирiлче. Пiр дее хатығлас кӧрiлбинче. Ӧӧн хайығ тоғынҷыларға хорғыс чох iстенiс оңдайларына хайығ айландырылча. Сыныхтағлар иртiрерге чарадылбинчатханда, инспекциядағылар тоғыс саайлары паза тоғынҷыларның палығлаттырары ӧс сығарына чочынчалар. Пасха хорғыстар санында: Ӏстенiс кодексiне тудынмин, тоғынҷыларны алғаны, чал ахчазын, закон сайбап, тӧлирi паза пасхазы. Инспекция прай сурығларҷа паза айланыстарҷа профсоюзтарнаң, хазнаның толдырығлығ ӱлгӱ органнарынаң паза орындағы пос устаныс органнарынаң хада-пiрге тоғынчалар. Республика правительствозында чал ахчазының тӧлелчеткенi хоостыра ведомстволар аразындағы ӧнетiн комиссия тоғынча.
Республикада тоғыс орыннарын хайраллирынҷа сурығны Хакасия пазының орынҷызы Ольга Пономарева узаратхан. Аның таниинаң ол пӧгiннерге Хакасия 131 миллион салковай алған. Ол ахчаа халых тоғыстарын, ӱр нимеске тоғыс орыннарын тӧстирге паза специалисттернi ӱгредерге чарир, прай хабазығлардаңар искiрiг тоғыс пирчеткеннерге читiрiлген. Че олар наа хабазығларнаң тузаланарға маңзырабинчалар. Сылтағларның пiрсi – прай чӧптезiглерде электроннай хол салғаны киректелчеткенi. Федеральнай кiн идiнҷектернiң пу хабазығларнаң тузаланчатханын хайығда тутча. Аннаңар Ольга Игоревна пу хабазығ читiрiлчеткеннеңер искiрiглiг тоғыс апарарға сурынған.
Ӏдӧк Луганск паза Донецк республикалардаң кӧс килген чуртағҷылардаңар паза оларға читiрiлчеткен хабазығлардаңар искiрiлген. Пӱӱнгi кӱнде Хакасиязар 17 кiзi кӧс килген, оларның тӧртi социальнай гостиницада тохтааптыр.16 кiзi пiр саңай пирiлчеткен хабазығнаң тузаланған, пасхазы кирек пiчiктернi чыыпча.
Хакасия пазы Валентин Коновалов, кризистең тоғыр штабтың теестегi чыылиин тоозып, кӧстеглiг министерство-ведомство кiзiлерiн прай хабазығларны хайығда тудып, искiрiглернi чонға читiрерге киректеен. Полған на чуртағҷының сурынызына, айланызына ситкiп хайарға сурынған.
Автор :
Наталья Субракова
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде