ЧИҢІС КӰНІ - ИҢ ААРЛЫҒ ӰЛӰКӰН
06.05.2022
Хабарлар
Сомда: Ағбандағы Чиңіс паркында Успас от хыринда
Хумартхылыс ритуалының ӧӧн репетициязы ирткен
Чиңіс кӱнінең, аарлығ чир-суғҷылар!
Хумартхылас. Хакасияда Чиңіс кӱніне чарыдылған пайрамнығ мероприятиелерге тимненер ӧӧн репетициялар ирткен
Іди Ағбандағы Чиңіс паркында Успас от хыринда Илбек Ада чаадағы Чиңістің 77-ӌі чылына чарыдылған Хумартхылас ритуалының ӧӧн репетициязы ирткен. Анда араласханнар Хакасия пазы Валентин Коновалов, Ӧӧркі Чӧп кнезі Владимир Штыгашев, Хакасиядаң Россияның Федерация Чӧбіндегі кізілері Валерий Усатюк паза Александр Жуков, Хазна Думазының депутады Сергей Сокол, Ағбан город пазы Алексей Лёмин, городтың депутаттары чӧбінің кнезі Альберт Тупикин, Россия президентінің СФО-дағы ӧӧн федеральнай инспекторы Николай Холодов, Ағбан городтағы гарнизон пастығы Сергей Буланов паза даа пасхазы.
ЧИҢІС КӰНІ - ИҢ ААРЛЫҒ ӰЛӰКӰН
Пу тимненіс мероприятиезі дее полза, Успас от хыринда илееде чон чыыл парған. Чааӌылар сабланызы мемориал тӧзінде автоматтығ чааӌылар турған. Ідӧк мемориал хыринда ӱбӱрӌең оркестр тимде турча, ибіре Илбек Ада чаадағы тусха чарыдылған кӧглер истілче. Парадха кисчең кип-азахтығ чааӌылар строевой хаалағнаң Успас от хыринзар Россияның, Хакасияның паза Чиңіс флагтарын ағылғаннар.
Анаң чааӌылар сабланызы мемориалзар веноктар салар ритуал пасталған. Мероприятиені республика пазы Валентин Коновалов асхан. Ол, мемориалзар парчатхан ӧӧн аллеяӌа пастырып, Илбек Ада чааның полған на чылын таныхтапчатхан плиталарзар чахайахтар, мемориал тӧзінзер чааӌылар ағылған улуғ венокты салған. Успас от хыринда турып, пазын тӧбін тӱзірген.
Ритуал хоостыра веноктар мемориал тӧзінзер саларын узаратханнар Владимир Штыгашев, Валерий Усатюк, Александр Жуков паза Сергей Сокол. Ол ӧменің соонӌа парғаннар Алексей Лёмин, Альберт Тупикин паза Ағбандағы епархияның абыстары. Веноктар салар халғанӌы ӧмеде полғаннар Николай Холодов, Сергей Буланов паза кӱс структураларының устағӌылары. Аннаң андар чахайахтар салғаннар Хакасияның правительствозы, Ӧӧркі Чӧп кізілері, халых пірігістерінің, организацияларның устағӌылары.
Илбек Ада чаада чуртазын пир салғаннарны сағысха киріп сым турар пір минута чарлалған. Чааӌылар, Чиңісті таныхтап, салют идіп, киизер автоматтардаң атханнар. Россияның паза Хакасияның гимннері толдырылған соонда, чааӌылар ағылған флагтарны парктаң апарғаннар. Мыннаң Успас от хыринда Хумартхылас ритуалын иртірер ӧӧн репетиция тоозылған.
Ідӧк Ағбандағы Пастағы май площадьында пайрамнығ марштың ӧӧн репетициязы ирткен. Анда чааӌыларның, кӱс структураларының, юнармеецтернің, кадеттернің командалары стройнаң ирткеннер. Правительство туразы алнында турғызылған трибунада Хакасияның устаа, чаа ветераннары, чаа палалары, тыл істенӌілері полғаннар.
Илбек Ада чаадағы Чиңістің 77-ӌі чылына чарыдылған мероприятиелернің ӧӧн репетициялары тӱзімніг паза алғым иртірілділер. Улуғ ӱлӱкӱнге тимненіс пӧзік синде иртіп парды, пайрам ідӧк чахсы иртеріне ізеніс пар.
==============================================
9 Майда - Чиңіс кӱні!
Илбек Ада чааның аарлығ ветераннары, тыл істенӌілері, чир-суғӌылар, Хакасия Правительствозы паза Ӧӧркі Чӧбі алғыстапчалар сірерні Илбек Ада чаада Чиңіс тутханынаң пеер 77 чыл толчатханынаң!
9 Май - Россия чуртағӌыларына иң аарлығ паза танығлығ ӱлӱ-кӱннернің пірсі. Совет чонының махачызы поғдархас тӧрітче, Чир-суубысты арачылап алған улуғ тӧлібістің матыры ӱчӱн, нацист азымахчыларынаң тоғыр кӱрезігде сыдамах тудынызы ӱчӱн.
Илбек Чиңістеңер сағыс, чыллар иртсе дее, пӱлестелбинче, ол пістің чонға нация поғдархазы, чааӌы сабланызы паза матыры тании полған паза полча, хайзы Совет хазназының тархын страницаларынзар хаӌанға даа пазылған.
Пу май кӱннерінде піс фронтовиктерні паза Чиңісті тылда таптаан істенӌілерні чеестепчебіс, хазнабыстың пос чуртазы ӱчӱн чуртастарын пир салған чааӌыларны хумартхылапчабыс.
Аарлығ ветераннар, Ада чир-суубысха сын полғаныңар пӱӱн Россияның Тирігліг кӱстері чааӌыларына, хайзылары Донбасста олаңай кізілерні арачылапчалар паза чир ӱстӱнде амыр чуртас полар ӱчӱн неонацизмнең тоғыр кӱрезіг апарчалар, кӧзідім полча.
Прайзына хазых, часка, амыр чуртас алғапчабыс.
В.О.КОНОВАЛОВ, Хакасияның пазы - Хакасияның Правительство кнезі;
В.Н.ШТЫГАШЕВ, Хакасияның Ӧӧркі Чӧп кнезі;
==============================================
Аарлығ чир-суғӌылар! Сірерні прай чонның улуғ ӱлӱкӱнінең - Илбек Ада чаадағы Чиңістің 77-ӌі чылынаң - алғыстапчабыс.
77 чыл мының алнында иң хан тӧгістіг чааның атыстары тохтап парған. Илбек Ада чаа пістің сағызыбыста иң улуғ чобағ полып халча. Сірернің, ол чалыннығ чыллар матырларының, чуртас чолыңар пасха полған. Піреезі фронттарда, партизан отрядтарында махачы чааласхан, пасхазы істеніс вахтазын апарған, хурчағдағы Ленинградта хазых халған, фашист концлагерьлерінде иреелеткен. Сірер, сыданып, чиңіс тутхазар!
Сірернің, Чиңіс чааӌыларының, алныңарда пазыбыс тӧбін тӱзірчебіс! Піс тӧлеп полбас алымнығбыс.
Пик хазых алғапчабыс сірерге. Чиңіс кӱнінең, аарлығ ветераннар!
А.Ю.ТИТОВ, Хакасияның чааҷылар комиссары
Г.А.ТРОШКИНА, респубиканың Ветераннар чӧбінің кнезі
О.И.ПАГЕЛЬС, Россияның Тирігліг кӱстерінің ветераннары пірігізінің региондағы пӧлиинің кнезі
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде