АМЫР ХОНЫХ ПОЛЗЫН
06.05.2022
Хабарлар
Пайрам. Пӱӱл Ағбанда Істеніс кӱніне чарыдылған чӧрім паза митинг чалбах таныхталған
Алында ковид чуғынӌах ағырығ прай чирде тараан сылтаанда кӧп кізі чыылчатхан ӱлӱкӱннер таныхталбааннар. Амды ікі чыл пазынаң Россияда ла нимес, ідӧк пасха даа хазналарда Пастағы майны, Істенӌілер пірікчеткен чоннар аразындағы кӱнні, чалбах таныхтааннар.
Ағбан городта республикадағы профсоюзтар организацияларының, халыхтар пірігістерінің, істеніс коллективтерінің кізілері «Ынархас» гостиница алнындағы ачыхта иртенӧк чыылысханнар. Городтың ӧӧн орамалары хызыл чаламаларнаң паза аймах ӧңніг шарларнаң чазал парғаннар. Кізілер пайрам чӧріміне, чазан салып, холларында чаламалар паза шарлар тудынып, сӧбірелерінең чыылыс турғаннар. Анда-мында хатхы-кӱлкі паза кееркестіг кӧг истілген.
Пайрам чӧрімін асхан Андрей Штарк устапчатхан городтағы ӱбӱрӌең оркестр. Музыканттарның соонӌа парғаннар «Хакасияның істеніс сабланызы» медальнаң сыйыхтатхан кізілер.
Чӧрімде араласханнарның иң кӧп саннығ полған полар чон ӱгредии паза наука тоғынӌыларының профсоюз организациязы. Ідӧк поғдархастығ пас парғаннар Россиядағы политика партияларының кізілері. Пайрамнығ чӧрімні орамаӌа парчатхан кізілер сомға суурчатханнар, піреезі чӧрімге хозылчатхан паза Щетинкиннің орамазындағы кӧп хадыллығ тураларның балконнарында турчатхан кізілер ӧрчіліг айа саапчатханнар.
Пайрам чӧрімі, ӧӧн орамаӌа парып, правительство туразының алнындағы Пастағы май площадьында тохтаан. Мында ӱлӱкӱн митингі пасталған. Чыылған чонны иң пастап Хакасия пазы Валентин Коновалов алғыстаан. Ол чооғында піди таныхтаан, амғы туста Россияны Кидеркі Европа хазналары чоо абылапчалар, аймах санкцияларнаң чаба пазарға харасчалар, Россияның тілін паза культуразын чох итчелер, экономика саринаң хыза пасчалар. Аннаңар піске мындағ туста пір кӧңніліг, ынағ поларға кирек, піс тӧдір пазынмаспыс, ыырӌы пісті, хорыхтырып, чабыра пас полбас. Піс Украинада чааласчатхан чааӌыларыбыснаң хадабыс. Андағы нацисттерні чох идерге матыр істенізібіснең полызарбыс. Пістің Хакасия прай Россиянаң хада кӱстіг ползын, улам тиліп турзын паза ӧңнензін!
Анаң Хакасия пазы «Хакасияның істеніс сабланызы» медальнаң істеністе пӧзік чидіглерге читкен ХГУ-ның естественнай наукалар паза математика институдының директоры Василий Анюшинні, Хакасияның Сыныхтағ-сананыс палатазының аудиторы Сергей Манаховты, имӌі-анестезиолог Светлана Решетникованы паза имӌі-физиотерапевт Роза Чанкованы таныхтаан.
Ідӧк чыылысхан чонны алғыстааннар Хакасияның Ӧӧркі Чӧп кнезі Владимир Штыгашев, Хакасиядаң Россияның Федерация Чӧбіндегі сенаторы Валерий Усатюк, Хазна Думазының депутады Сергей Сокол.
Автор :
Илья ТОПОЕВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде