Хакасияның Илбек Чиңіске сын хозымы паалалар
09.05.2022
Хабарлар
Хакасияның культура министерствозы искіриинең, республиканың Илбек Чиңіске сын хозымын паалирынӌа тоғысчы öме тöстелген. Аннаң культура министрі Светлана Окольникова устапча. Тоғысчы öмезер Национальнай архивтiң, Л.Р.Кызласовтың адынаң чир-суғ ӱгренӌең музейнің, Н.Г.Доможаковтың адынаң национальнай библиотеканың тоғынӌылары, ХГУ-ның тархын паза право институдының ученайлары паза халых пірігістерінің кізілері кірчелер.
Iстезігӌілернің сананыстарынӌа, Илбек Ада чаа пасталғанда, Хакасиядаң фронтсар 70 муңа чағын ирен ызылған алай ол тустағы чуртағӌыларның 24 %-і. Чир-суғӌыларыбыстың 30 муңы чаадаң айланмаан! Ағаларыбыс паза кирі ағаларыбыс немец-фашист азымахчыларынаң чааласхан туста, тылда олғаннар паза ипчілер істенгеннер, фронтсар аттар, тӱктең чылығ кип-азах, ас-тамах читіріп. 77 чыл пазынаң Илбек Чиңіске Хакасияның хозымына наука-тархын кöрізінеңер сурығ ам даа кирексініснең тузаланча.
- Хомзынысха, пӱӱнгі кӱнге теере Илбек Ада чаа тузындағы Хакасияның тархынына чарыдылған наука тоғыстары уғаа асхынах. Піреезінде толдыра паза сын нимес искіріг пирілче, ол, тізең, öнетін иділбеен, сылтағ олаңай - істезігӌее сурығ хынығ полбаан, аның сылтаанда ол искіріглер чыындыларынаң читкіӌе тоғынмаан, - таныхтаан тархын наукаларының кандидады, ХГУ-ның тархын паза право институдының тархын кафедразының доценті Виктор Беккер.
Россияның чаа-тархын пірігізі хосхар айында “Сибирь Илбек Ада чаа чылларында” тиксі Сибирьдегі форумны иртірген, анда ӱзӱрілген ööн сурығларның пірсі Хакасияның Илбек Чиңіске хозымы полған. Форум оой нимес тустаңар тиксі чыылған искірігні тиңнестірерге полысхан.
- Саннар - иң сидік сурығларның пірсі. Анзына пастағызын на урунғам Кызласовтың Х хығырығларында, мин Россияның чаа-тархын пірігізінің региондағы пöлиинең устапчатхам. Араласчылар, аймах искіріг чыындыларынаң - библиотекаларнаң, архивнең, военкоматнаң, ветераннар чöбінең паза пасхазынаң - тузаланып, аймах-пасха саннар искіргеннер, че удур-тöдір пасхалалчатханнар. Арғыстар, пістің пöгінібіс - Хакасияның Илбек Чиңіске хозымынаңар саннарны паза искіріглерні иптирге! - тоғысчы öме араласчыларынзар айланған Хакасияның культура министрі Светлана Окольникова.
Пастағы чыылығ салтарларынӌа сын искірігні тöстеӌең кирексіністерні тимнирге чарадылған. Аннаң пасха, ведомстволар аразындағы тоғысчы öме араласчылар санын алғыдарға чарадылған. Андар чиит тархын істезігӌiлерін, ХГУ-ның аспиранттарын паза магистранттарын, хозарлар.
Автор :
Тимнеен Наталья Субракова
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы