ХУБАЧАРДА - НАА ИМНЕГ КОРПУЗЫ
13.05.2022
Хабарлар
Сомда: Ирина ВОЙНОВА наа пӱдірігде пастағы ӧзек саапча
Пӱдіріг. Пӱӱл Хубачарда Алтай аймааның ӧӧн имнег туразының наа корпузы пӱдіріл парар. Ирткен неделяда, аның пӱдірии пасталчатханын пайрамнап, анда пастағы ӧзек сабарында араласхан республика пазының орынчызы Ирина Войнова
Ирткен неделяда Алтай аймаандағыларның танығлығ кӱн полған. Анда аймахтың ӧӧн имнег туразының наа имнег корпузының пӱдірии пасталған. Аның пайрамнығ чардығында араласханнар Хакасия пазының орынҷылары Ирина Войнова паза Ольга Пономарёва, хазых хайраллаҷаң министр Олег Ананьевский.
Наа пӱдірігнең «Бастион» пӱдіріг компаниязы айғасча. Ол аны пӱӱл ноябрьда тузаланысха пир саларға пӧгінче. Подряд организациязының устағҷызы Максим Девятаев проекттеңер чоохтаан, блок-модульлығ корпус амғы наа технологияларда пӱдірілер. Ол наа тураны ікі хати табырах пӱдірібізерге оңдай пирче. Анда пациенттерні имниріне прай 7 палата 24 орынға кӧрілче, оларның пірсі блок-бокс полар. Ідӧк - перевязка ит чең паза даа пасха имнег кабинеттері. Ағырчатхан кізілер алында ізікче кір чӧрерлер. Наа корпустың тиксі улии 715 м2 полар.
Ол иргі поликлиника орныххан орында турғызылар. Пу пӱдіріг суриин пӧгерінде ӧткін араласханнарның санында Ирина Войнова полча. Ол чыылысхан чон алнында чоох тудып таныхтаан, пӱдіріг суриин пӱӱл январьдаң пӧгіп пастааннар. Пастап иргі тураны тиксі тыхтирға сағыс полтыр, че анаң наа корпус пӱдірердеңер чарадығ алылған. Ирина Ивановна ізенче, коронавирус ағырығ «тӧдір пазынза», наа имнег корпузында
реабилитация кіні орныхса, чахсы полар. Ковиднең ағырған соонаң кізілернің хазиин пиктеҷең кін амғы туста уғаа кирексіністіг полар. Анда республиканың пасха чуртағҷылары даа хазиин пиктир оңдайнаң тузаланарлар.
Чоохтирға кирек, Ирина Войнованың тӧреен-ӧскен чирі Хубачар полча. Ол аймахтағыларға орында имнег полызии чахсы пирілзін тіп сурығдаң тастыхти турбасха харасча. Пу корпус пӱдіріл парза, аннаң хости наа тура хоза пӱдірердеңер пӧгін турғысча. Ікі наа корпус чылығ «переход» адалчатхан пӱдірігнең піріктірілер. Андағ пӧгінні Хакасия правительствозы пӧгерге полыс пирер тіп ізенізін чідірбинче.
Наа имнег корпузы пӱдіриине 68,5 млн салковай хорадылар. Ол пӱдіріл парза, Хубачардағы имнег туразы, ээзі полып, анда ноо кӧстегде имнег полызиин пирерінде позы таллап алар. Анда коронавируснаң ағырчатханнарға стационар орнығар. Алай - терапия, хирургия, кардиология пӧліктері, алай - реабилитация кіні.
Хубачардағы имнег туразының ӧӧн имҷізінің тоғызын толдырчатхан Ольга Черненконың танығларынаң, наа пӱдіріг имнег туразына уғаа киректелче. Кӧзідімге, ковиднең ағырғаннарға реабилитация иртіреріне. Пӱӱнгі кӱнде аймахта андағ кӧстегде тоғынчатхан пір дее имнег пӧлии чоғыл. Республиканың имнег туразында ла улуғ нимес реабилитация пӧлии пар, че ол амбулаторнай кӧстегҷе тоғынча. Хубачарда андағ кін тоғын сыхса, андар орындағы стационардағы пациенттерні чатырып, имнег полызиин пирерге пӧгінчелер. Ол санда андағ имнег полызиин республиканың пасха даа пулуңнарында чуртапчатхан кізілерге пир турарлар. Ковидтең ибде имненген чуртағҷыларнаң даа тоғыс апарылар.
Хайди таныхтааннар пастыхтар, наа имнег туралары пӱдірілчетсе, ӧӧн пӧгіннернің пірсі, чиит специалисттерні тоғысха тартып алары поладыр. Хакасияда пӱӱл имділерге квартиралар алылчалар, ол санда аймахтар кінінде. Хубачарда халғанды ӱс ай аразына тоғысха алылғаннар наа имділер: эндоскопист, хирург, фтизиатр, ӱс участковай терапевт. Пӱӱн Хубачарда оларға ікі квартира алылған. Майда хирург паза фтизиатр хазнадаң пирілген квартираларзар кӧзіп аларлар. Пӱӱл имҷілерге ам даа 6 квартира садызып аларлар. Тиксі 8 квартира алылча.
Кибір хоостыра, наа пӱдірігні пастир алнында, пастағы ӧзек пайрамни сабылча. Аны прайзынаң пурун сабарға ӱлӱс тӱскен Ирина Войноваа. Аның соонаң пасхазы даа ӧзек сабарында араласхан. Пайрамнығ чардых тоозылғанда, республика правительствозының делегациязы пурун стационарзар чол тутхан, соонаң Хубачарда имҷілерге алылған ікі квартирада пол килген.
Чурттарның пірсі - ікі пӧліктіг квартира. Анзы ӱс хадыллығ кӧп квартиралығ турада орныхча. Андар имді-фтизиатр Новосибирсктең кӧзер. Ікінҷі чурты - тӧрт пӧліктіг квартира пис хадыллығ турада. Ол имҷі-хирург полып тоғынчатхан ікі палалығ ідее пирілче. Хубачарзар Волгоград облазынаң кӧсчеттір. Пу специалисттер аалда 10 чыл тоғын салзалар, чуртты пос холына киріп аларлар. Че сағам квартиралар ведомственнай чуртха саналчалар, олар имҷілерге аймахтың ӧӧн имнег туразынаң пирілчелер. Чурттарны садызарына ахча регион правительствозы позытча.
Ағаа хоза Хакасиязар пастағызын на тоғынарға килчеткен имҷілерге «Земскай доктор» хазна программазында 1 млн салковай пирілер. Чурт суриин иң пурун пӧгерге полысчалар тың киректелчеткен специалисттерге. Пу аймахтың имнег туразында тоғысха киректелчелер трав-матологортопед, физиотерапевт, реабилитолог, педиатрлар. Устағҷыларның чооғынаң, амғы туста Хакасияда наа имнег туралары пӱдірілчелер паза оларзар наа имнег оборудованиезі чахсы алылча, че оларнаң тоғынҷаң специалисттер хайди даа кирек.
Ирина Войнова Хубачарзар тоғыс чорығынаң чӧрген туста ідӧк аалдағы олған музыка школазында поларға маңнанған. Андағы тоғынҷыларнаң чыылығ иртірілген, хайзында ідӧк араласхан республиканың культура министрі Светлана Окольникова. Пу олған музыка школазы пӱӱл июньнаң олған искусство школазы полып тоғынып пастир. Аннаңар анда ам хоосчылар пӧлиин азарға пӧгінчелер, ол кӧстегҷе августтаң толдыра кӱзінең тоғын пастирлар. Наа пӧліксер ӱгренділерні амох чарлағлар пиріп алчаттырлар. Пӱӱн музыка школазында 92 олған ӱгренче, оларға 10 ӱгретчі піліс пирче.
Пазағы ӱгредіг чылында профессиональнай музыка пӧлиин азарға пӧгінчелер. Профессиональнай программада тоғынып, оркестр ідӧк тӧстирге сағынчалар. Наа оркестр инструменттерін аларына аймахха дотация пирілтір, аның сині - 28 млн салковай. Чыылығда школаның ол-пу хорадығлары, сананыстары ӱзӱрілген. Ирина Ивановнаның чооғынаң, пу иргі школа орнына наа улуғ тура пӱдірілер, аннаңар «Аалның алғым тилізі» федеральнай программаа кіріп аларға кӱстенчелер. Аны 2023-2024 чылларда пӱдірерге. Музыка школазы иргі турада орныхча, аны тиксі тыхтирына 12 млн салковай кӧрілтір, че ол ахча наа пӱдірігнің проектін тимниріне тузалығ пол парарға айабас. Пу школаның тилізін аннаң андар июньда хатап ӱзӱрерге чӧптес салғаннар.
Автор :
Сарина КЫЗЛАСОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде