ЧОРЫХЧЫЛАРНЫ УДУРЛИРҒА ТИМНЕНІС
13.05.2022
Хабарлар
2022 чыл - Археология чылы. Хакасияның Халыхтар палатазы Россияның Халыхтар палатазының экология комиссиязы араласчыларынаң хада республикада чарлалған Археология чылы хоостыра тегілек стол иртірген
Тоғазығны асхан паза апарған Россияның Халыхтар палатазының араласчызы, Хакасияның Халыхтар палатазының экология, ибіркіні хайраллир паза туризмні тилідер комиссиязының кнезі Ирина Санникова. Ирина Валерьевнаның пастағы сӧстері тегілек стол араласчыларын тың ӧріндірген - пӱӱл Хакасиязар туристтер кӧп килерін сағирға кирек. Анаң мындағ кӧзідім ағылған - хонҷых Тағлығ Алтайзар путевкалар чайғы тусха прай садыл партыр. Амды Тувазар паза пістің республиказар путевкаларны алғлапчатхан осхастар, аннаңар чорыхчыларны чахсы удурлирға тимнен саларға кирек. Пӱӱл кӧңнілеріне кірзе, соонаң нанчыларынаң хада кил турарлар.
Анаң ол Хакасияның Халыхтар палатазының кнезі Ольга Левченкаа сӧс пирген. Ольга Александровна тегілек столда араласчатхан, Археология чылын турыстығ таныхтирға сағынчатхан кізілерні тӱзімніг тоғынарға хығырған.
Пӱӱл республикада Археология чылы чарлалғанда, аны пӧзік синде иртірерге ӧнетін комиссия тӧстелген. Аның устағҷызы полча Хакасия пазының орынчызы Юрий Курлаев. Юрий Николаевич комиссия хайди тоғынчатханнаңар искірген, пістің республикада хазна хайиинда 30 муң артиинаң археология хумартхызы хайраллалча теен. Анаң, Археология чылы тоозылчатса, Хакасияда чоннар аразындағы симпозиум иртірілерінең таныстырған.
Хакасияның культура хумартхызын хайраллапчатхан хазна инспекциязының устағҷызы Дмитрий Левченко пістің республиказар килер туристтерні турыстығ удурлир тоғыс 2021 чылдох пасталғанын таныхтаан. Дмитрий Александрович, Хакасиядағы кинектер пірігізінің кізілері пос кӧңнінең археология хумартхыларын нааҷылирында, арығлирында аралазарға сурынған тіп, тоғазығ араласчыларының кӧңнін тибіреткен. Ағаа хоза, ол устапчатхан хазна инспекциязы пістің республикада Археология чылына чарыдылған 64 аймах мероприятие иртірерге пӧгінчеткенін искірген.
Анда кӧп кізі, ол санда саблығ ученайлар араласчаң осхастар. Ідӧк Хыдатта паза Кореяда аймах чыылығ-симпозиумнар иртірерге тимненчелер. Хырығ озариндағы ученайлар Хакасияны Археология кіні тіп чарлирға тимде осхастар. Тиксі хазнабыста пістің чирдегі археология хумартхыларынаңар кинолар кӧзіділ турар.
Хакасиядағы Л.Р.Кызласовтың адынаң чир-суғ ӱгренҷең музейнің директоры Андрей Готлиб олғаннар паза кинектер аразында Хакасияҷа виртуальнай чорых чӧрер кӧзідіглер улуғ кирексініснең тузаланчатханын таныхтаан. Музей тоғынчылары пӱӱнгі кӱнде олғаннарға паза хазии уйаннарға тиксі сабланчатхан Салбых кӱргенҷе чӧріп алар оңдай пирчелер. Ідӧк улуғ кирексініснең тузаланчалар аймах-пасха мастер-класстар.
Андағ ӱгредігліг чорыхтарға прайзы даа хынып чӧрче, ус холлығларға алғыстарын читірче.
- Пістің андағ пӧгіннер илееде. Оларны чуртасха кирерге кӱстенербіс. Уламох пӱӱл матап сіренерге кирек, хаҷан Археология чылы чарлалғанда. Уғаа ӧріністіг, Хакасияда табылған тархын хумартхы танығлары пісте халчатханда, - таныхтаан музей директоры.
Дмитрий Левченко пістің республикадағы хазии уйан кізілернің піреезі археология хумартхыларын арығлирында аралазарға сағынчатханын, чӧптезігде хол саларға тимненчеткенін искірген полза, «Хакасский» заповедниктің директор орынҷызы Анжелика Челтыгмашева Хакасиядағы кинектер пірігізінің араласчылары Оғлах тағзар сыхчаң ағас пасхысты тыхтирында улуғ хозым итчеткеннерінеңер чоохтап пирген. Хазии уйаннарның аразында волонтерлар табылчатханы уғаа махтағлығ теен Анжелика Дмитриевна, анаң хосхан: «Піс оларны олаңай ла тоғындырбинчабыс, чахсы тынанып алар оңдай пирчебіс. Полысчыларыбыс сіліг орыннарнаң танысчалар, хоостапчалар. Ідӧк Оғлах тағның пурунғы чазыттарынаңар хынып исчелер».
Хаҷан Вера Туник чоохтан сыхханда, орындағы пастыхтардаң полар, Москвадаң килген аалҷылар даа таңнап парғаннарын чазырбинчатханнар. Хайди сым одырып аларзың за, хаҷан кинектер постарын хазых кізілернең тиңни санирға сурынчатханнарын исчеткенде. Хазии уйан улус Хакасияның аймах пулуңнарында пол килчеткеннеріне ӧрінче. Олар постарын гидке ӱгредерге сурынчалар. Ибіркінің сілиинеңер, археология тархынынаңар кинектерге кинек кізі чарыда чоохтап полар тіп санапчалар. Хакасияда пасталған пу чӧрім тиксі Россияҷа табырах таразын тіп сағынчалар. Итсе, оларның хомзыныстары пар - чорых чӧрерге килістіре автотранспорт чоғыл даа. Аннаңар олар пирілген автобустарнаң на тузаланчалар.
- Пасха регионнарда андағ автобустар чӧрчелер бе? Улгӱ саринаң полызығ киректелче бе? - сурча Вера Ивановнадаң Хакасия пазының орынҷызы Юрий Курлаев.
- Тағлығ Алтайда ікі музейзер кинектерні ӧнетін автобустар тарт чӧрчелер. Анзы чағынғы регионда. Улгӱ саринаң чарадығ ла алыбызары киректелче. Автобустар тимнирге ӱр нимес, - нандырған Халыхтар палатазының социальнай политика паза чон хазии комиссиязының кнезі Вера Туник.
- Кинектер санынаң экскурсоводтар тимнир чӧп уғаа тузалығ. Автобустар тимнирін ідӧк хайығда тударбыс. Пасха даа сурыныстарны, пірге чыып, Хакасия правительствозынзар паза Ӧӧркі Чӧпсер ызарбыс. Іди чарир, я, Юрий Николаевич? - айланған Хакасия пазының орынчызынзар Халыхтар палатазының кнезі Ольга Левченко.
Москвадаң килген Наталья Абалихина тегілек столның тоғызына пӧзік паалағ пирген, кӧп наа, чапсых пастағлардаңар истіп алғанын таныхтаан, амды оларны чуртасха ла кирерге халды теен. Пірее сидіксіністер орта полчатса, кӧні постарынзар айланарға сурынған. Анаң тоғазығда араласхан, постарының ағырсымнығ сурыныстарын сығарған улусха улуғ алғызын читірген, тузалығ чӧрімнерні тиксі хазнаҷа тарадарға харазарбыс тіп ізендірген Наталья Юрьевна.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде