ЧИҢІС КӰНІ ХАҶАНҒА ДАА САҒЫСТА ХАЛЗЫН
13.05.2022
Хабарлар
Сомда: Илбек Чиңіс. Таштып аймаанда Чиңіс кӱні хаҷан даа алғым таныхталча
Ӱлӱкӱн алнында 8 майда наа кибір хоостыра Ӧлімі чох полктың чории иртче. Пӱӱл ол, Таштып аймааның имнег туразынаң сығара пасталып, Чиңіс паркына теере читкен.
9 Майда митингке прай аал чыылғанға тӧӧй полған, прайзы ӧрчіліг. Чиңіс паркында, хайда ирткен митинг, чонны алғыстирға пастыхтар, депутаттар сыхханнар. Ідӧк республиканың национальнай паза территориальнай политика министрі Михаил Побызаков чоох тутхан:
- Аарлығ Таштып аал чуртағҷылары, пӱӱн піс Илбек Ада чаадағы Чиңісті таныхтапчабыс. Чаа ветераннарын ундутпаалар, хазых полалар. Чыл сай тиксі Россияда улуғ аарласнаң таныхтапчалар Чиңіс кӱнін, чиит тӧлні кӧніктірчебіс пу ӱлӱкӱнні пір дее ундутпасха. Анзы уғаа чахсы, нинӌе ниме Чиңіс ӱчӱн иділ парғаны, нинӌе чон хорғыстығ чаада чат халғаны хаӌан даа сағыста халарға кирек. Халғанӌы туста піс кӧмес пасха иде Чиңіс парадынзар кӧрчебіс, чаа тиріглеріне, танктарға поғдархапчабыс. Анзы тиктең нимес, прайзы пілче полар, хайдағ пӧгіннер турча пістің армиябыс алнында - илбек хазнабысты ыырӌылардаң арачылиры. Пӱӱнгі кӱнде пістің хазнабыстың армиязы даа, чоны даа, экономиказы даа кӱстіг ползын.
Илбек Ада чааға Таштып аймаанаң фронтсар 8543 кізі парыбысхан, 3086-зы айланмаан. Пӱӱнгі кӱнге аймахта ікі ле ветеран халған. Вениамин Прокопьевич Шулбаев Даманскай олтырыхта полған чаада араласхан, 18 частығ хыс Анна Ивановна Ильина фронтсар 1942 чылда ызылған, ол Ыраххы Востоктағы 749 зенитно-артиллерийскай полксар кір парған, ибзер ӱс чыл пазынаң айланған. Оларны, чаа ветераннарын, «Ветеранға сыйых» акция хоостыра «Единая Россия» партияның, «Чиңіс волонтерлары», аймахтың социальнай полызығ пирӌең пӧлиинің кізілері, Таштып аймааның пазы Алексей Дьяченко, Ӧӧркі Чӧптің депутады Наталья Кокарева паза Таштып аал пазы Рустам Салимов ӱлӱкӱннең алғыстааннар.
Митинг соонаң чон А.И.Кыжинаевтің адынаң культура туразынзар концертке чыылған. Анда чаа темазына чарыдылған ырлар, теелбектер, номерлер толдырылғаннар. 22.00 часта илееде кізі «Хумартхылас свечізі» акцияда араласхан, ол Чиңіс паркындох ирткен. Аның соонаң 22.45 часта салют полған.
Автор :
Тарина БУТОНАЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде