Тоғыс чохтар саны алысча
14.05.2022
Хабарлар
Ирткен четвергте Хакасия правительствозындағы кризистең тоғыр штаб чыылии ирткен. Пастыхтар кидеркі хатығластар кирілчеткен туста чуртас-экономиканың ööн сурығларын, ол санда чонға хорғыс чох поларын паза паалар öзізін, чон тоғыстығ поларын, хайығда тутчалар. Прай кöстеглерге федеральнай синнең хабазығ пирілче, че регион ідöк пос киреенең айғасчатханнарға паза чуртастың сидік оңдайларына кіргеннерге хабасчаң оңдайлар тілепче паза чуртасха кирче.
Теестегі чыылығда ирткен неделядағы чонға хорғыс ағылчатхан киректер ілезіне сығарылғаны, ас-тамахха, имнерге паза пӱдіріг ниме-ноозына паалар алысханы, чуртағӌыларның тоғыс чох халарына хорғыстар паза тöбін парыстығларға, кöп палалығ сöбірелерге хабазар оңдайлар ӱзӱрілген.
Хакасияның юстиция пазa региондағы безопасность сурығларынӌа министр Сергей Ромашовтың искіриинең, Россия Украинада öнетін операция пастааннаң сығара республикада ӱлгӱдең паза аның политиказынаң тоғыр чöрімнер иртірілбеен. Олох туста оох-теек сайбағлар сығысча. Пу неделяда Ағбандағы бетон заводында ӱлгӱні хомайлапчатхан сöстер пазылғаны табылған, сах андох оларны чох иткеннер, сілкер айының 12-ӌi кӱнінде, тізең, Ағбандағы Ööн мылчаның стенезіндегі Георгиевскай чаламанаң Z пазылған баннерні тӱзіре тартыбыстырлар. Прай сайбағ киректерінӌе істезіг апарылча.
Сергей Ромашов ідöк Чиңіс кӱніне чарыдылған прай мероприятиелер чонға хорғыс чох поларынӌа иң пöзік синде ирткеннеңер искірген. Аннаңар министр МВД паза УФСБ органнарына Хакасия правительствозы паза республика пазы адынаң алғыстастар читірердеңер чöпнең сыххан. Хакасия пазы Валентин Коновалов министрнің чöбінең чарасхан паза алғыстастарны тимнирге чахаан.
Республикада паалар öзізі ідöк азығ айынаң сығара хайығда тудылча. Хакасияның экономика тилізі министрі Виктор Богушевичтің искіриинең, олар ам Орджоникидзе паза Боград аймахтарында иб хыриндағы садығ тураларында ас-тамахха пааларны сыныхтапчалар. Специалисттер таниинаң, андағы паалар Ағбандағы ортымах паалардаң даа, Росстаттың пааларынаң даа сала тöбін. Виктор Богушевич кöзідімге палых паазын пирген. Тиксі алза, чир тамаана паалар ам даа öсче, ортымахти 2%-ке, че муксунға - 9,2%-ке. Аннаң пасха, чир тамаанаң консерваларға паза пала чиизіне пааларның 4%-ке öскені таныхталған. Министерство ідöк пааларны Росстаттың сыныхтағ салтарларынаң тиңнестірчелер.
Пӱдіріг ниме-ноозына пааларның алысханынаңар искірігнең чоох тутхан республиканың пӱдіріг паза ЖКХ министрі Валерий Келин. Іди алынӌа садығ тураларында чарытхы кабельіне паза 5 мм арматураа паа тӱскені таныхталған. Пасха пӱдіріг ниме-ноозына паалар олох синде халтыр. Валерий Келин ідöк федеральнай синде алылған наа чарадығларны чарытхан. Амды тиксі тыхтағ тоғыстарына аванс сині öскірілген паза чöптезіг паазын тӱзедерге чарадылча, городтағы осхас истіг оңдайларны тöстирінӌе хазна программазында инфраструктура облигациязын тузаланарға чарадылча. Ирткен неделядағы чыылығда оперативнай штабтың араласчылары аалдағы ипотекаа ахча регионнар аразында ӱлестірілгеніне öрінген полғаннар, че амға теере ахча орындағы банкттарға читірілбеен.
Чонға иң кирек имнер паазы 4-15 %-ке тӱстір, пірее имнер паазы 2,2%-ке öскені таныхталған. Пасха имнер паазы 5,2%-ке öстір, піреезінің паазы тӱстірöк. Аптекаларда паза имнег тураларында имнер читче. Нинӌе-де аарлығ имнең сидіксініс пар, че олар Россияда даа садылчалар тіп искірген республиканың хазых хайраллаӌаң министрi Олег Ананьевский.
Виктор Богушевичтің таниинаң, кічіг паза ортын пос киреене читірілчеткен хабазығларны хати кöргенде, ас-тамах промышленнозы паза социальнай кöстегліг коммерческай нимес пірігістер хабазығ албинчаттыр. Оларға хабазар оңдайларны тілирге чахаан Валентин Коновалов, ол санда федеральнай бюджеттең. Республика бюджедінең хабазарға итсе, пасха хорадығлардаң ахча аларға килізерінеңер искірген финанстар министерствозының кізізі. Олох туста республика пазы хабазығ алар идінӌектер пӱӱнгі чуртас-экономика оңдайларының кирексіністеріне нандырарға киректер: тоғыс орыннарын хайраллирға, ахча айланызын паза ниме-ноо сығарызын синдірбеске, бюджеттерге тöлеглер сині öскірілерге кирек.
Хакасияның істеніс паза социальнай арачыланыс министрі Владимир Чебодаевтің искіриинең, пӱӱнгі кӱнде республикада прай чуртағӌыларға хабазығ читірілче. Валентин Коновалов штаб араласчыларын регион капиталы чарадылғаннаң сығара öскірілбееніне хайығ айландырған. Ідöк аннаң тузаланар тусты хызырарға чарир теен ол. Оларны килчеткен дее чылдаң кирердеңер сағызынаң ӱлескен республика пазы. Пу алызығларны кирерінӌе ӱс кöстегліг министерство: финанстар, экономика тилізі, істеніс паза социальнай арачыланыс - республика бюджедінің оңдайларын паалир.
Ирткен чыылығда республика пазының орынӌызы Ольга Пономарева пірее предприятиелер тоғыстарын ӱр нимеске тохтаатчатхан сылтаанда, оларның тоғынӌыларынаңар сағыссыразынаң ӱлескен. Теестегі чыылығда Владимир Чебодаев тиксі республикада істеніс рыногындағы киректерні чарытхан.
- Пӱӱнгі кӱнде 2200 кізі тоғыс чох саналча алай тоғынӌаң чуртағӌыларның 1,3 проценті, чыл пасталғаннаң - 4000 кізі алай 1,7 проценті. Ирткен чылда кöрік айында тоғыс чох 8200 кізі саналған, 2021 чыл пасталарына - 16200 кізі. Тоғыс чохтар сині 3,5 процентке тиңнелген, 2021 чыл пасталарына - 6,4 процентке. Тоғыс пирчеткеннер пӱӱнгі кӱнде 6000 азыра тоғыс орнын сöлепчелер, - чарытхан Владимир Петрович.
Министерство чуртағӌыларның тоғыс чох халарын кӱннің хайығда тутча. Ол искіріг ідöк федеральнай ӱлгӱлерге искірілче. Тоғыс пирчеткен 59 идінӌектің 862 тоғынӌызы тоғыс чох халарға айабас, чыл пасталарына оларның саны 1146 кізее тиңнелген. Ол санда 634 кізі тоғыстаң сығардырар, 109 кізі толдыра кӱн тоғынминча, 119 кізі тоғыс тохтадылған сылтаанда істенмес. Тоғыс пирчеткен 13 предприятиенең, хайзылары 600 азыра кізіні тоғыстаң сығарарға пöгінче, чöптезіглер апарылча. Чонға тоғыс тапчаң кіннерде ідöк чуртағӌыларға искірігліг полызығ читірілче.
Валентин Коновалов тоғыс чохтар саны хайдағ предприятиелердең паза хайдағ сылтағнаң сығарылчатханнарын істезерге чахаан. Сағам, тізең, ол ööнінде кізілернің тоғыс орнын алыстырчатханнарынаң палғалыстығ тіп искірген Ольга Пономарева.
Оперштабтың халғанӌы сурии - чуртағӌыларның пос кирексіністеріне, ол санда пӱдірінерге, тиксі тыхтағ идерге, хазаа-сиден турғызарға ағас пилетирге праволарының чуртасха кирілчеткені ӱзӱрілген. Ööн искірігнең Хакасияның чир-чайаан ис-пайы паза экология министрі Владимир Лебедев чоох тутхан. Піс “Хакас чирі” газетада пу сурығны алғыда чарыдарбыс. Мыннаң кризистең тоғыр штабтың теестегі чыылии тоозылған.
Автор :
Наталья Субракова. Сом Хакасияның істеніс паза социальнай арачыланыс министрі Владимир Чебодаевти
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде