ЧИЛДЕҢ ТАБЫРАХ ЧӰГӰРГЕННЕР
25.05.2022
Хабарлар
Чӱгӱріс фестивальының чиңісчілері Денис ЧЕРТЫКОВ паза Артём ПОПОВ
Фестиваль. 22 майда Ағбанда «Чилдең табырах» чӱгӱріс фестивальы ікінҷі хати ирткен. Анда 1360 спортсмен кӱзін сынаан.
Хакасияда илееде кізі чӱгӱріске хынчаттыр. Анзын «Чилдең табырах» чӱгӱріс фестивальы киречіледі. Ол тынағ кӱннерінде Ағбанда ирткен. Марыға чон республиканың город-аймахтарынаң, Россияның пасха регионнарынаң чыылысхан. Араласчыларның санында ниик атлетикаӌа чоннар аразындағы класстығ спорт узы Наталья Аристархова (Хызылчар), спорт устары Денис Чертыков, Любовь Мордовина (Волгоград) полғаннар.
Фестивальның ӧӧн пӧгіні - чӱгӱріске хынчатханнарны піріктірері, чонны хазых чуртасха тартары. Аннаңар пас меетке прайзына сығар оңдай пирілген. Иң кічіглері - 4-5 частығ иркеӌектер - 500 метр чӱгӱргеннер. Улуғ арах палаларны 1000 метр дистанция сағаан. 3000 метр кӧп чон араласчатхан дистанция полтыр. Спортнаң тӧреміл айғасчатханнар 10 километрні тобырып кӱстерін сынааннар. Артыхтарның артығы чарым марафонға сыххан. Олар 21 километр чӱгӱргеннер.
Чӱгӱріс фестивальында кізілер сӧбіренең араласханнар. Ағбанның чуртағӌызы Олег Сандыков марыға Кирилл оолғынаң килтір. Хакас ирен чарғы приставы полып істенче, чииттең ниик атлетиканаң айғасча. Сӧбіреліг дее полза, ол хынчатхан киреен тастабинча. Пос тус кӧп арах полза, неделяда пис хати тренировка иртірчеттір, маңнанминчатса - пір хати. Кириллге 12 час, ол Ағбанның 1 № школазында ӱгренче. Оолағас ниик атлетикаӌа секцияа чӧрчеттір. Пабазы «Чилдең табырах» фестивальда 10 километр чӱгӱрген, оолғы - 3 километр.
Пас меетке улуғ ӧменең росгвардиядағылар сыхханнар. Хайди таныхтаан Росгвардияның Хакасияӌа управлениезінің физическай тимненісче устағӌызы Михаил Карамчаков, аймах марығларда олар тӧреміл араласчалар. Кӧзідімге, апрельде тоғынӌылар Илбек Чиңіске чарыдылған чӱгӱрісте постарын турыстыра кӧзіткеннер. «Чилдең табырах» фестивальда 10 артиинаң кізі кӱзін сынирға чаратхан. Анзы оларға чахсы тренировка полча.
Пылтырғызынаң тиңнестірзе, пӱӱл чӱгӱріс сидік оңдайларда иртті. 10 паза 21 километрге спортсменнер 30 градус ізігде чӱгӱргеннер. Фестиваль тӧстегӌілері, оларға полыс пирерге кӱстеніп, маршрутта суғ-чиистіг илееде пункт турғыс салғаннар. Че сынап араласчыларның кӧңнін «ағырчатхан» улус кӧдіртір. Кізілер тимнеен плакаттар, оларның хысхырыстары спортсменнерге кӱс хосханнар.
Чарым марафонда пістің Денис Чертыков чиңіс тутхан. Хайди таныхтаан чир-суғӌыбыс, тӧреен чирінде улуғ пас меетке сыхханынаң аарлығ ниме чоғыл. Ол пылтырох фестивальда аралазарӌых, че Марий Элда тағлығ чӱгӱрісче Россия чемпионадында узын сынаан. 2021 чылда чемпионатта Денис Чертыков алтын медальны холға кирген. 21 километрні хакас оол 1 час 8 минута аразына чӱгӱрібіскен. 10 километрге дистанцияны прайзынаң пурун Денистің арғызы Артём Попов тобырыбысхан. Ниик атлетикаа хынчатханнар аны чахсы таныпчалар. Спортсмен Пии аймаанаң, ағаа 20 час, ол спорт узына кандидат, Россияның піріктірілген командазына кірче. «Чилдең табырах» фестивальда аралазары - аның сағынған сағызы. Ағбанда узын кӧзіткеніне спортсмен ӧрінче.
Абахайлардаң чарым марафонда Любовь Мордовина иң чӱгӱрік полтыр. 24 частығ спортсмен Волгоград облазынаң. Амды марығларда пістің республика ӱчӱн турызар. Любовь тренер Максим Карамашевтің холында узын таптирға пӧгінче. Саарбахтардаң 14 частығ Алина Артонованы таныхтирӌыхпын. Ол 3 километрде ӱзінӌі орынға сыххан. Хакас хызыӌах ниик атлетикаӌа секцияа чӧрчеттір.
Артыхтарның артығын чеестеен соонда, чарғыӌылар частары хоостыра сыйыхтығ орыннарға сыххан спортсменнерні таныхтааннар. Чир-суғӌыларыбыстаңар чоохтаза, улуғларның аразында 10 километрде Аркадий Ултургашевнең Вера Самрина чиңіс тутханнар. Пастағы спортсмен саналығ чӱгӱрерінең айғасчаттыр. Ол марыға Асхыстаң ӧнетін килген. Аркадий Ултургашев пос туста тренажер залынзар чӧрче. Вера Дмитриевна «Хакасия» газетаның редакциязында ӧӧн редакторның орынӌызы полып істенче. Ипчі пу фестивальны иртірбинче тиирге чарир. Пылтыр ол, 10 километрні тобырып, азах меетке ідӧк иң пурун читкен. Оларның ӱчӱн чӱрекке поғдархас толған. Елена Тохтобина, Сергей Кичеев, Татьяна Баинова призерлар полыбысханнар. Кічіг Маргарита Чебодаеваны алынӌа таныхтирға кирек. Хызыӌах 500 метрні турыстыра чӱгӱрібістір. Ол 3 - 5 частығларның аразында ікінӌі орынға сыххан.
Тиксі алза, «Чилдең табырах» фестиваль пӧзік синде ирткен. Марығлардаң пасха, программада концерт, аймах ӱтертістер полғаннар. Таныхтирға кирек, фестиваль календарь планына киріл парған, ол тиксі Россия синіндегі марыға саналча.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы