ӀҶЕ-ПАБАА ПАЛАЛАРЫНЫҢ ПААРСАЗЫ КИРЕК
27.05.2022
Хабарлар
Сомда: Россияның саблығ артизі, Хакасияның чон артизі Татьяна МАЙНАГАШЕВА
Тун ойын. А.М.Топановтың адынаң Хакас драма театры «Амыр» ойынны кӧзітті. Ол Россияның саблығ артизі, Хакасияның чон артизі Татьяна Майнагашеваның пайрамнығ тӧреен кӱніне чарыдылған
Кӧрігӌілер залында чон тығырама чыылыс парған, пос орыннар даа кӧрінминче. Прайзы наа ойынны кӧріп аларға чидікпинче. Анда Татьяна Андреевна паза аның хонғаны, режиссёр, республиканың чон артизі паза Хакасия искусствозының саблығ деятельі Юрий Матвеевич Майнагашев хада ӧӧн рольларны толдырарлар нооза.
«Амыр» ойында частан парған ирепчінің паза оларның, ӧс парып, іӌе-пабазының чуртынаң «учух парыбысхан» палаларының хайызығлары кӧзіділче. Ачырғастығ, хаӌан іӌе-пабалар чуртас тооза прай хынызын паза кӱзін палаларына пир салып, хыйалға кір парзалар, пірдеезіне кирек чох пол парчалар. Ойында андағ сӧбіренің чуртазы чарыдылча. Постаң пис пала улуғлан парған, че ам даа чітіг сағыстығ, чадыға кірбеен іӌе-пабазына алғым чурттарында орын таппинча паза иң чағын кізілеріне хыртыстанча. Андағ даа полза, іӌе-паба палаларына ачынча, олар часкалығ ла чуртазыннар тіп сағынча.
Сизінгенде, залда одырчатхан полған на кӧрігӌее пу тема чағын. «Амыр» спектакльны харах чазы чох кӧрӌее чоғыл. Ипчілер хол пладынаң харах частарын сым-туюххан чысхлапчатханнар. «Пот, аннаңар пар ниме-нооны палаларға тооза пирерге чарабас, посха кӧмес артызарға кирегӧк», - улуғ тынып, хости одырчатхан ікі ӧӧренің чоохтасчатханы истілген.
Аға-ууӌа полып ойнапчатхан ӧӧн матырларның чылығ хайызығларын кӧрерге чӱрексіністіг полған. Олар удур-тӧдір тың айас-чалар, паарсасчалар. Оларның чӱректері дее пір тиң сабылчатханға тӧӧй пілдірген. Сынап таа, ӱр чыллар хада чуртап салза, ирепчі пір сағыс-кӧрістіг пол парча, неке.
Ойын соонаң алғыстас сӧстерін читірчеткенде, Асхыс аймаа пазы Абрек Челтыгмашев таныхтаан:
- Татьяна Андреевна «Алтынай» ипчілер лигазының устағҷызы полча. Олар чуртастың сидіксіністеріне кір парған сӧбірелерге полысчалар. Аннаңар Асхыс аймаанда иртчеткен мероприятиелерде Татьяна Андреевнанаң паза Юрий Матвеевичнең удаа тоғас парчабыс. Андада мин пу ынағ сӧбіре удур-тӧдір хайди чылығ хайысчатханын сизінчем. Пӱӱнгі спектакльда оларның сын чуртазынаң алылған ӱзіктерні кӧрдім.
Полған на ойынның алай киноның ӧӧн сағызы пар. «Амыр» спектакль пісті іҷе-пабабысха тузында хынарға, оларны хайраллирға ӱгретче. Хакас чонның кибірі пар - іҷе-пабаны очы оолғы кӧрерге кирек. Хомзынысха, амғы туста ол кибір чіт парир, анзы хомай. Залда одырып, ойын хайди тоозыларына тың сағыссыраабыс. Театрның артисттері рольларын чалтырама толдырыбысханнар, аннаңар прайзына улуғ алғызым читірчем.
Ідӧк Татьяна Майнагашеваны пайрамнығ тӧреен кӱнінең паза мындағ чахсы тун ойыннаң Хазна Думазының депутады Сергей Сокол, Хакасия правительствозының паза культура министерствозының кізілері, Пии аймаа пазы, кізі паза олған праволарынӌа уполномоченнайлар, ХакНИИЯЛИ-ның устағ-пастаа алғыстааннар.
- Мағаа хонғаным паза палаларым хаҷан даа пик чӧлег полчалар, аннаңар оларға пӱӱн улуғ алғызым читірчем. Ідӧк прай туған-чағыннарым паза арғыс-ӧӧрелерім чайаачы иирге килгеннері ӱчӱн тың ӧрінчем.
Таныхтирға сағынчам, Хакас драма театрында кӱстіг артисттер тоғынчалар. Пӱӱн миннең хада спектакльда ойнааннар: Хакасия искусствозының саблығ деятельі паза республиканың чон артизі Юрий Майнагашев, Хакасияның чон артизі Кирилл Султреков, республиканың саблығ артисттері Светлана Селигеева, Инна Майнагашева, Арлекин Толмачев паза чииттер Николай Бельтереков, Виктор Сагалаков, Наталья Албычакова, Камилла Кокова, Алиса Толмачева, Андрей Тюкпиеков, Александр Асочаков, Митхас Абдин. Спектакльны турғысхан режиссёр, Лермонтовтың адынаң драма театрының артизі Александр Израэльсон, - теен Т.А.Майнагашева.
Автор :
Татьяна ТЮТЮБЕЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы