ПАЙРАМНАҢ, "ХАКАС ЧИРӀ" !
01.06.2022
Хабарлар
Газетабысха - 95 чыл. Хакас Республиканың «Хакас чирі» газетазы 1 июньда 95 чылын таныхтапча
Ӱлӱкӱннең!
Прай чӱреемнең «Хакас чирі» газетаның тоғынҷыларын танығлығ кӱннең - изданиенің 95-ҷі чылынаң - алғыстапчам!
1 июньда 1927 чылда сыххан газета, андада «Хызыл аал» адалған, Минсуғдағы «Істеніс ӱлгӱзі» округ изданиезінің хозымы полып, чуртазын пастаан. Іди аның улуғ чолы пасталған. 95 чыл - ол килкім тус. Аннаң Хакасия чуртағҷыларының нинҷе-де тӧлінің чуртазы палғалысхан. Олар «Хакас чирін» кізілернің кирексіністеріне хайығ айландырчатханы, профессионализмі паза прай киректерні сын чарытчатханы ӱчӱн пӧзік паалааннар, ам даа паалапчалар.
Национальнай кибірлер республикаа улуғ туза ағылчалар. Хакасияның айдас культура ис-пайын хайди даа хайраллирға паза тилідерге кирек. Пу кирекке улуғ хозым итчеткен, тынағ пілбин, чахсы тоғынчатхан ӱчӱн «Хакас чирі» газетаның ӧмезін алғыстапчам.
«Хакас чирі» газетаның ӧмезіне тоозылбас кӱс, наа чидіглер алғапчам! Газета мыннаң мындар амғы туснаң тиңе, аарластығ чазына хайығ салбин, хаалап турзын! Хығырығҷылар аны сыбыра чидікпин сағып турзыннар!
В.О.КОНОВАЛОВ, Хакасияның пазы - Хакасияның Правительство кнезі
**************
«Хакас чирі» газетаның аарлығ ӧмезі!
Хакасияның Ӧӧркі Чӧбі адынаң сірерні танығлығ кӱннең - газетаның 95 чылынаң - алғыстапчам! Сірер хакас чонына пос тілінең чоох алысчаң издание полғазар паза ам даа полчазар. Амды, хаҷан «чонның худын» хайраллап аларға паза алнындағы тӧллерге тілні наа кӱснең кирерге киректелчеткенде, сірернің тоғызыңарны читіре паалабасха чарабас. Сірер ағаа прай кӱстеріңні паза тузыңарны чарытчазар.
Сірер хығырығҷыларыңа сыннаң чағынзар, кӱннің сай прай киректернің араласчызы полып. Чӱс чылға чағын туста газетаның страницаларында хакас тілі хайраллалча ла нимес, пістің Хакасиябыстың прай ирткен чолы, чуртағҷыларның ӱлӱзі, республиканың тархынына кір парған киректері чарыдылча.
Газета тӧстелгеннең сығара салыл парған чахсы кибірлерге тудынчатханыңар уғаа аарлығ. Газета хайди даа адалған полза, аның ӧмезінің тоғызында профессионализм, киректерні сын паза табырах чарытчатханы сыбыра пастағы орында. Амды саннығ СМИ-лар тиліпчеткен туста даа газетаны аның хығырығҷылары кирексіпчелер.
Сірерге журналистиканың пӧзік кӧстеглеріне - чоныбыстың паза Хакасиябыстың чуртазынаңар сынны чарыдарға - тудынарға алғапчам. Пик хазых, часка, чайаачы тоғызыңарда наа чидіглер сірерге!
В.Н.ШТЫГАШЕВ,
Хакасияның Ӧӧркі Чӧп кнезі
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде