ӦҢНЕН, «ХАКАС ЧИРІ»!
01.06.2022
Хабарлар
Алғыстапчабыс. Газетабысты хығырчатхан пірігіс устағҷылары, алынҷа хығырығҷылар улуғ пайрамнаң алғыстапчалар
Геннадий КАНЗЫЧАКОВ, Хакасияның спорт кӱрезі федерациязының президенті, Ӧӧркі Чӧп депутады:
- «Хакас чирі» газетаа 95 чыл толча. Ол пістің республикаа, чонға танығлығ кирек. Редакцияның ӧмезі, тӧреен тілібіснең материаллар сығарып, Хакасияда, Россияда паза тилекейде полчатхан киректердеңер тузында искірерге, толдыразынаң чарыдарға кӱстенче. Прай тоғынӌыларға пик хазых алғапчам, чайаачы кӧңнілерің пір дее сообазын.
Лариса ГИМАЗУТИНА, Хакасияньщ ӱгредіг паза наука министрі:
- «Хакас чирі» газетаның аарлығ ӧмезі! Чағдап килген пайрамнаң сірерні прай кӧңнібіснең алғыстапчабыс. Газетаның ӧмезі улуғ чол ирт парыбысхан паза амға теере тохтағ чох алнынзар хаалапча. Чир-суубыстағы киректер, кӱлӱк оңдайлығ кізілер хаӌан даа газетада чарыдылчалар. Ам даа республика газетазы, сым одырбин, наа оңдайларда тіспен тоғын парча.
Аарлығ газета тоғынӌылары! Орта чолны таап, алнынзар кибірли пазып одырыңар! Алғыс ползын тузалығ тоғызыңар ӱчӱн! Газета чох чуртас толдыра нимес, ол уғаа нандырығлығ паза кирек тоғыс. Сірерге пик хазых, амыр чуртас паза тӱзімніг тоғыс алғапчабыс!
Марина САГАТАЕВА, Н.Ф.Катановтың адынаң Хакас гимназия-интернаттың директоры:
- Аарлығ Радион Дмитриевич, «Хакас чирі» республика газетазының тоғынӌылары, ветераннары паза хығырығӌылар, прай чӱреебіснең алғыстапчабыс сірерні газетаның пастағы сығарызы сыхханнаң 95 чыл толчатханынаң!
«Хакас чирі» газетаның ӧмезі пӧзік пілізін паза журналист культуразын кӧзітче. Олар хығырығӌыларның хынызына, аарлазына турысчалар. Оларның санында гимназияны тоос-ханнар парына поғдархапчабыс!
Ӱгредіг киреенде паза олғаннарны ӧскірерінде кӧп чыл хада-пірге тоғынчатхан ӱчӱн чӧпсінізібіс читірчебіс. Газета сығарчатхан улусха чітіг сӧс, тоозылбас чайаачы сағыс, хынығ хабарлар паза улуғ тираж алғапчабыс! «Хакас чирі» газета ӧңнензін паза хығырығӌыларны чахсы хабарларнаң ӧріндірзін!
Кучен Ай Чарых Сайын, Хакасияның чон артизі, «Ӱлгер» ансамбльның хоос устағҷызы:
- «Хакас чирі» газета 95 чылын таныхтапча. Ол улуғ пайрам. Хабарӌылар, хакас тілін хайраллап, аны пайыдып, улуғ тоғыс апарчалар. «Ӱлгер» паза «Кӱн сузы» ансамбльларда 30 артист саналча, прайзы газетаа тӧреміл пазынча. Санапчам, хада-пірге тудынарға, удур-тӧдір хабазарға кирек. Редакцияның ӧмезіне тӱзімніг тоғынарға, хығырығӌыларны чайаачызынаң ӧріндірерге алғапчам. Хығырығӌылар саны хозылзын, тираж ӧссін.
Нина МАЙНАГАШЕВА, Хакасиядағы тіл, литература, тархын наука-істезігліг институттың директоры:
- Пайрамнығ кӱннең - хакас тілінең сыхчатхан газетабыс тӧстелгеннең 95 чыл толчатханынаң - сірерні чылығ алғыстапчам! Хоос литературабыс тилирінде газетаның тузазы уғаа улуғ, прай даа писательлер, кибелісчілер постарының пастағы тоғыстарын анда сығарғаннар. Ам даа газетаның ирткен чыллардағы изерістері, сын киречі полып, наука статьяларына киріл парчалар.
Анда тіл, литература, фольклор, этнография материалларын табарға чарир. Мыннаң мындар даа, аарлығ «Хакас чирі» редакция тоғынӌылары, ідӧк тӱзімніг тоғынып, чоныбысты ӧріндірерге, газетабысты алғыдарға, чайаачы тоғынып, пик хазыхтығ, часкалығ поларға алғапчам!
Светлана ОКОЛЬНИКОВА, Хакасияның культура министрі:
- «Хакас чирі» республиканың иң иргі газеталарының пірсі полча. Аны Хакасия чуртағӌылары хынып хығырча паза улуғлапча. Газетаның страницаларында пістің регионның тилізі чарыдылча. «Хакас чирі» хакас чонға республикадағы ӧӧн искіріглерні читірче.Тилекейде хакас тілінең чалғыс ла сыхчатхан газетаның тузазын паалаӌаа чоғыл! Аның тархыны хакас интеллигенциязының чуртазынаң пик палғалыстығ.
«Хакас чирінің» аарлығ тоғынҷылары, сірерні газетаның 95 чылынаң алғыстапчам! Тоғызыңар мыннаң мындар тилізін, кӱстіг проекттеріңні чуртасха тӱзімніг киріңер.
Чиит хабарҷыларзар айланчам. Улуғ ӱгретчілерің пирген чахсы кибірлерні узарадыңар, хакас тілін тилідер тоғысты турыстығ апарыңар.
Андрей ГОТЛИБ, Хакасияның чир-сун ӱгренҷең музейнің директоры:
- «Хакас чирі» республика газетазының ӧмезін пайрамнығ чылынаң алғыстапчам! Сірер улуғласнаң тузаланчатхан тоғысты толдырчазар, Хакасияның танығлығ мероприятиелерін чарытчазар, чуртағӌыларға хакас чонның тархынын паза культуразын читірчезер.
Республиканың иң иргі газетазы хакас чонның культуразын паза кибірлерін хайраллирынӌа искірігліг политиказын амғы тусха теере алыстырбаанын ӧрініснең таныхтапчам.
Газета ӧмезінің чайаачызы паза кӱзі хаӌан даа успазын!
Артур МАРЛУЖОКОВ, Хакасияның паза Алтайның саблығ артизі:
- «Хакас чирі» газетаны тӧреміл хығырчам. Республикада ниме полча, аалдағы чон хайди чуртапча пілерге кирек нооза. Ідӧк газета хакас тілін ундутпасха оңдай пирче.
Филармонияда хакас тілін улуғ хайығда тутчалар. Аны пілерге сағынчатханнарға неделяда ікі хати ӱгредіг апарылча. Курстарға орыс тоғынҷыларыбыс хынып чӧрчелер. Ізенчем, пола-пола олар «Хакас чирін» хығыр сығарлар. Аарлығ редакцияны тӧреен кӱнінең алғыстапчам, пик хазыхтығ, часкалығ полыңар.
Евгений САФЬЯНОВ, Таштыптағы 16 № училищеніц директоры:
- Таштыптағы 16-ӌы профессиональнай училищенің ӧмезі «Хакас чирінің» тоғынҷыларын улуғ пайрамнаң алғыстапча. Пу ирткен чылларға нинӌе чоох, очерк, статья хабарчылар холынаң сыхханын пірдеезі санабаан полар. Кӱннің сай «Хакас чирі» ӱлгӱ, халых чуртас, олаңай чуртағӌылар тоғызын, хайығда тудып, аннаңар маңнаныстығ пасча. Амды хакас хоос чооғы тіріге удаа истілбинче дее, андада піс газетаны, сухсаан чіли, ӧрініснең хығырарға маңзырапчабыс. Газета тоғынҷыларының чоллары азых ползын, пасчаң кӧңнілері тоозылбазын, хығырығӌылар саны уламох хозылзын!
Ағбан пилтірі аймаандағы хакас чонның улуғлар чӧбі:
- Республиканың чуртазы газетанаң пик палғалыстығ тиирге кирек. «Хакас чирі» газетаның тоғынҷылары тӧреен чирібістің тархынын кӱннің сай пасчалар нооза.
Хакас газетазы тӧстелгеннең пеер алызығлар кӧп полған - че ӧӧні хаӌан даа хал турча - анда республикадағы киректердеңер, пос чирінің тилізіне улуғ хозым итчеткен кізілердеңер тӧреміл пазылча.
Пӱӱнгі кӱнде «Хакас чирі» газета пістің республикадағы ӧӧн СМИ-ларның улии полча. Піс газета тоғынҷыларына мыннаң мындар чонны ідӧк ле ӧріндір турарға алғапчабыс. «Хакас чирі» хығырығӌыларға хаӌан даа тузалығ ползын, тиражы ӧссін.
Владимир ЧУСТЕЕВ, Хакас драма театрының директоры:
- 95 чыл мының алнында хакас тілінең «Хызыл аал» газета чарыхха сыххан. Аннаң сығара аның хайхастығ тархыны пасталыбысхан. Таныхтирға сағынчам, национальнай театрның тӧстегӌізі полған Александр Топанов, драматург Михаил Коков, поэт Василий Кобяков «Хызыл аал» газетаның пастағы номерлерін тимнирінде араласханнар. Олар газетаның страницалары пастыра чир-суғҷыларынаң чоохтасчаңнар. Газетаның тилізі ӱчӱн ӧріністіг. Аны Хакасияда ла нимес, ідӧк пасха регионнарда хығырчалар. Газета хығырығӌыларға хаӌан даа чахсы хабарлар ағылзын!
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде