АЗЫХ СУРЫҒЛАР - АЗЫХ НАНДЫРЫҒЛАР
03.06.2022
Хабарлар
Хакасияның чииттері регион пазы Валентин КОНОВАЛОВНАҢ чоох алысханнар
Тоғазығ. Олғаннарны арачылаҷаң чоннар аразындағы кӱнде, хайзы хазнада 1 июньда таныхталча, Хакасия пазы Валентин Коновалов республиканың пӧзік чидіглерге читкен ӱгренілерінең тоғасхан
ВАЛЕНТИН ОЛЕГОВИЧТІҢ ЧООҒЫНАҢ, ХАКАСИЯДА ТАЛАНТТЫҒ, ПОС ЧИРІ ӰЧӰН САҒЫССЫРАПЧАТХАН КӦП ЧИИТ ООЛ-ХЫС ЧУРТАПЧА. ОЛАРҒА РЕГИОН УСТАҒҶЫЗЫ РЕСПУБЛИКАНЫҢ ТИЛІЗІНДЕ ӦТКІН АРАЛАЗАРҒА АЛҒААН.
- Хакасияның паза хазнаның тилізінде сала ӧткін аралазарға кирек. Постарыңның алнында пӧзік пӧгіннер турғызыңар паза аны толдырарға кӱстеніңер, - айланған чииттерзер ол.
Тоғазығда Хакасияның 10 олғаны араласхан. Олар прайзы тиксі Россия паза чоннар аразындағы марығларның, олимпиадаларның чиңісчілері паза призерлары, халых чӧрімнернің ӧткін араласчылары полчалар. Тоғазығ ниик паза пос оңдайли ирткен.
Анда чииттер Хакасия пазынаң позынаңар паза аның тоғызынаңар кӧп сурастырғаннар. Кӧзідімге, 11 класстағы ӱгренӌі Анфиса Перевощикова Валентин Олеговичтең студент тузында регион устағӌызы поларға сағынған ма тіп сурған.
- Минің кӧрізімнең, хайдағ даа регион алай ба хазна устағҷызы пу тоғысха ӧнетін тимненмеен полар. Полғаны ла позының чуртас чолынча парған, тоғызында ӧскен, кӱстенген. Минің чуртазым, тізең, чиит тустаңох политиканаң палғалыс парған. Мин кӧп тоғынғам, сіренгем, іди чуртас чолым пу тоғысха ағылған. Оӧні - ол пос киреене, тоғызына хынары. Андада кізінің прай киректері, пастағлары килізер, - таныхтаан чооғында регион пазы.
Ӱгренӌілерге ідӧк чапсых полған піліп аларға Валентин Олеговичтің хынған предметтерінеңер.
- Школа тузында мин тархын, алгебра, обществознание, литература предметтерге хынҷаңмын. Хоостирға ла кӧңнім пірдее чатпаҷаң. Сіліг хоостап полбаҷаңмын, сырларнаң, кисточкаларнаң чахсы тузаланмаҷаңмын, - кӱлініп, чоохтаан ол.
Н.Ф.Катановтың адынаң национальнай гимназия-интернаттың ӱгренӌізі Александр Захаров Хакасия пазы Валентин Коноваловтың Болонскийнің ӱгредіг системазын алыстырардаңар паза пірге хазна сыныхтағларының кирексінізінеңер пос кӧрізін искір пирерге сурынған. Ікінӌі сурығ хоостыра Валентин Олегович ЕГЭ кирек тіп таныхтаан.
- Пірге хазна сыныхтағлары кирілгенде, ӱгредіг киреенде коррупция чох иділген алай хызырылған. Ідӧк ол хайдағ даа регионда, город-аалда чуртапчатхан олғаннарға пӧзік ӱгредіг заведениелерінзер кіріп аларға чахсы оңдай пирче.
Болонскийнің ӱгредіг системазы кирілгені хомай нимес тіп санапчам, че, андағ даа полза, Россияа совет тузындағы ӱгредіг системазы килістіре. Ол иң кӱстіг полған. Минің кӧрізімнең, аны хатап, айландырып, амғы чуртасха килістіре тимнирге кирек, - нандырған ол.
Мынынаң Александр Захаровтың сурығлары тоозылбаан.
- Регион устағӌызы полчатхан кізі хайдағ хылыхтығ поларға кирек?
- Регион пазының тоғызы уғаа нандырығлығ, аннаңар ол законнарны пілерге, ол-пу сурығларны прай саринаң тӱптестіріп, орта чарадығ аларға кирек. Ідӧк ӧӧн хылииның пірсі - ол турғысхан пӧгінге чидері. Хайдағ даа пастыхтың алай ба устағҷының пу хылии поларға кирек, - таныхтаан Валентин Олегович. - Сірер, Александр, спортта хайдағ хылых ӱчӱн тиксі Россияда пӧзік чидіге читкезер?
- 9 паза 10 класстарда ӱгренчеткенде, мин призер ла полғам, че чиңіс тударға кирек тіп сағын салғам. Іди пӱӱл мин чиңісчі полыбысхам, - нандырған чиит спортсмен.
Хакасия пазы Валентин Коновалов Александр турғысхан пӧгінге чидерге кӱстенчеткенін махтаан паза мыннаң мындар мындағох хылыхтығ поларға алғаан.
Пу сурығлардаң пасха, чииттер национальнай политикаа, спорт паза культура тилізіне, наукаа паза даа пасха сурығларға теелчеткен темалар кӧдіргеннер.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде