ААЛДАҒЫ ЧУРТАС ГОРОДТАҒЫЗЫНИНАҢ ХАЛБАСХА КИРЕК
08.06.2022
Хабарлар
Асхыс аймааның ӧӧн имнег туразының медсестразы Ольга ЧЕБОДАЕВА оолағынаң хада квартира клӱзін
Хакасия пазы Валентин КОНОВАЛОВТЫҢ холынаң алды
Наа пӱдіріглер. Хакасияның пазы Валентин Коновалов тоғыс чорығынаң Асхыс аалзар пар килген. Анда чуртасха кирек социальнай объекттер пӱдірілчелер паза азылчалар
ИРТКЕН ПЯТНИЦАДА АСХЫСТА ААЛДАҒЫ СПЕЦИАЛИСТТЕРГЕ ПӰДІРІЛГЕН РЕСПУБЛИКАДАҒЫ ПАСТАҒЫ КӦП КВАРТИРАЛЫҒ ТУРА АЗЫЛҒАН. НАА ЧУРТ «ААЛЛАРНЫҢ ТИКСІ ТИЛІЗІ» ХАЗНА ПРОГРАММАЗЫ ХООСТЫРА ФЕДЕРАЛЬНАЙ, РЕСПУБЛИКА ПАЗА ОРЫНДАҒЫ БЮДЖЕТТЕР АХЧАЗЫНА ПӰДІРІЛГЕН. АНЫҢ ТИКСІ ПААЗЫ - 126,5 МИЛЛИОН САЛКОВАЙ.
Тура ікі секциядаң пӱтче: 44 квартира хазых хайраллиры системазының, ӱгредіг паза аал хонии специалисттеріне кӧрілген. Халған квартиралар аймахтың чурт кирексіпчеткен чуртағӌыларына пирілер.
Хакасияның пазы Валентин Коновалов наа тураның пастағы чуртағӌыларына клӱстер читірген.
- Аалдағы чуртас городтағы чуртастаң пасхалалбасха кирек. Аалны истіг ит саларға кирек, кізілер мында тоғынарға, сӧбірелер тӧстирге паза палаларын ӧскірерге хынар ӱчӱн.
Пӱӱн федеральнай кіннің кӱстіг хабазии сылтаанда андағ оңдай азылча, - таныхтаан регион устағӌызы. - Аарлығ арғыстар! Сірерні наа чуртха кірчеткенінең алғыстапчам! Чуртыңар истіг паза чылығ ползын, сӧбіредегі чуртас чахсы парзын!
2022 чылда Асхыс аалда пір саңай ӱс социальнай объект пӱдірии пасталған. Хакасия пазы тоғысчы чорых тузында оларда тоғыстар хайди парчатханын сыныхтаан. Олғаннарға паза чииттерге кӧп функциялығ культура-ӱгредіг кінін пӱдіреріне контракт иділ парған. Ол «Аалларның тиксі тилізі» проект хоостыра пӱдірілер. Турада олған искусство школазы паза чииттер кіні орнығар. Тоғыстарны 2023 чылның декабрьында тоос саларға пӧгінчелер.
Ідӧк 825 орынға тиксі ӱгредіг школазының пӱдірии пасталған. Пӱӱл пастағы хадылны пӱдір салары, чылығ паза суғ пирӌең сетьтерні тартары, школазар парӌаң чолларны паза машина турғысчаң орыннарны пӱдіріп пастиры кӧрілче. Тоғыстарны тоозары 2024 чылға кӧріл парған.
Паза Асхыста наа олған поликлиниказы пар полар, сменада 200 кізіні кирер оңдайлығ. Ол учреждение «Россия Федерациязының хазых хайраллирының пастағы имнег полызиин пирӌең имнег учреждениелерін нааӌылиры» федеральнай программа хоостыра пӱдірілче. Поликлиника постың ізіктерін олғаннарға 2024 чылда азар.
- Хакасия правительствозы аал хониин паза аймахтарның инфраструктуразын тилідеріне алынҷа хайығ салча, - таныхтаан Валентин Коновалов. - Ол кӧстег регионның чуртас-экономика тилідерінде ӧӧннернің пірсі полча.
Автор :
Хакасия пазының паза Хакасия правительствозының пресс-службазы
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде