ПОС ТІЛІН ПІЛЧЕТКЕН АРТЫХТАРНЫ СЫЙЫХТААННАР
08.06.2022
Хабарлар
Тіл олимпиадазында чиңіс тутхан ӱгренҷілер паза оларның ӱгретчілері
Ӱгредіг. Хакасияда регионнар аразындағы тӧреен тіллерҷе олимпиадада сыйыхтығ орыннар алған олғаннарны таныхтааннар
Сибирьнің паза Ыраххы Востоктың тӧреен тіллерӌе регионнар аразындағы олимпиада пӱӱл пастағызын на ирткен. Хакасия ады ӱчӱн М.И.Боргояковтың адынаң хакас тілінӌе паза литературазынӌа олимпиаданың 10-11 класстағы 16 чиңісчізі паза призеры турысхан.
Регионнар аразындағы олимпиадада чиңісчі полыбысханнар: Маргарита Сербигешева паза Ксения Сагатаева (Асхыстағы лицей-интернат, 10
класс), Аима Боргоякова паза Сабетр Мамышев (Н.Ф.Катановтың адынаң национальнай гимназия-интернат, 11 класс).
Диплом алған ӱгренӌілерзер Хакасия пазының орынӌызы Ольга Пономарева айланған:
- Аарлығ ӱгретчілер паза олғаннар! Сірер регионнар аразындағы олимпиаданың пастағы араласчылары полчазар! Сірернің чидіглерің Хакасияа чахсы салтар! Пу олимпиада таңдағы профессия таллирында хоза баллар пирче. Алғыстапчам сірерні, - айланған чииттерзер Ольга Игоревна.
Н.Ф.Катановтың адынаң национальнай гимназия-интернаттың ӱгренӌізі Аима Боргоякова таңдағы профессиязын хакас тілінең палғалыстырарға пӧгінче. Ол тілні істезерге сағынча.
- Мындағ мероприятиелерде араласханы уғаа кирек паза тузалығ. Мин мыннаң мындар хакас тілін не нимес, пасха даа тӱрк тіллерін істезерге сағынчам. Тӧреен тілімнең кічігдең ала чоохтасчам, - таныхтаан чооғында Аима Боргоякова.
Олимпиадада Алтай, Бурятия, Саха (Якутия), Татарстан, Тува, Хакасия республикаларның паза Кемеров облазының 136 олғаны араласхан.
Автор :
Марина СЕРГЕЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде