СПОРТНАҢ ӦТКІН АЙҒАСЧАТХАННАРНЫҢ МАРИИ
08.06.2022
Хабарлар
Марығар чиңісчілерін сыйыхтапчатхан туста
Спартакиада. Ирткен пятницада республикадағы имнег тоғынҷылары Ағбанда, спартакиадада аралазып, кӱстерін спорт марығларында сынааннар
Хакасиядағы хазых хайраллиры тоғынӌыларының спартакиадазы Ағбанда «Локомотив» стадионда ирткен. Аны пайрамни азарында араласхан республиканың хазых хайраллаӌаң министрі Олег Ананьевский.
- Имнег тоғынӌыларының кибір хоостыра иртірілчеткен спартакиадазы республикада коронавирус наа чуғынҷах ағырығ пандемиязы сылтаанда ікі чыл иртірілбеен. Аннаңар ізенчем, спорт сынағлары ӧрініс сыйлир. Пӱӱн 21 команда марығласча. Анзы уғаа чахсы паза танығлығ кирек, - айланған имнег тоғынӌыларынзар министр.
Спартакиаданың программазынзар 10 спорт кӧрімі кирілген: дартс, эстафета, волейбол, мини-футбол, стритбол, шахмат, узунға сегірері, скакалка паза пасхазы даа.
Пӱӱл пу арға-мӧрійде, ӧӧн сыйыхты холға киріп, чиңісчі полыбысхан Ағбандағы табырах имнег полызии станциязының ӧмезі. Ікінӌі орынға Г.Я.Ремишевскаяның адынаң республиканың имнег туразының тоғынӌылары турысханнар. Ӱзінӌі орынға сығып алған Асхыс аймааның ӧӧн имнег туразының ӧмезі.
Ағбандағы табырах имнег полызии станциязының ӧӧн имӌізі Айвар Кольчиков пу арға-мӧрійде позы ӧткін араласхан. Ол, сағызынаң ӱлезіп, таныхтаан:
- Пістің командада 40 кізі араласхан. Спартакиадаа пір ай артиинаң тимненгебіс. Ӧмеде ӧӧнінде чииттер кӱстерін сынааннар. Командабыста чахсы ла салтарға чидеріне кӧстег иділген. Харбазарға чайалған кӧңнібіс чиңіс тударға полысхан. Піске, чиңісчілерге, сыйыхха «Спортмастер» садығ туразының паза пейнтбол клубының сертификаттары пирілген.
Республикада спартакиада 19-ӌы хати иртірілді. Аны иртірерге ӧткін хабасчалар Хазых хайраллаӌаң тоғынӌылары профсоюзының Хакасиядағы пӧлии, республиканың хазых хайраллаӌаң, физическай культура паза спорт министерстволары.
Кибірге киріл парған мероприятиенің ӧӧн пӧгіннері - имнег тоғынӌыларын физическай культуранаң айғастырары, ӧмелерде физкультура-хазых пиктирінӌе, спортнаң айғазарынӌа тоғысты чахсыландырары, хазых полар ӱчӱн физическай культураның оңдайларынаң алғым тузаланары, физическай культурадаңар паза спорттаңар чарыдығлығ тоғыс апарары.
Автор :
Валерия АГАФОНОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы