РОССИЯ КӰНӀНЕҢ, ААРЛЫҒ ЧИР-СУҒҶЫЛАРЫБЫС!
10.06.2022
Хабарлар
12 июньда — Россия кӱні
Аарлығ чир-суғӌылар паза Хакасия аалӌылары! Хакасия Правительствозы паза Ӧӧркі Чӧбі адынаң алғыстапчабыс сірерні хазнаның ӧӧн ӱлӱкӱнінең - Россия кӱнінең!
Пу ӱлӱкӱн Россияның кӧп нациялығ чоны пірге паза сидіксіністер алнында тӧдір пазынмас хылыхтығ полчатханын кӧзітче. Пӱӱн, хаӌан Россияа амғы тустың оой нимес хығыртығларына нандырарға килісче, піске полғаныбысха ла илбек хазнабыснаң пірге поларға киректелчеткенін оңарарға кирек. Пістің тиксі тархыныбыстың кӧзідімнері пір ле хати киречілебееннер: сидіксіністер пістің чонны улам кӱстіг итчелер.
Піске чуртаста ӧӧн кӧстеглер ідӧк Чир-суубысха хыныс, палалардаңар паза іӌе-пабалардаңар сағыссырас, амыр чуртасты хайраллиры паза тыыдары халып одырзын.
Аарлығ арғыстар, сірерге хазых, чидіглер паза сӧбіреде чахсы чуртас алғапчабыс! Ӱлӱкӱннең!
В.О.КОНОВАЛОВ, Хакасияның пазы - Хакасияның Правительство кнезі
В.Н.ШТЫГАШЕВ, Хакасияның Ӧӧркі Чӧп кнезі
РОССИЯ КӰНІ ПІСТІҢ ХАЗНАНЫҢ ӦӦН ӰЛӰКӰНІ ПОЛЧА. 12 ИЮНЬДА 1990 ЧЫЛДА РСФСР-ның ЧОН ДЕПУТАТТАРЫНЫҢ ПАСТАҒЫ СЪЕЗДІНДЕ РОССИЯ ФЕДЕРАЦИЯЗЫНЫҢ ХАЗНА СУВЕРЕНИТЕДІНЕҢЕР ДЕКЛАРАЦИЯ АЛЫЛҒАН. АНДА ӦӦН ЗАКОН КОНСТИТУЦИЯ ПОЛЧА ТІП ЧАРЛАЛҒАН, ІДӦК ХАЗНАНЫҢ НАА АДЫ ЧАРАДЫҒА АЛЫЛҒАН - РОССИЯ ФЕДЕРАЦИЯЗЫ. ОЛОХ КӰНДЕ 1991 ЧЫЛДА РОССИЯНЫҢ ПАСТАҒЫ ПРЕЗИДЕНТІНЕ ТАБЫҒЛАР ИРТКЕН, ОЛ ТАБЫҒЛАРДА БОРИС ЕЛЬЦИН УТЫП АЛҒАН.
12 июнь ӱлӱкӱн чіли пістің хазнада 1992 чылдаң сығара таныхтал сыххан, Россия Федерациязының Ӧӧркі Чӧбі аны «Россияның хазна суверенитедінеңер Декларация алылған кӱн» тіп таныхтирдаңар чарадығ алған соонаң. 1998 чылдаң ӱлӱкӱн амғы адынаң адал сыххан. Борис Ельцин чонзар айланызында ӱлӱкӱн адын Россия кӱніне алыстырыбызарға чӧп кирген. Че пу ат ӱлӱкӱнге официально 1 февральда 2002 чылда ла пирілген.
Россия кӱні пістің хазнада алғым таныхталча. Аймах митингтер, концерттер иртче.
Халғанӌы чылларда, тізең, аны таныхтирға чон кӧптең кӧп чыылча. Пу ӱлӱкӱн илбек Россияның аймах нациялығ, аймах киртіністіг чонын піріктірче, піс пір чон полчатханыбысты кӧзітче. Амғы оой нимес туста, хаӌан Россиядаң тоғыр аймах-пасха санкциялар кирілче, хазнабыстың экономиказын тізекке тӱзірерге кӱстеністер иділче, пістің чонға улам пірге тудынарға кирек.
Хаӌан-да пістің паба-ағаларыбыс, іӌе-ууӌаларыбыс, ідӧк пірге полып, Чир-суубысты фашист Германиязынаң арачылап алғаннар паза Европа хазналарын ыырӌы холынаң позытханнар. Пӱӱн ол тархынны алыстырарға, СССР-ның хозымын тӧбін тӱзірерге кӱстенчелер. Че сынны хыйа ит полбассың, ол Европа хазналарының кӧбізі пістің улуғларыбыстың махачызы ла сылтаанда фашизм холынаң позып алған.
Пӱӱн дее пістің ооллар, Украинадағы ӧнетін чаа операциязында аралазып, пазын хатап кӧдірчеткен фашизмнең тоғыр кӱресчелер, чуртастарын пирчелер.
Россияның кӱзі чон пірге полғанында, анзын илбек хазнабыстың тархыны пір ле хати киречілебеен. Анзын амғы тӧлге ундирға чарабас.
Ӱлӱкӱннең прайзын!
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде