ДАЧАДА ЧОЛ ТЫХТАЛАР
10.06.2022
Хабарлар
Хакасия пазы Валентин КОНОВАЛОВ паза Ағбан городтың пазы Алексей ЛЁМИН чоннаң тоғасчалар
Тоғазығ. Хакасия пазы Валентин Коновалов пу кӱннерде Ағбан город хыриндағы «Орбита» дача аймаанда чуртапчатханнарнаң тоғасхан
Пу чорых чыылиинда ідӧк араласхан Ағбан городтың пазы Алексей Лёмин. Устағӌылар «Орбита» дача аймаанда Главнай орамадағы иргі асфальттығ чолны тыхтир сурығны ӱзӱргеннер. Анда чуртапчатхан кізілер дача тураӌахтары аразындағы чоллар уғаа хомайдаңар ӱлгӱдегілерге хаӌанох хоптанӌаң полғаннар. Мының алнында анда «Энергетик» дача ээлерінің пірігізі тоғынған. Ол андағы чуртағӌыларның сурыныстары хоостыра сидіксіністерні пӧкчең. Амды ол пірігіс тоғынминча, аннаңар кізілерге пос оңдайынӌа пастыхтарзар айланарға килісче.
Хакасия пазы Валентин Коновалов оларға садоводтар пірігізін хатап тӧстирге чӧп пирген. Андада республика правительствозы оларға гранттар пастыра чахсы полыс пир турарӌых.
Пу тоғазығда Хакасия пазы паза Ағбан городтың устағӌызы Главнай орамадағы чолны август ай тоозылғанӌа нааӌылабызарға чӧптес салғаннар. Республика правительствозы ол кирекке 10 миллион салковайға дотация пирер. Ол ахчаа 1,1 километр чол тыхталар. Пасха чолларда город пос ахчазына тыхтағ тоғызын апарар.
Чоохтирға кирек, Хакасия правительствозы дачалар пірігістеріне тӧреміл полызығ пирче. Іди 2020 чылда - 5 миллион салковай, 2021 чылда - 10 миллион салковай паза пӱӱл республика бюджедінең 12 миллион салковай позыдылча. Олар прайзы гранттар пастыра пирілчелер. Ӧӧнінде ол ахча суғ паза чарытхы пиреріне, чоллар тыхтирына паза саайлардаң арачылирына хорадылча.
Автор :
Илья ТОПОЕВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде