СОЦИАЛЬНАЙ ТОҒЫНҶЫЛАР - ААРЛАСТА
10.06.2022
Хабарлар
Лидия ТРОЯКОВА
Сыйыхтас. Республика правительствозының туразында хазна сыйыхтарына турысхан социальнай тоғынӌыларны чеестееннер
Алындағы кӱн, Социальнай тоғынҷы кӱні таныхталчатханда, пу сферада тӱзімніг істенчеткен улусха сыйыхтарны Хакасия пазы Валентин Коновалов читірген. Пӱӱл хазна сыйыхтарынаң иң чахсы 22 тоғынҷы таныхтатхан.
Валентин Коновалов, оларны профессия ӱлӱкӱнінең алғыстап, таныхтаан:
- Сірерні Социальнай тоғынҷы кӱнінең алғыстапчам. Ол - республикаа паза хазнабысха уғаа кирек полчатхан профессия. Сірер арачылағ кирексіпчеткен чуртағҷыларға полысчазар - кӧп палалығ сӧбірелерге, ветераннарға, кинектерге паза пасхазына даа. Профессияңарда аллығ чӱректіг, пик паза полысхах хылыхтығ, кізілернің ӧрініс-чобағларынаң ӱлес поларға, чонға паза айғасчатхан кирекке хынарға киректелче. Анзы, кізілердеңер кӱннің сай сағыссырап, полызарға кӱс пирче. Сірер прайзыңар улуғ профессионал полчазар. Сірерні, пістің правительствоның адынаң паза позымның чылығ сӧстерін читіріп, ӱлӱкӱннең алғыстапчам. Пик хазыхтығ, часкалығ, сӧбіреңерде чахсы чуртас ползын.
Ідӧк ол чооғында таныхтаан, пӱӱнгі кӱнде пістің хазнаның экономиказында сидіксіністер пар. Мындағ сидік туста социальнай тоғынҷыларға даа хоза аар-чӱк артылча. Че ізеніс пар, олар аны тобыр поларлар. Ӱлгӱдегілер чонға аар туста, хоза полызығ пиріп, хайди даа хабазарлар, че анзын ідӧк социальнай тоғынҷылар пірге тудынып толдырарлар. Прай кӱс салып тоғынчатханнары ӱчӱн алғызын читірген.
Анаң Валентин Коновалов, социальнай сферада тіспен істеніп, аның тилізіне хозым итчеткен тоғынҷыларны сыйыхтаан. Ол пӧзік хазна сыйиин - «За заслуги перед отечеством» II степеньніг орденнің медальын - Ағбандағы ветераннар пансионады пірігізінің директоры Владимир Злаказовха читірген. Владимир Иванович пансионатнаң илееде чыл устап парир, анда 1988 чылдаң директор полча. Алында кинектернің паза улуғ частығларның тура-интернадында имҷі полып істеніс чолын пастаан, соонаң анда пӧлік устағҷызы полған. Ідӧк ол Хакасияның Ӧӧркі Чӧбінің депутадына пір ле хати табылбаан.
Россияның істеніс паза социальнай арачыланыс министерствозының Аарластығ пічиинең ікі кізі таныхтатхан. Олар - Саяногорсктағы олған реабилитация кініндегі ӱгретчі-организатор Ольга Степанова паза Тойымдағы психоневрология интернадының медсестразы Нина Корнева. Пуох министерствоның алғыстас пічиинең сыйыхтатханнар: республикадағы «Теремок» олған тура-интернадындағы ӧӧн медсестра Лариса Арзамасова, Тойымдағы психоневрология интернадында пациенттер соонҷа кӧрчеткен тоғынҷы Елена Ломаченко, республиканың чонға тоғыс тапчаң кініндегі пӧлік пастығы Наталья Булгакова.
Пасхазы Хакасия правительствозының Аарластығ паза алғыстас пічіктерінең сыйыхтатхан. Оларның санында - республиканың саарбахтарнаң тоғыс апарчатхан социальнай реабилитация кіні директорының орынҷызы Лидия Троякова.
Ол чахсы тоғызы ӱчӱн аймах-пасха сыйыхтарнаң пір ле хати таныхтатпаан. Ол санда Россияның істеніс паза социальнай арачыланыс министерствозының Аарластығ пічиинең сыйыхтатхан.
- Мин Асхыс аалда олған садының устағҷызы полғам. Ол 1994 чылда октябрьда чабыл парған. Анаң 1995 чылдаң Асхыста азылған олған социальнай реабилитация кінінең устап сыххам. Андада кін чабылған олған садының туразында тиксі тыхтағ тоғыстары соонаң азылған. Пу тураны тыхтирында паза анда кін азарында позым ӧткін араласхам. Соонаң кін, Кызлассар кӧзіріліп, анда орных сыххан. Ол «Уйаҷах» адалған. 2015 чылда аны Харатаста орныхчатхан реабилитация кінінең піріктірібіскеннер, амды пу учреждениенің филиалы полып тоғынча.
Аннаң ам даа мин устапчам, іди 27 чыл тоғын парирбын. Оңдай полғанда, пістің ӱлӱкӱнібіснең алынҷа алғыстабызарға сағынчам тоғынҷыларыбысты воспитательлер Любовь Боргоякованы, Ирина Сапронованы. Ідӧк маңат тоғын парчалар Надежда Пакачакова, Ольга паза Зинаида Майнагашевалар, Галина Бурнакова паза даа пасхазы. Чоохтирға сағынчам, пісті, социальнай тоғынҷыларны, піди улуғлап, пӱӱн сыйыхтар пирген ӱчӱн уғаа ӧріністіг. Піди пісті улуғлапчатхан, пеер, правительство туразынзар, хығырған ӱчӱн ӱлгӱдегілерге алғызым читірчем, - ӧрчіліг чоохтаан Лидия Ивановна.
Пу тоғазыға чыылысхан улусха республикада тоғынчатхан социальнай кіннернең, учреждениелернең таныстырчатхан видеоролик кӧзіділген. Паза Ағбандағы ветераннар пансионады тоғынҷылары, скрипканаң ойнап, сарын ырлап, чайаачыларынаң ӧріндіргеннер. Халғанҷызынзар, кибір хоостыра, сыйыхтатхан чон Хакасия пазы Валентин Коноваловнаң хада сомға суурынған.
Автор :
Инора БОРГОЯКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде