Сорығдағы ГОК-тың тоғызы тохтабас - Хазна Думазында закон проектi алылған
10.06.2022
Хабарлар
Россияның Хазна Думазы налог законодательствозынзар алызығлар кирчеткен закон проектiн пастағы хығырығда алыбысхан. Закон проектiнде ол санда чир алтындағы ис-пайны анирынӌа налог алызығлары кирiлче. Кöзiдiмге, молибден паза чис пар руданы аныпчатса, НДПИ-ӌе налог вычеды кирiлче. Сорығдағы ГОК, тiзең, пiстiң хазнада молибден аныпчатхан чалғыс предприятие полча.
Наа закон ӱчӱн 332 депутат (79,1%) ӱнiн пирген.
Таныхтирға кирек, Россия ӱлгӱлерi 2021 чылдаң пасти молибденнi паза вольфрамны анирына НДПИ ставказын 3,5 хати öскiрiбiскеннер. Iдöк металларға экспорт пошлиназы кирiлген. Мындағ улуғ налогтар предприятиелернiң тоғызын парыстығ нимес иткен. Кöбiзi чабыларына чит парғаннар.
Хакасия пазы Валентин Коновалов металлургия продукциязының алынӌа кöрiмнерiне экспорт пошлиназын алыстырар сурығӌа Россия президентi Владимир Путинзер айланған.
- Пiс федеральнай кiнзер молибденге экспорт пошлиназы öскiрiлчеткенiн чох идерге паза городтарға ööн тоғыс пирчеткен предприятиелерге хазна хабазиин пирерге сурыныснаң айланғабыс, - 2021 чылның сентябрьындох чоохтаан полған Валентин Коновалов соцсетьтердегi страницаларында. - Россия правительствозы, пiстiң айланысты кöрiбiзiп, ферромолибденге хазнадаң сығара тартчаң пошлинаның ставказын нульлығ ит саларға чарадығ алған. Ол ниме ГОК паза Сорығдағы завод тоғызын узарадарын таныхтапча, предприятиелернiң прай тоғынӌыларына тоғыс орны хайраллал халар.
Налог вычедiн киргенi Сорығдағы ГОК-тың экономика сидiксiнiстерiн пу чағын чылларға пöгер. Эксперттер таниинаң, пу сурығны пöгерiне ол санда республика правительствозының федеральнай ӱлгӱлерзер кöп саннығ айланыстары хабасхан.
Автор :
Тимнеен Альберт Толмашов
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде