ЧОН ХЫЙАЛЛАНМАЗЫН!
15.06.2022
Хабарлар
Кӱн сурии. Хакасия пазы Валентин Коновалов «Аэросити-2000» регион операторынаң устапчатхан «РИИР ИНВЕСТ» компания кізілерінең тоғасхан
Кӱн суриина сӧп-сапты сығарарынӌа пӱӱнгі кӱннің сидіксіністерін пӧгері сығарылған.
- Сидіксіністер пар. Оларны пӧгерге кирек. Чуртағҷылар хоптары муниципальнай пӱдістер устағҷыларына, правительство адына, минің адыма кірчелер! Сӧп-сап неделялардаң сығарылбинча! Сірер законда кӧрілген санитар-эпидемиология кирексіністерін сайбапчазар. Олох тусға чуртағҷыларнаң чоохтазарға ынабинчазар. “Ізіг линия” тоғызын толдырбинча, ол тоғысты иптирге кирек! Муниципальнай пӱдістернең палғалысты тыыдыңар, - хатығ чоохтанған республика пазы.
Таныхтирға кирек, сӧп-сап сығарары регионда чарадылған пис участокта аймах оңдайнаң апарылча, че улуғ городтарда, Ағбан паза Харатас осхас, ол иптел парған полған. Хосхар паза сілкер айларында, тізең, чуртағӌылар сӧп-сап толдыра ӱӱлген контейнерлерні кӧр турғаннар. Андағ кирекке чуртағӌылар удаадаң удаа тоғас сыхханнар. Ағаа хоза, регион операторына хоптанза даа, сӧп-сап сығарылбин турған. Хайди ол кирекке хайығ салбассың?! Ам чайғы, ізігде сӧп-сапха чыс табырах хаапча.
Хакасия пазы регион операторының Москвадағы устағӌыларынаң сидік сурығларны пӧгер оңдайларӌа нандырығ сағаан, че ӧӧн директор Таисия Пыжова ибіре чӧрген, турғысхан сурыға нандырығ пирбеен.
- Пӱӱнгі сидіксіністерні хандых айының 15-чі кӱніне теере пӧгібіспезер, піс регион операторын алыстырарынҷа тоғысты пастирбыс, - теен Валентин Олегович.
Тоғазығ салтарларынӌа республика пазы Валентин Коновалов хабарӌылар сурығларына нандыр пирген. Ол чыылығда регион операторы сӧп-сапты 2-ӌі участоктаң, Ағбан паза Харатас городтардаң, сығарарынӌа прай сидіксіністерні кӧрілген тусха пӧгібізерге молӌаанын таныхтаан.
Че сурығлар пӧгілбин халза, Хакасия правительствозы, ікінӌілебин, пу компаниянаң анымӌохтазар. Ідӧк Хакасия правительствозы муниципальнай пӱдістерні сӧп-сап чығӌаң орыннарның санын, адрестерінең хада тимнирге киректеен, олар пӱӱнгі тусха теере регион операторының чоғыл осхастар, салтарында ол сӧп-сапты сығарарынӌа сидіксіністерге ағылча.
Регион операторы таниинаң, Ағбан городта пір подрядчик алысхан сылтаанда сӧп-сап чығӌаң тимір контейнерлер пластик контейнерлерге алыстырылғаннар.
Чоохтирға кирек, подрядчиктер марии чылда пір хати иртірілче. Ол федеральнай чарадығларда кӧріл парған. Пӱӱл сығысхан сидіксіністерні регион операторы подрядчиктер алысханынаң палғалыстырча, че республика пазының кӧрізінең, андағ алызығлар чуртағӌыларға пілдіртпеске кирек, уламох оларны хыйаллабасха! Чуртағӌылар сӧп-сап кӧрілген туста сығарылбаанын киречілезелер, регион операторы ол тӧлегні хатап санап пирерге тимде.
Хабарӌыларны сӧп-сапты чарӌаң паза хати тузаланӌаң завод пӱдірии сағыссыратхан. Валентин Коноваловтың нандыриинаң, пу сурығны тиксі паалирға кирек, аннаңар Хакасияның чир-чайаан паза экология министерствозы завод пӱдіриинӌе республикаа иң килістіре чарадығны тілепче.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде