ЧАА ВЕТЕРАННАРЫН УНДУТПАСХА
15.06.2022
Хабарлар
«Чиңіс» оргкомитеттің кізілері Юрий ШПИГАЛЬСКИХ, Галина ТРОШКИНА паза Ольга ЛЕВЧЕНКО
Чыылығ. Хакасияның правительство туразында «Чиңіс» региондағы оргкомитеттің теестегі чыылии ирткен
Чыылығны апарған «Чиңіс» оргкомитеттің кнезі, республиканың пазы Валентин Коновалов. Анда пӱӱл Чиңіс кӱнін хайди иртіргенінің салтарларын паза килер чылда ол пайрамны хайди таныхтирын ӱзӱргеннер.
Валентин Олеговичтің чооғынаң, Чиңіс ӱлӱкӱнін чахсы иртірердеңер алылған пӧгіннер ӧӧнінде толдырылғаннар. Иділген читпестерні санға алып, килер чылда оларны тӱзедерге кирек. Тӱрчедең 22 июньда Россияда Илбек Ада чаа пасталғаны хоостыра Хумартхылас паза чобағ кӱнін таныхтирлар. Ағаа ідӧк тимненерге кирек. Тус табырах иртче, 2025 чылда Илбек Чиңіс кӱніне 80 чыл полар. Аннаңар ідӧк сағынарға кирек.
Салтарлар ӱзӱрии пар сыхханда, чоох пирілген Хакасияның культура министрі Светлана Окольниковаа. Аның чооғынаң, республикадағы культура учреждениелері паза организациялары Чиңіс кӱнін турыстығ иртірібізеріне кӧп кӱс салғаннар. Прай пір муң азыра мероприятие иртіріл парған. Ол санда республиканың аалларынча автомобильлер чӧрізі ӱс кӱн ирткен. Полған на аалда митинг полған, хумартхы тастарға тіріг чахайахтар салылғаннар паза кізілернең чоохтасханнар.
Чиңіс кӱнін таныхтиры 8 майдох пасталған. Ағбанда Чиңіс паркында Успас от хыринзар чахайахтар паза веноктар салылғаннар. Ідӧк 8 майда Ирт тағда орныхчатхан, Ада чир-суубысты арачылап, чуртастарын пир салған чаачыларның мемориал комплексінде «Алындағы тӧллернің чӱректерінде сірернің махачыңар хаҷанға даа халар» республика акциязы ирткен. Ідӧк «Хумартхылас свечізі» тиксі Россиядағы чӧрім полған. Анда республиканың правительство кізілері, халых пірігістері, студенттер паза ӱгренчілер араласханнар.
9 майда ӱлӱкӱн Ағбанда Пастағы май ачығында ирткен. Анда пайрамнығ ойында театрлар, филармония паза чон кӧглерінің артисттері араласханнар. Театрлар, Чиңіс кӱніне чарыдып, ойыннар ӧнетін турғысханнар. Іди А.М.Топановтың адынаң национальнай театр «Первая Ленинградская» паза «Читіген» театр «Чаада халған матырлар» ойыннарны кӧзіткеннер. В.Г.Чаптыковтың адынаң Хакас филармония «Зори здесь тихие» операны турғысхан. Соонаң ол спектакль Санкт-Петербургта тӱзімніг ирткен.
Хандых айының 22-чі кӱнінде культура тоғынҷылары «Іди чаа пасталған» чӧрімде аралазарлар. Анаң сӧс алған Хакасияның ӱгредіг паза наука министрінің орынҷызы Юлия Ворошилова. Ол кӧбізін чииттер Чиңіс кӱнін таныхтирында хайди араласханнаңар чоохтаан. Олар 50 азыра мероприятиеде ӧткін тоғынғаннар. Аймах марығлар паза уроктар ирткеннер. «Чиңіс кӧзенектері» марығда город чуртағҷылары туралар кӧзенектерін чазирында марығласханнар. Чиит волонтерлар кізілерге 30 муңча георгиевскай лента ӱлееннер, «Хызыл гвоздика» чӧрім иртіргеннер паза кӧп хадыллығ туралар хыринда 20 концерт кӧзіткеннер. «Чиңіс» чаа-спорт ойыннарын иртіргеннер. Анда 140 чиит оол-хыс, 14 ӧмее чарылып, марығласхан. Чиңіс тутхан Ағбан пилтірі аймаанаң килген ӧме.
Чииттер чир-сууна хынар ӱгредігні аннаң андар апарарлар. Хакас Республиканың чаа паза істеніс ветераннары чӧбінің кнезі Галина Трошкина кӧбізін ӱлӱкӱнде полған читпестерні таныхтаан. Іди мероприятиелерде хай пірее кӧрімнер сӧӧ тартыл парыбысчатханнар. Прай киректернең пір кізі устирға кирек. Ветераннарға кӧп арах хайығ ползын. Чииттерні, ӧӧнінде студенттерні, ӧткін араластырарға, піди олар кӧрінмееннер дее.
Полар Чиңіс кӱннеріне тимнег тоғыстарны тӧреміл апарарға. Хакасия Илбек Ада чаада хайдағ хозым иткеннеңер документальнай книга сығарарға. Республикада, чааға парғаннарны хумартхылап, ағастар одыртарға, хумартхы тастарны наачылирға. Ӧӧнінде чаа ветераннарына, тыл істенҷілеріне паза чаа палаларына тӧреміл полызарға.
Хакасия пазы Валентин Коновалов ветераннар чӧбінің кнезі Галина Трошкинаның чӧптерінең чарасхан. Ол позының орынҷыларына паза министрлерге «Чиңіс» оргкомитеттің кізілері пирген чӧптерҷе тоғынарға чахаан. Килер чылда Чиңістің 78 чылын улам чалбах таныхтирына паза Илбек Чиңістің 80 чылына амох тимненерге кӧстег пирген.
Автор :
Илья ТОПОЕВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде