ТАШТЫП АЙМАА - ЧОБАҒДА
15.06.2022
Хабарлар
Матыр Аймир МИЯГАШЕВТІ тӱгенҷі чолына ӱдесчелер
Хумартхылас. 27 майда Украинада иртчеткен ӧнетін чаа операциязында чир-суғҷыбыс Аймир Миягашев чуртазын пир салған
Ӧнетін иртірілчеткен чаа операциязында араласчатханда, ол ыырӌы тастаан гранатаны позынаң чабысхан, андағ оңдайнаң арғыстарын ӧлімнең ал халған. Іди 26 частығ оолның чуртазы ӱзілген. Махачы тудынғаны ӱчӱн ол хазна сыйиина турысхан.
Аймир Евгеньевич Миягашев 2017 чылдаң сығара службазын Хабаровсктағы 74854 № чааӌылар частьында улуғ радист-разведчик полып апарған. Служба тузында ол позын чахсы ла саринаң кӧзітчең, пасхаларына кӧзідім полӌаң. Чаа тимненізінде пӧзік салтарлары паза ӧткіні ӱчӱн Аймир «Участник маневров войск (сил) Восток-2018» медальнаң сыйыхтатхан. 2020 чылда, тізең, Илбек Чиңістің 75 чылына чарыдылған саналығ переходта (Хабаровск-Москва иртчеткен маршрутча) Суворовтың медальынаң сыйыхтатхан.
Пӱӱл 27 майда Аймирнең хада чааласхан группа ыырӌыларның асчатхан санынаң тоғас парған. Махачы чаалазып, пістің разведчиктер, ыырӌыларны ибірібізіп, флангтарынзар сығып, оларны атар оңдайға кир салғаннар. Хазыр чаалазығ тузында ыырӌылар, наа кӱстерінең хозылып, пістіңнерні хатабох чаалап пастааннар. Ол туста Аймир пасха подразделениелернең палғалыс тутхан паза нанӌыларына атыснаң хабасхан. Тӱрчедең ыырӌы, чағын пастыр киліп, пістіңнерзер граната тастабысхан. Аймир, арғыстарын арачылирға тіп, граната ӱстӱне чадыбысхан.
Тӱгенӌі чолына чир-суубыстың арачылағӌызын 11 июньда Таштыптағы культура туразында ӱдескеннер. Матыр оолнаң анымӌохтазарға Таштып аалзар Хакасия пазы Валентин Коновалов, Ӧӧркі Чӧп кнезі Владимир Штыгашев, Хазна Думазының депутады Сергей Сокол, Таштып аймаа пазы Алексей Дьяченко паза республиканың чааӌылар комиссариадының кізілері килгеннер. Валентин Коновалов чоох тутхан:
- Аймирнің матыр кирее аны сын ирен чіли таныхтапча. Оолларын іди орта ӧскірген ӱчӱн іҷе-пабазына улуғ алғыс ползын. Аймир позына чааҷының аар профессиязын таллап алған, анаң чир-суун арачылап, службазын читіре толдырған. Республиканың усғағ-пастаа адынаң, позымның адынаң чаа чының туған-чағыннарына ачырғанызыбысты читірчебіс. Таштып аймаана улуғ чобағ читті. Че Аймир пу чарыхтаң тиктең нимес парыбысхан. Андағ махачы ооллар пістің амыр чур ғазыбысты, палаларның таңдағызын нацизмнең арачылапчалар.
Аймирнің кічіг тузы Аңчул аалда ирткен, анаң сӧбірезі Хабаровсксар кӧс парыбысхан. Іӌе-пабазы Евгений Алексеевич паза Елена Валерьевна Аймирні Даша туңмазынаң хада тӧреен чирінзер удаа ағылӌаңнар. Школаның халғанӌы класстарын Аймир Таштыпта тоосхан, мында ол Юлия Майтакова ууӌазында чуртаӌаң. Чиит оолның хынызы - Таштып аалдаңох сыххан хыс. Пӱӱл чайғызын олар той идерге сағыс тутчатханнар. Аймирні тӧреен Аңчул аалында чыып салғаннар.
Автор :
Тарина БУТОНАЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы