ПІСТІҢНЕРНІҢ ЧИТІ АЛТЫН МЕДАЛЬ
17.06.2022
Хабарлар
Марығлар тузында бассейнде суғ «хайнаан»
Спорт. Хакасияда 13 - 15 июньда суғҷа чӱзерінҷе Сибирь Кубогы марығ ирткен. Анда 611 саарбах кӱзін сынаан
МАРЫҒ ОҢДАЙЛАРЫ
Сибирь Кубогы - тиксі Россия марығлары. Пӱӱл Ағбанда ол 9-ӌы хати иртірілді. Анда Кемеров, Новосибирск, Омск, Иркутск областьтарының, Хызылчар паза Алтай крайларының, Бурятия, Алтай, Хакасия республикаларның чиит спортсменнері кӱстерінең сынасханнар.
13 июньда арға-мӧрійні пайрамни азарында Хакасияның спорт министрінің орынӌызы Елена Краснова араласхан. Ол, спортсменнерзер паза тренерлерзер айланып, теен:
- Пӱӱн прай Сибирь Ағбанда чыылысты. Марығ араласчыларына чиңіс тударға, рекорд турғызарға алғапчам. Алғыстастар соонда саарбахтар пас меетке сыхханнар. Сибирь Кубогы двоеборье оңдайынаң ирткен. Андағ марығларда спортсменнерге пір оңдайнаң, че аймах дистанцияларда чӱзерге киректелче. Полған на марығда олар саннар чыыпчалар. Иң кӧп сан чыып алған спортсмен чиңіс тутча. Ідӧк программада эстафеталар полғаннар. Олғаннарны частары хоостыра ікі ӧмее чарыбысханнар: улуғлар паза кічіглер. Ағаа хоза, оолағастар паза хызыӌахтар алынӌа марығласханнар. Харбазығ 72 медаль ӱчӱн парған.
ПАСТАҒЫ МЕДАЛЬЛАР
Хакасия ӱчӱн Ағбанның, Саяногорсктың, Абазаның паза Асхыстың спорт школалары турысханнар. Пастағы кӱннердӧк чидіглерінең ағбандағылар - Диана Мирошниченко паза Егор Ваземиллер - ӧріндіргеннер. Итсе-де, тренер Евгений Осиновскийнің ӱгренӌілері чиңіс тударлар тіп пірдеезі ікінӌілебеен. Диана пӱӱл Россия первенствозында, ікінӌі орынға сығып, спорт узына нормативті толдырыбысхан. Марығ 3 - 7 майда Саранскта ирткен. Егор Ваземиллер дее сыйыхтығ орыннарға тӧреміл сыхча. Диана Мирошниченко баттерфляй оңдайынаң (50 + 100) паза учада чӱзіп (50 + 100) Хакасияа ікі алтын медаль ағылған. Егор учада чӱзіп (50 + 100) пастағы орынға сыххан. Диананың ӧӧрезі Анна Струкова кӱмӱс призер полыбысхан.
Ідӧк 13-14 июньда пістің спортсменнерге эстафеталарда оң полған. Чоохтирға кирек, пу иң хынығ иртчеткен марығ. Трибунадағы улус «ағырып» суулапча, хысхырча, кӧрігӌілер постары бассейнзер сегірерге тимделер. Оларны истіп, саарбахтар уламох табырах чӱзерге кӱстенчетпестер бе. Хызыӌахтар София Лявданская, Екатерина Шалгинова, Анна Струкова паза Диана Мирошниченко, пос оңдайлығ стильнең чӱзіп, чиңіс тутханнар. Оолағастарның ікі ӧмезі ӱзінӌі орынға сыххан. 15-16 частығларның аразында Никита Пищулин, Антон Курган, Глеб Богданов, Егор Ваземиллер хола медальлар утып алғаннар, 13-14 частығларның аразында - Александр Ракке, Сергей Астанаев, Богдан Уланов паза Иван Касьянов.
СПОРТ ШКОЛАЛАРЫ
Пастағы салтарлар кӧзіткеннер: Барнаулда, Новосибирскте, Хызылчарда кӱстіг спортсменнер. Полған на дисциплинада, таң, марыға пу городтардаң килген саарбахтар сыйыхтығ орыннарға сыхчатханнар. Барнаулдағы «Обь» спорт школазының оолағастары, баттерфляй оңдайынаң чӱзіп (50 + 100), пьедесталда пасхазына орын артыспааннар. Че пу кізі Алтайдаң килген Ксения Огневаның ӱчӱн сынап ӧрінген. Саарбах, хола призер полыбызып, республикаа суғӌа чӱзерінӌе тиксі Россия марығларының пастағы медальын ағылды.
Хайди таныхтаан тренер Данил Бессекирных, Тағлығ Алтайда суғӌа чӱзері, спорт кӧрімі чіли, 2015-2016 чылларда ла тиліп пастаан. Ол чоохтапча:
- Позым Барнаулдаңмын. Мині Тағлығ Алтайзар суғдағы поло секциязын апарарға хығырғаннар. Че салтарында суғҷа чӱзерінҷе тренер полып тоғынчам. Горно-Алтайскта 25 метрліг, 4 чоллығ бассейн.
Ол «Атлант» спорткомплексте орныхча. Амғы туста бассейнзер 500-че пала чӧрче. Суғҷа чӱзерінҷе алынҷа спорт школазы чоғыл, пӱӱл пӧлік ле азыбысхабыс. Ахча саринаң сидік. Палалар секцияа ахча тӧлеп чӧрчелер. Спорт ӧмедегілерге абонемент 3200 салковайға турча. Суғҷа чӱзерінҷе Алтайның піріктірілген командазына 20 кізі кірче. Пістің республикада ӧӧн спорт кӧрімнері рафтинг паза спорт кӱрезі полча. Оларға ахча хомай нимес позыдылча. Ӱр ниместе федерацияны тӧстеп алғабыс. Анзы республикада суғча чӱзерін тилідерге оңдай пирер тіп ізенчем.
Ағбанзар Сибирь Кубогына Данил Семёнович ӱгренӌілерін 2015 чылдаң ал чӧрчеттір. Алында марығларда 5-6 пала араласчаң полза, пӱӱл 13 кізі кӱзін сынады. Ксения Огнева ӱчӱн тренер матап ӧрінче. Ідӧк хызыӌахтар ӧмезі эстафетада тӧртінӌізі полыбысханнар. Анзы командаа ідӧк улуғ чидіг полча.
Бурятиядаң марығда 11 саарбах араласхан. Сибирь Кубогына чиит спортсменнерні Арья Захаров ағылған. Арья Капитонович - пӱрӱт чонның оолғы, ол тренер тоғызынаң 2010 чылдаң айғасчаттыр. Ӱгренӌілерінің аразында ікі кізі Россияның спорт узы нормативті толдырыбысхан. Бурятия 2018 чылдаң Ыраххы Востоктағы федеральнай округына кірчетсе дее, Арья Захаров олғаннарны Сибирь марығларында араластырарға кӱстенче. Тренернің чооғынаң, Ағбанда арға-мӧрій тӧреміл пӧзік синде иртче, араласчылар саны чылдаң чылға хозылча. Ол таныхтаан:
- Ағбанда спортсмен нинҷе тус аразына чӱзібіскенін электроннай система санға алчатханы чахсы. Алында пу тоғысты чарғыҷылар итчеңнер, хырыс-табыс кӧп полчаң. Санапчам, Сибирьде олимп чемпионнарын, призерларны тимнирге чарир. Новосибирскте, Хызылчарда кӱстіг спорт школалар, че олғаннар чахсы салтарлар кӧзідерге пастазох, оларны Москвазар апарыбысчалар.
СЕРГЕЙ АСТАНАЕВ
15 июньда Сибирь Кубогының халғанӌы марығлары ирткеннер. Программада 50 паза 800 метрге пос оңдайлығ чӱзері, комплекс чӱзері паза эстафеталар полғаннар. Комплекс чӱзерінде чидиинең чир-суғӌыбыс Сергей Астанаев ӧріндірген. Ол алтын паза кӱмӱс медальлар холға кирген. 14 частығ саарбах Ағбаннаң, Хакас гимназиязында ӱгренче. Суғӌа чӱзерінең 6 частаң айғас парир. Тренері - Сергей Вадимович Бережной. Пӱӱл Серёжаның чидіглерге пай чыл. 5 - 7 апрельде Ағбанда ирткен «Чиңіс тузы» регионнар аразындағы марығда ол пастағы орынға сыххан. «Кӧгліг дельфин» тиксі Россиядағы мариинда (Санкт-Петербург) тӧртінӌізі полыбысхан. Ол чоохтаан:
- Ачырғаныс пар. Сағынғам, Сибирь Кубогында ікі алтын медаль полар. Комплекс чӱзерінде кӱзімні сынапчам. 200 + 200 дистанцияны чахсы чӱзібіскем, 400 + 800 дистанцияда киреем киліспеді. Кӱстенерге кирек. Пӱӱл тренернең хада спорт узына кандидатха нормативті толдырыбызарға пӧгін турғысчабыс. Октябрьда оңдай полар тіп ізенчем.
Тиксі алза, Хакасияның 15 медаль: 7 алтын, 3 кӱмӱс паза 5 хола. Оларны республикаа ағбандағылар ағылғаннар. Ідӧк сыйыхтас тузында марығның иң чахсы спортсменнерін адааннар. Ол атха Диана Мирошниченко паза Кирилл Василовский (Хызылчар) турысханнар. Сибирь Кубогы тоозылғанда, сағыстарынаң суғӌа чӱзерінӌе Ағбанның спорт школазының директоры Сергей Бережной ӱлескен:
- Тоғыс чыл аразына пастағызынна ол син медаль утып алғабыс. Анзы ӧріндірче. Уламох кӱстенерге кирек. Палалар амды тынанарлар. Диана Мирошниченконаң Егор Ваземиллер Россия ӱгренчілерінің Спартакиадазында аралазарлар. Ол 24 - 28 июньда Саранскта иртер.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы