ЧИИТТЕР НАРКОТИКТЕРДЕҢ ТОҒЫР
17.06.2022
Статья
Марығ. «Мин чуртасты таллапчам» мына піди адалча пу кӱннерде Ағбанда иртчеткен чииттернің марии. Ол Наркоманиядаң тоғыр чоннар аразындағы кӱнге чарыдылған
Хакасияда «Мин чуртасты таллапчам» марығ сигізінӌі хати иртірілді. Аның тӧстегӌізі С.П.Кадышевтің адынаң Чон чайаачызы кіні полча. Хазых чуртасха чарыдылған мероприятиеде республика муниципалитеттерінің чииттері араласча. Пӱӱл, тізең, марыға Абаза городтың, Пии паза Орджоникидзе аймахтарының, Хакас хазна университедінің, «Барс» чааӌы-патриот клубының 14 - 25 час толдыр салған чииттері паза волонтерлары чыылысханнар.
Мындағ мероприятиенің ӧӧн пӧгіні - наркотиктер кізее хайдағ ӱрег ағылчатханын чарыдары паза хазых чуртас апарарға хығырары. Танығлығ кӱнде улуғ класстардағы ӱгренӌілер паза студенттер чайаачы паза спорт марығларында кӱстерін сынааннар, брейн-рингте пілістерін кӧзіткеннер, тест ирткеннер паза хазых чуртасха кӧніктірчеткен плакат хоостааннар.
Харбазығ соонаң чарғыӌылар чиңісчілерні адааннар. Пӱӱл прай номинацияларда «Это моя Родина» ӧме артых полыбысхан. Чииттер Орджоникидзе аймаандағы Ӱӱс аалдаң килгеннер. Чиңісчілерге кубок, дипломнар паза сыйыхтар читірілген.
Ідӧк «Вместе мы сила» номинацияда Ағбандағы «Барс» чааӌы-патриот клубының чииттері призёрлар полыбысханнар, «ЗОЖ в литературе» номинацияда - Пии аймааның олғаннары, «В спортивном теле здоровый дух» номинацияда - Хакас хазна университедінің студенттері, «Окна ЗОЖ» номинацияда - Абазадағы оол-хыстар.
Чӧрім Хакасияда пір ай иртер. Пу туста ӱгредіг организацияларында, хоза ӱгредіг кіннерінде, культура учреждениелерінде олғаннарны хазых чуртасха кӧніктірчеткен мероприятиелер иртер.
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы