ПІРГЕ ХАЗНА СЫНЫХТАҒЛАРЫ ИРТ ПАРДЫ
22.06.2022
Хабарлар
Хакасия пазы Валентин КОНОВАЛОВ кіннің тоғызынаң танысча
Ӱгредіг. Школа тоосчатхан ӱгренҷілернің пірге хазна сыныхтағлары тоозылды. Хай пірее предметтерҷе салтарлар пілдістіг. Хайди республиканың олғаннары сыныхтағларны тобырып алғаннар?
Пастағы сыныхтағ химия, география паза литература предметтерӌе ирткен. Аны ӱгренӌілер 26 майда пасханнар. Пу предметтерні Хакасияда 500 олған таллап алған. Литератураӌа экзаменні 100 баллға пір ле ӱгренӌі тудыбысхан. Ол Ағбандағы 1№ школаның ӱгренӌізі Алина Евсеева. Пу предметче республикада 111 олған сыныхтағ ирткен, тиксі Россияда, тізең, 40 муң азыра. Оларның 8 муң азыразы экзаменде 81-100 балл чыып алған, 100 баллны - 1072 олған.
Республикада химияӌа сыныхтағны 100 баллға ідӧк пір ӱгренӌі тудыбысхан. Илья Шемсидинов Ағбандағы гимназияда ӱгренче. Чиит оол 10 классха теере имӌі поларға сағынған. Аннаңар химия паза биология предметтернең тирең айғасхан. Че амды ол, хазнаның ӧӧн вузтарынзар кіріп, имнег киреенӌе аймах істезігліг тоғыстар апарарға пӧгінче. Таныхтирға кирек, Россияда химия предметче ЕГЭ-ны 77 муң азыра олған тутхан, 100 баллны 664 ӱгренӌі чыып алған.
Орыс тілі школа тоосчатханнарның ӧӧн предмеді полча. Хакасияда пу предметче экзаменні 2343 ӱгренӌі тутхан, оларның 431-і 81 азыра балл алып алған, 100 балл, тізең, 7 олған. Чыл сай пу предметче Харатастағы гимназияның паза А.Г.Баженовтың адынаң лицейнің ӱгренӌілері чахсы салтарлар кӧзітчелер. Пу чыл ирткен чыллардаң пасхалалбады. Пу ӱгредіг учреждениезінің ікі ӱгренӌізі экзаменні 100 баллға тудыбысхан. Ідӧк пӱӱл Саяногорсктағы 7№ лицейнің ӱгренӌізі Алина Кохан пілізін 100 баллға кӧзіт пирген. Таныхтирға кирек, ол ідӧк литератураӌа 91 балл алып алған. Лицейде ағаа поғдархапчалар паза ол «Ӱгредігде пӧзік чидіглерге читкен ӱчӱн» паза «Хакасияның алтын ізенізі» медальларны аларына кандидат полча.
Орыс тілінең ідӧк чахсы салтарлар Н.Ф.Катановтың адынаң национальнай гимназияның олғаннары кӧзіттілер. Школа тоосчатхан 96 олғаннаң 38-і 81 баллдаң кӧп чыып алған. Пуох ӱгредіг организациязының ӱгренӌізі Даниил Чистанов 100 балл алып алған. Алынӌа чоохтирға кирек Ағбандағы 25 № школадаңар. Пу ӱгредіг учреждениезінің орыс тілі ӱгретчізі Юлия Байкованың ӱс ӱгренӌізі экзаменні 100 баллға тудыбысхан. Олар Татьяна Тинникова, Екатерина Тестова паза Евгения Беспалова. Мындағ кирек республикада удаа полбинча!
Математика - ікінӌі ӧӧн предмет. ЕГЭ-ны ідӧк прай ӱгренӌілер пасханнар, че 100 баллға пірдеезі читір полбаан. Пу предметче иң чахсы салтар Харатастағы гимназияның паза Ағбандағы 10 № школаның ӱгренӌілері кӧзіткеннер. Олар 92-ер балл чыып алғаннар.
Пӱӱл ідӧк хакас литературазынӌа олғаннар ЕГЭ пасханнар. Аны ікі олған таллап алған, ікізі Хакас гимназияның ӱгренӌізі - Аима Боргоякова паза Дарья Топоева. Таныхтирға кирек, хыстарның экзаменде чыып алған баллары, Н.Ф.Катановтың адынаң Хакас хазна университедінзер кірчетсе, санға алылар. Чиит хыс Аима Боргоякова чуртазын хакас тілін істезерінең палғалыстырарға сағынча. 11 чыл аразына ол кӧп чидіге читкен: тіл олимпиадаларында паза марығларында чиңісчі алай ба призер сыбыра полыбысчаң, наука-практикалығ конференцияларның араласчызы полча.
- Мин хакас тілін паза пасха даа тӱрк тіллерін істезерге пӧгінчем. Тӧреен тілімнең кічігдең ала чоохтасчам, - таныхтапча Аима Боргоякова.
20 июньда паза киӌее, тізең, школа тоосчатханнар информатикаӌа ЕГЭ тутханнар. Пӱӱл пу предметті Хакасияда 300 азыра олған таллап алған. Тиксі 20 азыра аудитория тимнелген. Чоохтирға кирек, информатика чалғыс экзамен, хайда сыныхтағ комиссиязы чоғыл. Ӱгренӌілер сыныхтағны
компьютер пастыра тутчалар, нандырығлары кӧнізінең федеральнай кінзер парыбысчалар.
Мынынаң школа тоосчатханнарның прай экзаменнері тоозылды. Кем хайди ӱгренген, тимненген, андағ балл алған. Хайди таныхтапчалар Хакасияның ӱгредіг паза наука министерствозында, пӱӱл экзаменнер иптіг, сайбағлар чох ирт парғаннар. Анзын киречілепче ӱгретчілернің узын тилітчең институтта тӧстелген сыныхтағ-искірігліг кін, хайда хазна сыныхтағлары хайди иртчеткенін кӧрчелер. Киӌее аның тоғызынаң Хакасия пазы Валентин Коновалов танысхан. Ӧнетін тимнелген аудиторияда специалисттер информатикаӌа экзамен хайди иртчеткенін ситкееннер. Компьютер экранында экзамен аудиториязында ниме полчатханы іле кӧрінче. Специалисттернің ӧӧн пӧгіні - ӱгренӌілернің праволары сайбалбаанын хайығда тудары, оларға полызары паза ЕГЭ тузындағы сайбағларны чох идері.
Ідӧк Хакасия пазы Валентин Коновалов апелляция комиссиязы чыылииның тоғызында араласхан. Анда орыс тілі предметче экзамен балларынаң чараспинчатхан ӱгренӌілернің тоғыстары ӱзӱрілген. Пӱӱл пу предметче апелляция комиссиязынзар 20 азыра сурыныс пічии кірген, ол ирткен чыллардағызынаң кӧп нимес. Таныхтирға кирек, пӱӱл пастағызын на олғаннарға, апелляция комиссиязына посха килбин, интернет пастыра палғалызарға чарир. Анзы Ағбаннаң ырах чуртапчатхан олғаннарға килістіре. Іди балларынаң чараспинчатхан 23 олғанның 8-і комиссия араласчыларынаң ырахтын чоох алысхан.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде