СОВЕТ СОЮЗЫ МАТЫРЛАРЫНЫҢ ОМАЛАРЫ - ХАҶАНҒА ДАА
24.06.2022
Хабарлар
Хумартхылас. Хандых айының 22-ҷі кӱні пістің хазнада чобағлығ кӱнге саналча, 81чыл мының алнында фашист Германиязы СССР-даң тоғыр чаа пастабысхан
Мындағ танығлығ кӱнде Таштып аалда Совет Союзының Матырларының - Григорий Зориннің паза Александр Назаровтың - бюсттары пайрамни азылған.
Кічіг сержант Григорий Трофимович Зорин, Мадыр аалдаң сыххан оол, Илбек Ада чаа тузында Ленинград, Центральнай, Белорусскай, 1-ғы Белорусскай фронттарда, Германияда чааласхан паза Кидеркі Польшаны арачылаан. Совет Союзының Матыры атты Висла суғны чаалазығнаң кискен ӱчӱн алған, ол чаалазығда 15 нацистті чох идібіскен.
Улуғ сержант Александр Максимович Назаровтың олған тузы Таштып аалда ирткен, чаада ол Украинаны, Молдавияны, Румынияны, Польшаны ыырӌы холынаң позыдарында алнында турған, Германиядағы чаалазығларда араласханох, иң пастағыларның санында Днестр паза Прут суғларны чаалазығнаң кискен. Разведка ӧмезінең устапчатханда, 40 азыра азымахчыны чох идібіскен, 92 кізіні пленге алып алған паза чааласчаң тирігліг 13 машинаны холға кирген.
Матырларның бюсттары Россияның чаатархын халых пірігізінің региондағы пӧлии хабазиинаң иділгеннер.
Чиңіс паркында иртчеткен пайрамға Хакасия пазы Валентин Коновалов, Ӧӧркі Чӧп кнезі Владимир Штыгашев, республиканың культура министрі Светлана Окольникова паза пасха даа аалӌылар чыылысханнар.
Ідӧк Таштып аймааның устағ-пастаа, Таштып аалның халых пірігістері, олаңай чуртағӌылары митингте араласханнар. Мероприятиеде Валентин Олегович, чыылысхан улуссар айланып, чоох тутхан:
- Изеннер, аарлығ нанҷылар. Сынап таа, пу кӱн Россияның тархынында иң чобағлығ кӱнге саналча, аннаңар, андағох хорғыстығ чаа пасталбас ӱчӱн, пістің тӧлнің ӧӧн пӧгіні - тархынны, алыстырбин, хайраллап халары. Амғы туста піс ундутпасха кирекпіс, хайди 1941 чылда хандых айының 22-чі кӱнінде Германия Совет Союзын пазынып аларға пӧгінген. Че пістің илбек чоныбыс тӧдір пазынмаан, пасха республикаларнаң ынархазып, хададаң хада тудынып, нацизмнең тоғыр чааласхан. Хомзынысха, фашисттер саринда полған Бандера осхас сағыстығлар пастарын хатабох кӧдірерге сіренчелер, мин сағынчам, пістің чонның хада тудынар кибірі, илбек тархыны нацизмні чох идерге полыс пирер.
Республикада хумартхы тастар хозыларына Оӧркі Чӧп кнезі Владимир Николаевич Штыгашев, культура министрі Светлана Анатольевна Окольникова улуғ тоғыс апарчалар. Чаа-тархын халых пірігізіне, пу сіліг бюсттарны иткен, турғысхан кізілерге алғызым читірчем.
Александр НАЗАРОВХА хумартхы тас
Хакасияның Ӧӧркі Чӧбі кнезінің чооғынаң, чыылысхан улус Григорий Зориннеңер кӧп хынығ ниме піліп алған, Владимир Штыгашевке матыр чистезіне килісчеттір. Владимир Николаевич матырларның ікізін, олар чаадаң айланғанда, тіріге кӧрген, оларны маңат пілген. Амғы чиит тӧлге, тізең, Илбек Ада чаа матырларынаңар кинделерде, газеталарда ла хығырып аларға чарир. Амды, бюсттар турғызылғанда, Григорий Зориннің паза Александр Назаровтың омалары хаӌанға даа чонның хараа алнында турар.
Автор :
Тарина БУТОНАЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде