ХАБАЗЫҒ ӰЧӰН АЛҒЫЗЫН ЧИТІРГЕН
24.06.2022
Хабарлар
Тоғазығ тузында
Тоғазығ. Киҷее Хакасияның пазы Валентин Коновалов Россияның Хазна Думазының кнес орынҷызы Шолбан Кара-оолнаң тоғысчы тоғазығ иртірген
Россияның Хазна Думазының кнес орынӌызы, Туваның экс-губернаторы Шолбан Кара-оол пістің республиказар регион устағӌызы ааллап хығырғаны хоостыра килген.
Киӌее Хакасияда «Боевое братство-2022» Сибирьдегі II чааӌы-патриот форумы азылған. Пастағызы 2019 чылда Туваның ӧӧн городы Хызылда ирткен. Хакасия хонӌых республикадаң эстафетаны алча. Шолбан Кара-оол - форумның аарластығ аалӌыларының пірсі. Ол иң пастағы форумның пастағӌызы полча.
Валентин Коновалов Шолбан Валерьевичке республиказар ааллап килгені ӱчӱн алғызын читірген.
- Сірер Хакасияа улуғ арғыссар паза хаҷан даа сағаан аалчызар. Сірер пістің республикаа паза «Кимдегі Сибирь» регионнарына кӧп туза итчезер. Патриотизмге ӱгредеріне хайығ салчатханыңар уғаа аарластығ, улам амғы хазнадағы паза тиксі тилекейдегі оой нимес туста. Ветераннар чӧріміне хабазығ ӱчӱн Сірерге улуғ алғыс. Ізенчем, пӱӱн пасталчатхан форумның салтарлары кӧріндіре полар, - теен республика пазы.
Ідӧк олар чуртас-экономика сурығларын, Сибирьнің инфраструктуразын тилідерін паза экономика тилізіне кӧні теелчеткен инфраструктура проекттерін чуртасха кирерін ӱзӱргеннер. Шолбан Кара-оол пу сурығларнаң ӧткін айғасча. Чоох парған Хызыл - Хураған тимір чол пӱдіриинеңер, хайзын Тува даа, Хакасия даа паза Хызылчар крайы даа чидікпин сағыпчалар. Шол-бан Кара-оол ідӧк Сибирь регионнарына пір полчатхан паза тың киректелчеткен проектке - Ағбан - Бийск автомобиль чолы пӱдіриине - ӧткін хабасча.
- Проекттерні чуртасха кирер ӱчӱн, пӱӱн прай синдегі ӱлгӱлерге, регионнарның, федеральнай паза Хазна Думазы синінде, прай кӱс саларға кирек, - таныхтаан Хакасияның пазы.
Шолбан Кара-оол Валентин Коноваловха республиказар ааллап хығырғаны ӱчӱн алғызын читірген. Паза позы саринаң сурығларны пӧгеріне хабазарға тимдезін таныхтаан:
- Республиканың кирексіністерін федеральнай ӱлгӱ органнары алнында арачылирына паза, сірернең пірге тоғынып, салтарларға чидеріне прай кӱзім саларбын.
Шолбан Валерьевич ідӧк «Боевое братство» тиксі Россиядағы халых пірігізінің ӧӧн аппарады адынаң республика пазына паза правительствозына чааӌы-патриот форумына хабасханы паза аны Хакас чирінде иртірерін тимнеені ӱчӱн алғызын читірген.
- Анда прай кӧңнімнең аралазарбын. Амғы туста патриотизм сурии иң кирексіністе. Хазнадағы амыр паза чахсы чуртас - ол иң не пастап Чир-сууна хыныс нооза. Ветераннарның халых пірігістері - ол тӧстег, хайзының ибіре пу кирек тоғыс апарылча, - таныхтаан Шолбан Кара-оол.
Автор :
Хакасия пазының паза Хакасия правительствозының пресс-службазы
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы