РОССИЯ МИНИСТРІНЕҢ АЗЫХ ЧООХТАЗЫҒ
24.06.2022
Хабарлар
Хакас гимназия ӱгренҷілері Россия министрі Сергей ЛАВРОВНАҢ хада
Чапсых тоғазығ. Россияның пасха хан киректерінӌе министр Сергей Лавров Н.Ф.Катановтың адынаң национальнай гимназия-интернаттағы «Чиит дипломаттар» клуб араласчыларынаң тоғасхан
Москвадағы тоғазығ сурығ-нандырығ оңдайында ирткен. Анда республиканың чииттері Сергей Лавровха постарының пӧгіннерінеңер паза айғасчатхан киректерінеңер искір пиргеннер паза МИД-тың устағҷызын Хакасиязар ааллап хығырғаннар.
Олғаннарның сурығларына нандырып, Сергей Викторович 1968 чылда студенттер отрядтарынаң хада Хакасияда полғанынаңар сағысха кирген. Хайди ол таныхтаан, пу иң чарых паза сағыста ӱрге халған чорых полған.
- Россияның пасха хан киректерінҷе министр Сергей Лавровнаң тоғасханын піс хаҷан даа ундутпаспыс, - позының ВКонтакте страницазында таныхтапча Н.Ф.Катановтың адынаң национальнай гимназияның директоры Марина Сагатаева. - Чоохтазығ азых паза ниик ирткен, хай пірееде хатхы-кӱлкі дее пол парҷаң. Сергей Викторович чоохтазығда азых, олғаннарнаң чахсы тіл алыс полчатхан паза хормачыланарға хынчатхан кізі полтыр.
Пу тоғазығда «Чиит дипломаттар» клубтың араласчылары чоннар аразындағы амғы хайызығны, дипломаттарның тоғызынаңар чахсы піліп алғаннар. Россияның пасха хан киректерінҷе министр Сергей Лавровнаң тоғазығны иртірген хазнаның пасха хан киректерінҷе министерствоның Хызылчардағы кізізі Артём Алексеевич Захаровха алғызыбыс читірчебіс, хайзы клубтың тоғызынаң устапча. Ідӧк, чиит дипломаттарға чорыхха сығарға оңдай пирген ӱчӱн, Хакасияның правительствозына, республиканың ӱгредіг паза наука министрі Лариса Гимазутинаа алғызыбыс читірчебіс.
Сергей Лавров республиканың чиит дипломаттарына ӱгредігде пӧзік чидіглерге чидерге, чайғы тынағ кӱннерін чахсы иртірерге паза турғысхан пӧгіннерге чидерге алғаан.
«Чиит дипломаттар» клуб Россияның пасха хан киректерінде министерствоның Хызылчардағы представительствозының устаанынаң Н.Ф.Катановтың адынаң национальнай гимназия-интернатта 2020 чылда тӧстелген.
Автор :
Тимнеен Оксана СУНЧУГАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде