ПАСТАҒЫ ЭТНОГРАФ - ААРЛАСТА
24.06.2022
Хабарлар
К.М.ПАТАЧАКОВТЫҢ 100 чазына чарыдылған тегілек стол иртчеткен туста
Тегілек стол. ХакНИИЯЛИ-да ученай-этнограф, тархын наукаларының кандидады Кузьма Патачаковтың 100 чазына чарыдылған регионнар аразындағы тегілек стол ирткен
Кузьма Михайлович Патачаков Илбек Ада чаа ветераны полған. Чуртазы тооза Хакасиядағы тіл, литература паза тархын наука-істезіг институдында істен салған. Аның 100 чазына чарыдылған тегілек стол 22 июньда, Хумартхылас паза чобағ кӱнінде, ирткен. Аннаңар анда араласхан ученайлар иң пурнада ученайға чарыдылған хумартхы чардызар чахайахтар салғаннар. Ол ХакНИИЯЛИ туразының Ағбандағы Чертыгашев орамазы сариндағы стенезінде орныхча.
Чоохтирға кирек, К.М.Патачаковтың чуртас чолына, істезіг тоғыстарына чарыдылған чыылығда Ағбан, Минсуғ, Горно-Алтайск, Новосибирск городтардағы учёнайлар араласханнар.
Тархын наукаларының кандидады ХакНИИЯЛИ-ның тархын секторының улуғ наука тоғынӌызы Валерий Чертыков чыылысхан чонға пайрамнығ тӧреен кӱні таныхталчатхан саблығ этнографтың тиксі чуртас чолынаңар чарыт пирген.
Хакасияның национальнай архивінің пӧлік устағӌызы Юлия Орешкова, тізең, Кузьма Михайлович Патачаковтың пу культура учреждениезінде хайраллалчатхан пічіктерінеңер, сомнарынаңар искіріг иткен. Аның таниинаң, ученайның пічіктері архивсер 2017 чылда ла кіріп пастаптырлар. Халғанӌыларын 2020 чылда Кузьма Михайловичтің хыстары пирібістірлер.
Пӱӱнгі кӱнде К.М.Патачаковтың Илбек Ада чаада араласханын, Ағбандағы ӱгретчілер институдының студенті полғанын, Ленинград городта аспирант полғанын, чуртаста полған паза даа пасха киректерін киречілепчеткен пічіктер ідӧк республиканың Л.Р.Кызласовтың адынаң чир-суғ ӱгренӌең музейінде хайраллалчалар.
Чыылығда олардаңар чарыда чоохтап пирген Хакасияның ӧӧн музейінің ученай хачызы Игорь Таштандинов.
- Пу пічіктер аразында Кузьма Михайловичтің парашютист удостоверениезін, Илбек Ада чаада палығлаттырғаннаңар пічиин кӧріп аларға чарир. Музейнің чыындызында алынҷа хайығ айландырарға кирек ученайның ааллар чуртағҷыларынаң ал халған ниме-нооларына. Кӧзідімге, оларның аразында Индіркі Тӧӧ аалдағы чуртағҷылар тимнеен тӱӱр пар, - искірген Игорь Иванович.
Паза ХакНИИЯЛИ-ның тархын секторының устағӌызы Татьяна Кискидосованың искіриин истіп аларға чапсых полған. Ол Кузьма Михайлович Патачаковтың 1970 чылда Алтай аймаандағы Аршаннар аалдағыларның чуртазынаңар істезігліг тоғызынаңар чоохтаан.
- Кузьма Михайлович андада пу аалдағыларның ибде пар нимелерінең, мал-хустарынаң пасти парыстарына читіре істескен. Полған на туразар кірген тиирге чарир. Сӧбірелерні, иң артых кип-азахтарын кизіртіп, сомға суурған. Совхоз тоғынҷыларынаң хада, ідӧк полғанынаң на хада, чоох алысхан. Пу істезіглер хоостыра кӧрзе, Аршаннар аалда 1970 чылда совхоз тоғынҷылары иң артых чуртаптырлар. Ачырғасха, Кузьма Михайловичтің аршандағылардаңар пу тоғызы амға теере пір дее чирде чарыхха сыхпаан, - чарытхан Татьяна Александровна.
Тиксі алза, Кузьма Михайлович Патачаковтың 100 чазына чарыдылған тегілек стол уғаа тӱзімніг ирт парған. Пастағы профессиональнай этнографнаң хада тоғынарға маңнанған ученайлар, тізең, улуғ частығ арғыстарын сағысха киріп, оларға часкалығ ӱлӱс тӱскеннеңер ӧріністерінең ӱлескеннер.
Автор :
Александра КАРАМЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде