ХАКАСИЯНЫҢ ТИЛІҶЕҢ ОҢДАЙЛАРЫ КӦП
29.06.2022
Хабарлар
Валентин КОНОВАЛОВ паза Геннадий СЕМИГИН тоғазығ тузында
Аалҷы. Хакасиязар тоғыс хоостыра Россияның Хазна Думазының депутады, нациялар киректерінҷе комитеттің кнезі Геннадий Семигин кил парған. Тоғыс чорығы тузында ол Хакасияның пазы Валентин Коноваловнаң тоғасхан паза республикадағы СМИ-ларнаң, тоғазып, чоох алызарға тус тапхан
Геннадий Семигин пістің республика чуртағҷыларына чахсы таныс, 2003 чылда ол Хазна Думазынзар пістің регионнаң табылған. Хакасияда удаа полчаң, республиканың сурығларын пӧгеріне хабасчаң. Геннадий Юрьевич «Патриоты России» партияның тӧстегҷізі полча. 2021 чылда аның партиязы «Справедливая Россия» паза «За правду» партияларнаң пірік парған. Іди «Справедливая Россия - Патриоты - За правду» наа социалистическай партия тӧстелген. Геннадий Семигин наа партия устағҷыларының пірсі, Ӧӧн чӧбінің кнезі полча.
Хакасияның пазы Валентин Коноваловнаң тоғазығда чоох республиканың чуртас-экономика тилізінеңер, нациялар аразындағы хайызығлардаңар парған. Республика пазы Хакасия правительствозы национальнай политика сурығларына улуғ хайығ салчатханын таныхтаан. Ӱлгӱлернің пу кӧстегче тоғызы чылдаң чылға тыыдылча.
Республикада пар полчатхан национальнай диаспораларнаң улуғ тоғыс апарылча.
- Пӱӱнгі чуртаста, чоннар аразындағы мындағ киректерде, піске пірге полары паза удур-тӧдір тудынары иң не кирек, - теен Валентин Коновалов.
Республика правительствозы алынҷа хайығ хакас тілін тилідеріне салча. Ирткен чылда Хакасия правительствозы пастағызын на национальнай тілні хайраллирынҷа паза тилідерінҷе 2027 чылға теере кӧрілген хазна программазын алған. Ідӧк чыл сай ӧсчеткен тӧл аразында хакас тілін хайди чахсы пілчеткенінче марығ иртірілче.
Валентин Коновалов Геннадий Семигиннең тоғазығда республикада пасха регионнардағыох чіли сидіксіністер, хайзыларын, федеральнай законодательствоны алыстырбин, пӧк полбассың, парын таныхтаан. Хазна Думазының депутады позы саринаң ол сурығларны пӧгеріне хабазарға тимде полғанын искірген.
Хакасия пазынаң тоғазығ иртірген соонаң Геннадий Семигин хабарҷыларға пресс-конференция иртірген. Хакасиязар Геннадий Юрьевич республика правительствозы ааллап хығырғаны хоостыра килтір. Итсе, ол піссер ідӧк тее килерге пӧгінген полтыр. Нациялар киректерінҷе комитеттің устағҷызы чіли, ол нациялар аразындағы хайызығлар хайдағ полғанын паалир пӧгіннең хазнаның национальнай регионнарынҷа чӧрчеттір.
- Пеер мин Башкириядаң килдім, - чоохтаан Хазна Думазының депутады. - Чибіргі чыл мының алнында мин, Хакасиязар пастағызын на киліп, республиканаң танысхам. Андада мині аның ис-пайы, ӧс полҷаң кӱзі, тоғысха кӱс паза аалчыларны чахсы удурлапчатхан чуртағчылары хайхатхан.
Хабарҷылар саринаң пирілген сурығлар аймах-пасха полғаннар, национальнай политикадаң пасти республиканың чуртас-экономиказына паалағ пиреріне теере. Национальнай хайызығларны алза, Хакасияда олар хаҷан даа чахсы полғанын таныхтаан. Республиканың чуртас-экономика киреене депутат чахсы паалағ пирген, че олох туста Хакасияның тилічең оңдайлары ам даа кӧп полғанына хайығ айландырған. Анзына иң не пурнада аалларның тилізіне хайығ саларға кирек тіп таныхтаан: чолларны чахсыландырарға, имнег тураларын, олған садтарын паза школалар пӱдірерге.
Хабарҷылар пирген сурығларның пірсі пенсияа сыхчаң час кӧдірілгенінеңер полған. Геннадий Семигин аны кӧдіргенінең хаҷан даа тоғыр полғанын искірген. Пенсияа сығар часты айландырарынча тоғыс апарылча, піс ол сурығнаң хыйа парбаабыс тіп таныхтаан.
Хазна Думазының нациялар киректерінче комитеді кнезіне ідӧк национальнай кадрларнаң палғалыстығ сурығ пирілген: Совет Союзы тузында город-аймахтар синінде пастыхтарны турғысчатса, национальнай кадрларға улуғ хайығ салыл турған (пастых орыс полза, орынҷызы - хакас, алай тискер), ам ол нимее хайығ салылбинча.
Геннадий Семигин пу сурығда орындағы нацияны санға ал турарға кирек тіп таныхтаан. Че олох туста нация ла хоостыра турғыс турарға кирек полғанынаң чараспаан. Аның кӧрізінең, мында иң не пурнада кізінің тоғын полар хылиин, узын санға ал турарға кирек.
- Пісті иң не пурун сағыссырадарға кирек: ол специалист алай чох па? - сағыс-кӧрізінең ӱлескен Хазна Думазының депутады. - Хакастарға, шорларға паза пасхазына туза идер бе алай чох па?
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы