ЧОЛЛАРЫ АЗЫХ ПОЛЗЫН!
29.06.2022
Хабарлар
Хакасия пазы Валентин КОНОВАЛОВ Харатастағы чииттерге «Хакасияның алтын ізенізі» медаль читірчеткен туста
Школа тоосханнарның иирі-2022. Пӱӱл пу пайрам Хакасияның аймах-городтарында 24 - 28 июньда ирткен
Чуртаста пір ле хати полчатхан кӱнде выпускниктерге, оларның ӱгретчілеріне паза іӌе-пабаларына чылығ сӧстер кӧп читірілген. Харатас городтағы школаларны тоосхан оол-хыстарға уламох чӱрексіністіг полған, неке. Анда «Луначарский» кинотеатрда ирткен пайрамға Хакасия пазы Валентин Коновалов кил парған нооза.
- Прайзын школа тоосханынаң алғыстапчам. Сірернің амды уғаа нандырығлығ тус. Сірерге чӱрекке чатчатхан профессияны таллап аларға кирек! Аның ӱчӱн чуртастың орта чолынзар кіріп аларға алғапчам. Сағынған сағыстарың хайди даа толзын. Піс сірернің полғанына ла поғдархапчабыс. Кирек ӱгредіг алып, тиксі хазна, республика тилізіне улуғ хозым идерлеріҷе ікінҷілебинчебіс. Чолларың азых ползын! Улуғ алғыс ідӧк ӱгретчілеріңе чахсы пілістер пирген ӱчӱн паза іҷе-пабаларыңа школада ӱгренчеткен туста сірернең хада полған ӱчӱн, - теен Валентин Олегович.
Пу чыл Харатас городта 11 классты 295 оол-хыс тоосхан. Оларның чибіргізі ӱгредігде, наукада, культурада паза спортта пӧзік чидіглерге читкен ӱчӱн «Хакасияның алтын ізенізі» медальға турысхан! Мындағ сыйыхты харатасчылар городының иң артых чииттеріне ідӧк Хакасия пазы Валентин Коновалов читірген.
Паза олған тузынаң анымӌохтасчатхан улусты танығлығ пайрамнаң Харатас город пазы Василий Белоногов алғыстирға килген.
- Изен ползын, Харатас городтың иң ӧткін чуртағҷылары! Сірер сынап пістің городтың тиксі тилізіне улуғ хозым идер ізенізібіс полчазар. Прайзын алғыстапчам мындағ танығлығ кӱннең. Сірер пӱӱн кізінің ӧӧн пічіктерінің пірсін - ортымах ӱгредіг аттестадын - алчазар. Сірернің полғаны ла чуртаста турыстыра орын таап алзын, чахсы кізі ползын. Пу кӱнде ідӧк улуғ алғыс читірерге кирек іҷе-пабаларға. Палаларыңның чидіглері сірерге иң артых сыйых ползын, - теен Василий Васильевич.
Мындағ алғыстастарға Харатас городтағы депутаттар чӧбінің кнезі Татьяна Гриценко хозылған.
- Выпускниктерні, оларның ӱгретчілерін, іҷе-пабаларын прай чӱреемнең алғыстапчам. Киҷеегі олғаннар улуғларның чуртас чолынзар пір дее сидіксіністер чох, ниик ле кір парыбыссыннар, сағынған сағыстарын хайди даа толдырзыннар, - алғаан Татьяна Васильевна.
Анаң олар ӱгредігде пӧзік чидіглерге читкен выпускниктерге «За особые успехи в учебе» медальлар паза Харатас город пазының алғыстас пічиин читіргеннер. Пу сыйыхтарға прай отысха чағын кізі турысхан. Иң артых чииттер городтың гимназиязында, лицейінде паза 19-ӌы школада ӱгренгеннер.
- Харатас городтың прай выпускниктерінің адынаң пістің ӱгретчілерге улуғ алғыс читірчем. Школада ӱгренген туста сірер піснең хости полғазар, ӧрінізібіснең, чобаабыснаң хада ӱлескезер. Сірер піске піліс ле пирбеезер, ідӧк ноо даа сидіксіністі турыстыра тобырарға, оой нимес сурығларда орта чарадығ аларға ӱгреткезер. Сірер піске чахсы кӧзідім полғазар. Пістің чиңістерібіс - ол сірернің кӱннең кӱнге толдырчатхан тоғызыңар. Сірер пирген хыйға чӧптеріңнең піс чур тас тооза тузаланарбыс паза чир-суубыстың турыстыра чуртағҷызы поларға сӧс пирчебіс, - нандырығлығ сӧс тутхан Харатас городтағы лицейні тоосхан Роман Юхно.
Таныхтирға кирек, пӱӱл Хакасиядағы школа тоосханнарға пастағызын на республика правительствозы хабазиинаң «Под алым парусом Хакасии» фестиваль ирткен. Анда аймах синніг марығ-олимпиадаларда чиңіс тутхан, ӱгредігде иң артых піліс кӧзіткен, пірге хазна сыныхтағларында пӧзік баллар алған оол-хыстар араласханнар. Прай 200 азыра кізі. Олар Ағбан пилтірі аймаандағы Хызылчарның суғ хайраллаӌаң орын хазында чыылысханнар. Выпускниктерге, культура программазынаң пасха, сіліг фейерверк позыдылған. Че фестиваль араласчыларының сағызында, писатель Александр Гриннің повезіндегі осхас, ӧкпең парустығ яхта халған полар! Ол наа чуртас пасталчатханының тании.
Пу фестивальда республиканың иң артых оол-хыстарына Хакасия пазы Валентин Коновалов ідӧк азых чол алғаан. «Сағынған сағыстарың прай толзын!» - теен ол.
Тиксі алза, 2022 чылда Хакасияда 11 классты 2500 азыра кізі тоосхан, 9 классты - 6 муң азыра.
Автор :
Александра КАРАМЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде