ПРАЙЗЫНА КӦЗІДІМ ПОЛЧАТХАН УЧЕНАЙ
29.06.2022
Хабарлар
Пайрамнығ тӧреен кӱні. Пӱӱл 23 июньда философия наукаларының докторы, Хакас Республика науказының саблығ деятельі Гавриил Гаврилович Котожеков 80 чазын таныхтирҷых
Гавриил Гаврилович Котожеков наукада даа уғаа хыйға, культурада даа уғаа чайаачы кізі полған. Анзынаңар піс улуғ ученай, режиссер, актер, хабарӌы, ӱгретчі полған кізінің тиксі чуртазынаңар газета-журналларда пазылған статьялар пастыра піліп алчабыс. Паза ол позы тимнеен монографиялары, ӱгредіг пособиелері, істезіг тоғыстары аның істеніс чолынаңар чарыда чоохтапчалар.
Г.Г.Котожеков 50 азыра пособие-монографиязын ирткен чӱс чылның 1970 - 1990 чылларындох чарыхха сығарған. Че оларны хығырзаң, автор ол тоғыстарны ам на пас салғанға тӧӧй.
Аның наука тоғыстарының ӧӧн темалары - национальнай культураның сидіксіністері, Россиядағы чоннар аразындағы хайызығлар, ол санда Хакасия, Алтай, Тыва чуртағӌыларының аразындағы. Аның кандидат паза доктор диссертациялары пуох темаларға чарыдылғаннар. («Интернациональное и национальное отношение в социалистической художественной культуре народов Южной Сибири», «Философско-социологический анализ национальной культуры»). Чоохтирға кирек, Гавриил Гаврилович Котожеков философия наукаларының докторы диссертациязын 1991 чылда арачылабысхан.
Ученай кізі хонӌых регионнар культураларын литература паза искусство кӧстеглерӌе тиңнестірӌең. Че ӧӧн хайығны ол Хакасия культуразына салӌаң. Хакас чон культуразы тилізінің ӧӧн кӧстеглерінеңер Гавриил Котожеков Новосибирскте сығарылған «Культура хакасов в условиях ускоренного социально-экономического развития Саянского ТПК» статьязында чарыт салған.
Совет Союзы изел сыхханда, хазнада паза пір сидіксініс сығыс килген - чоннарның сағыс-кӧрістері алызып, ал-алынӌа тудын сыхханнары (стратификация населения. - Авт.). Философ Котожеков ол темаа ідӧк асхынах нимес статья пас салған: «Этническая стратификация и национальная культура», «Этнополитическая ситуация в регионах РФ», «Социальная и социально-политическая ситуация в России. Анализ и прогноз». Пу тоғыстар Москвада чарых кӧргеннер.Чоохтирға кирек, Гавриил Гаврилович Котожеков кӧп статьяны Россияның пасха істезігӌілерінең хада-пірге пасхан. Анзы пістің ученай хазна синінде аарласта полғанын таныхтапча.
1990 чылларда Г.Г.Котожеков позының істезіглерінде хазнабыстың ӧӧн сидіксінізін таныхтап салған - нациялар аразындағы хырыс-табыстарның сылтағларын. Ол тоғыстарның санында полчалар: «Конфликтные факторы в межнациональных отношениях в республиках Южной Сибири», «Межнациональные отношения в Хакасии в оценках и представлениях, бытующих в массовом сознании», «Межнациональные отношения в регионах России и СНГ».
1993 чылда Н.Ф.Катановтың адынаң Хакас хазна университедінде культурология кафедразы азылған. Аның тӧстегӌізі - Гавриил Гаврилович Котожеков. Ученайның ӧӧн кӧстее Хакасиядағы наука-істезігліг институдында тоғынар специалисттерні (аспиранттарны) тимнирі полған! Ол анда чииттерге ӱс чыл «История культуры народов Саяно-Алтайского нагорья» паза «История культуры хакасского этноса» ӧнетін курстар апарған. Пу хысхаӌах тус аразына кафедра устағӌызы ідӧк студенттерге піліс пирӌең ӱгретчілер ӧмезін тӧстебіскен, оларнаң хада ӱгредіг программазын тимнебіскен.
1996 - 1998 чылларда, тізең, ол Хак-НИИЯЛИ-наң устаан. Алынӌа таныхтирға кирек аның «Ленин чолы» газетаның ӧӧн редакторы полғанын -1982 - 1996 чылларда. Паза аны пістің улуғларыбыс хоос фильмнерде суурынған актер чіли пілчелер. Ол Москвада журналистика факультедінде ӱгренчеткенде, МГУ-ның хойнындағы Культура туразының театр студиязын тоостыр. Хазнаның ӧӧн городынаң айланғанда, Гавриил Гаврилович Ағбандағы хакас телевидениезінде ӧӧн режиссер паза ӧӧн редактор полып тоғынған (1968 - 1977 чылларда).
Чахсы тоғызы ӱчӱн, Гавриил Гаврилович Котожековха 1992 чылда Хакасия Ӧӧркі Чӧбінің Аарластығ пічии пирілген, 1997 чылда Хакасия науказының саблығ деятельі полыбысхан. 1992 чылда Г.Г.Котожеков РАН-ның социальнай наукалар академиязының членіне табылған. 2001 чылдаң сығара Н.Ф.Катановтың адынаң Хакас хазна университедінде, культурология кафедразының пастағы устағӌызына чарыдып, «Катановтың хығырығларын» иртір сыхханнар.
Автор :
Ирина ТРОШКИНА, философия наукаларының кандидады, ХакНИИЯЛИ-ның экономика паза социология секторының устағҷызы
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде