АКТЁР, ХАБАРҶЫ, ФИЛОСОФ
29.06.2022
Хабарлар
«Котожековтың хығырығлары» наука-практикалығ конференция тузында Радион СУНЧУГАШЕВ,
Лариса АНЖИГАНОВА паза Юлия КОСТЯКОВА
Наука-практикалығ конференция. Хакасияның ӧӧн библиотеказында регионнар аразындағы «Котожековтың хығырығлары» наука-практикалығ конференция ирткен
Ол профессор, философия наукаларының докторы Гавриил Гаврилович Котожековтың 80 чазына чарыдылған. Аның тӧстегӌілері Хакасияның культура министерствозы, Н.Г.Доможаковтың адынаң национальнай библиотека паза «Хакас чирі» газетаның редакциязы полғаннар. Анда Н.Ф.Катановтың адынаң Хакас хазна университедінің, Хакасиядағы тіл, литература паза тархын наука-істезігліг институдының, Россияның наукалар академиязының Сибирьдегі пӧлиинің философия паза право институдының, Башкирияның, Туваның университет-институттарының философтары, культурологтары араласханнар. Орындағылары библиотеканың конференц-залынзар чыылысханнар, ыраххылары оларнаң видео пастыра тоғасханнар. Ӧӧн чоох журналист, актер, профессор, халых чуртас араласчызы Гавриил Гаврилович Котожековтаңар, аның чуртазынаңар, тоғызынаңар парған. Паза ученайлар этнология, культурология сурығларынӌа искіріглер иткеннер. Чоохтирға кирек, мындағ конференцияны чуртасха кирердеңер сағыс ХГУ-ның профессоры, философия наукаларының докторы Лариса Анжигановани полған.
- Піс прайзыбыс табырах иртчеткен туста чуртапчабыс. Че пістің арабыста саблығ чир-суғҷыларыбыстың пайрамнығ тӧреен кӱннері хаҷан полчатханын хайығда тутчатхан кізілер хайди даа табылчалар. Андағларның пірсі национальнай библиотеканың тоғынҷызы Татьяна Владимировна Кирбижекова полча. Ол Гавриил Гаврилович Котожековтың 80 чазын пірее хайди таныхтаалар теен. Піс аннаң чарасхабыс. Аның ӱчӱн улуғ алғыс ағаа. Алғыс сӧстерін ідӧк Хакасияның ӧӧн библиотеказының устағҷызы Юлия Костяковаа читірчебіс, удур парып, конференцияны иртірер орын пирген ӱчӱн. Піс Гавриил Гавриловичтің ӱгренҷілері полчабыс тиирге кирек. Аннаңар аны хайди даа сағысха кирерге кирекпіс, мындағ конференциялар иртіріп. Хакас хазна университедінде «Котожековтың хығырығлары» иртірілчелерӧк. Ол культурология кафедразының тӧстегҷізі полча нооза, - теен Лариса Викторовна, конференция азылғанда.
Сӧс ідӧк пирілген регионнар аразындағы наука-практикалығ конференцияның паза пір тӧстегӌізі полчатхан пірігістің устағӌызына - «Хакас чирі» газетаның ӧӧн редакторы Радион Сунчугашевке. Ол чыылған чонға Гавриил Гаврилович Котожековтың наукадағы паза журналистикадағы тоғызынаңар паза «Хакас чирі» газетаның пӱӱнгі улуғ тузазынаңар чоохтаан.
- Пілдістіг, пӱӱнгі кӱнде хабарлар таратчаң оңдайлар асхынах нимес. Че пістің газетаның позының кӧстеглері, пӧгіннері. Піс, иң пастап, республиканың тиксі чуртазын чарытчабыс, ікінҷізі, піс чоныбысха хабарларны пос тілінең читірчебіс! Газета тӧстегҷілерінің пӧгінін турыстыра толдырчабыс паза хакас тілін, культуразын хайраллир кирекке улуғ хозым итчебіс, - таныхтаан ол.
Піске, амғы тӧлге, алнында чуртаан саблығ чир-суғӌыларыбыстаңар олардаңар пазылған иргі статьялардаң на піліп ал турарға килісче. Философия наукаларының кандидады Ирина Чанкова Гавриил Гаврилович Котожековтаңар искіриин ідӧк Хак-НИИЯЛИ-дағы рукопись фондында паза Хакасияның национальнай архивінде хайраллалчатхан иргі пічіктер хоостыра тимнеен.
- Хакасияның тіл, литература паза тархын наука-істезігліг институдының холнаң пазылған чыындызында хайраллалчатхан пічіктер аразында Гавриил Гаврилович Котожеков пу наука учреждениезінзер тоғысха алылғаннаңар пічік пар. Анда ідӧк аның ӱгредиинеңер, сӧбірезінеңер, чуртапчатхан орнынаңар танығлар иділібӧк партыр. Пуох пічікте устағҷының тоғыс хоостыра хырығ озаринзар - 1986 чылда Моол чирінзер паза 1989 чылда Шри-Ланказар - чорыхха чӧргенінеңер танығларзар хайығ айландырылча, - чоохтап пирген Ирина Викторовна.
Гавриил Гаврилович 23 июньда 1942 чылда Алтай аймаандағы Хызыл Салда аалда тӧреен. Ӱгренген Ағбандағы национальнай школада. Аны тоозып, Хакас облазындағы телевидение паза радио комитедінде тоғынған. 1963 чылда Москвадағы хазна университедінің журналистика факультедінзер ӱгренерге кірібіскен. Олох туста ол пу ӱгредіг заведениезінің хойнындағы культура туразының театр студиязының араласчызы полыбысхан. Чоохтирға кирек, актерға ӱгреніп алған оол нинӌе-де хоос фильмде суурынған. Хазнаның ӧӧн городындағы университетті тоозып, Гавриил Котожеков чир-суунзар айланған. Аны телерадио комитедінзерӧк тоғысха алып алғаннар. Пастап ол анда студия режиссеры полған, анаң - ӧӧн режиссер, соонаң - Хакас телевидениезінің ӧӧн редакторы.
1977 чылда аспирантуразар кірібіскен. «Интернациональное и национальное в социалистической художественной культуре народов Южной Сибири» темаӌа философия наукаларының кандидады диссертациязын ол 1980 чылда арачылабысхан.
Аспирантура соонаң Гавриил Гаврилович Котожековтың чуртазы «Ленин чолы» газетанаң пик палғалыс парған.
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде