Валентин Коновалов пӱдiрiг министрiнең тоғасты
01.07.2022
Хабарлар
Хакасия пазы Валентин Коновалов пу неделяда Москвада тоғынча. Киҷее ол Россияның пӱдiрiг паза ЖКХ министрi Ирек Файзуллиннең тоғасхан.
Тоғазығ тузында республика пазы Хакасия правительствозының хай пiрее пастағларынаңар искiрген, олар федеральнай кiннiң хабазиин киректепчелер. Сурығлар регионның коммунальнай комплексiн нааҷылирына паза чурт пӱдiриин тилiдерiне теелчелер.
Тоғазығ араласчылары ӱзӱрген сурығларның пiрсi – Ағбан городтың суғ читiрҷең системазын нааҷылирынҷа тоғыстарны килiстiре федеральнай программаа кирердеңер. Ӏдӧк чонға кирек сурығлар санында – республиканың ӧӧн городында наа туралар пӱдiрiлчеткен орыннарзар транспорт инфраструктуразын тӧстирi.
– Россияның пӱдiрiг министерствозы мин кӧдiрген сурығларны ӱзӱрер паза федеральнай синде оларны чуртасха кирерге хабазар, - федеральнай министрнең тоғазығ салтарларынҷа искiрген Валентин Коновалов.
«Чурт паза город ибiркiзi» нацпроекттiң чуртасха кирiлчеткенi паза пӱдiрiг киреенiң тилiзi ӱзӱрiлген. Республика пазының таниинаң, пӱӱн пӱдiрiг кирее – ол экономиканың ӧӧн тибiретчеткен кӱзi паза Хакасияның чуртас-экономиказының тилiс стратегиязының ӧӧн кӧстеглерiнiң пiрсi. Пiстiң республика хазнаның чылдаң чылға чурт пӱдiриинде чахсы чидiглер кӧзiтчеткен он регион санына кiрче. Ӏди 2021 чылда Хакасия федерация турғысхан кӧзiдiгнi аза халған.
– Пӱдiрiгдегi чидiглер ирткен чылда пiстiң республиканы Россияҷа артыхтар санына сығарыбысханнар. Ол уғаа кӧрiндiре салтар, пӱӱл пiс ол синнi тударға, турғысхан кӧстеглернi тиксi толдырарға пӧгiнчебiс, – таныхтаан Хакасия пазы.
Пӱӱнгi сананыстарҷа 2022 чылның пастағы пис айына чурт квадрат метрлерi ирткен чылның пуох тузынаң 32%-ке кӧп тимге сығарылған. Хакасияда «Арығ суғ» федеральнай программа маңнаныстығ чуртасха кирiлче. Анзын Россияның пӱдiрiг паза ЖКХ министрi Ирек Файзуллин таныхтаан:
– Чон чахсы суғнаң тузаланар оңдай тӧстирi – Россияның пӱдiрiг министерствозы регионнарнаң хада пӧкчеткен кирек сурығ. Хакасияда ол сурыға алынҷа хайығ салылча. Пӱдiрiг табырах тилiпчеткеннеңер, чуртас оңдайларын чахсыландырарға паза экология кирексiнiстерiне тиксi нандырчатхан инфраструктураны тӧстирге кирек.
Хакасия пазы Ирек Файзуллинге республикаа чурт-коммунальнай хониинда паза пӱдiрiгде, чонға кирек программаларны чуртасха кирерiнде хабасчатханы ӱчӱн алғызын читiрген.
Автор :
Хакасия пазы паза Хакасия правительствозы пресс-службазы
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы