НАА ТУРАЛАРЗАР ЧОЛЛАР КИРЕК
06.07.2022
Хабарлар
Хакасия пазы Валентин КОНОВАЛОВ паза республиканың пӱдіріг министрі Валерий КЕЛИН
Россияның пӱдіріг паза ЖКХ министрі Ирек ФАЙЗУЛЛИННЕҢ тоғасчалар
Тоғыс чорығы. Хакасия пазы Валентин Коновалов ирткен неделяда Москва городта тоғыс чорығынаң пол килген
ПӰДІРІГ МИНИСТРІНЕҢ ТОҒАЗЫҒ
Хандых айының 30-ҷы кӱнінде Хакасия пазы Валентин Коновалов Россияның пӱдіріг паза ЖКХ министрі Ирек Файзуллиннең тоғасхан. Тоғазығ тузында республика пазы Хакасия правительствозының хай пірее пастағларынаңар искірген, олар федеральнай кіннің хабазиин киректепчелер. Сурығлар регионның коммунальнай комплексін нааҷылирына паза чурт пӱдіриин тилідеріне теелчелер.
Тоғазығ араласчылары ӱзӱрген сурығларның пірсі - Ағбан городтың суғ читірҷең системазын нааҷылирынҷа тоғыстарны килістіре федеральнай программаа кирердеңер. Ідӧк чонға кирек сурығлар санында - республиканың ӧӧн городында наа туралар пӱдірілчеткен орыннарзар транспорт инфраструктуразын тӧстирі.
- Россияның пӱдіріг министерствозы мин кӧдірген сурығларны ӱзӱрер паза федеральнай синде оларны чуртасха кирерге хабазар, - федеральнай министрнең тоғазығ салтарларынаң ӱлескен Валентин Коновалов.
«Чурт паза городтағы оңдайлар» нацпроекттің чуртасха кирілчеткені паза пӱдіріг киреенің тилізі ӱзӱрілген. Республика пазының таниинаң, пӱӱн пӱдіріг кирее - ол экономиканы тибіретчеткен ӧӧн кӱс паза Хакасияның чуртас-экономиказының тиліс стратегиязының ӧӧн кӧстеглерінің пірсі.
Пістің республика чылдаң чылға чурт пӱдіриинде чахсы чидіглер кӧзітчеткен хазнаның он регион санына кірче. Іди 2021 чылда Хакасия федерация турғысхан кӧзідігні пілдірте аза халған.
- Пӱдірігдегі чидіглер ирткен чылда пістің республиканы Россияда артыхтар санына сығарыбысханнар. Ол уғаа кӧріндіре салтар, пӱӱл піс ол синні тударға, турғысхан кӧстеглерні тиксі толдырарға пӧгінчебіс, - таныхтаан Хакасия пазы.
Пӱӱнгі сананыстарҷа, 2022 чылның пастағы пис айына ирткен чылның олох тузынаң 32 %-ке кӧп чурт тимге сығарылған.
Хакасияда «Арығ суғ» федеральнай программа чуртасха маңнаныстығ кирілче. Анзын Россияның пӱдіріг паза ЖКХ министрі Ирек Файзуллин таныхтаан:
- Чонға чахсы суғнаң тузаланар оңдай тӧстирі - Россияның пӱдіріг министерствозы регионнарнаң хада пӧкчеткен кирек сурығ. Хакасияда ол сурыға алынҷа хайығ салылча. Пӱдіріг табырах тиліпчеткеннеңер, чуртас оңдайларын чахсыландырарға паза экология кирексіністеріне тиксі нандырчатхан инфраструктураны тӧстирге киректелче.
Хакасия пазы Ирек Файзуллинге республикаа чурт-коммунальнай хоныхта паза пӱдірігде, чонға кирек программаларны чуртасха кирерінде хабасчатханы ӱчӱн алғызын читірген.
«СКОЛКОВО» ЧЫЫНДЫНАҢ ХАДА-ПІРГЕ
Хакасия правительствозы «Сколково» чыындынаң хада-пірге республикада инновация кӧстеен тилідерге пӧгінче. Хада-пірге тоғынар кӧстеглердеңер чоох парған «Сколково» чыындының вице-президенті Юрий Сапрыкиннең паза регион тилізінің департаментінің хада-пірге тоғынарынҷа директоры Олег Макаровнаң хада тоғазығда.
Кӧстеглернің пірсі - чырғалзар сығарар алнында технологиялығ стартаптарға хабасчаң проекттерні республикада чуртасха кирері. Анда Хакасия вузтарының студенттеріне паза ӱгретчілеріне ӧткін аралазарға чарир, уламох кемге «Сколковоның» программалары хынығ.
Хада-пірге тоғынҷаң паза пір кӧстег - «Кимдегі Сибирь» наука-ӱгредіг кіні Н.Ф.Катановтың адынаң Хакас хазна университедінде тӧстеен Киректер чыындызы хабазии. Наука кіні экология сурығларын пӧгерінең айғасча, предприятиелерге ноған технологияларны тимнепче, ибіркі чир-чайаанны хайраллирынҷа тоғынҷыларны тимнирге полысча.
Ідӧк Хакасияда пӧзік технологиялар технопаркын тӧстир оңдайлар ӱзӱрілген, ол технологияларнаң палғалыстығ пос киреен регионда тилідерге чахсы хозым поларҷых. Анзы, тізең, наа тоғыс орыннары, бюджетсер кірчеткен налогтарның ӧзізі.
СПОРТ МИНИСТРІНЕҢ ТОҒАЗЫҒ
Хакасия пазы Валентин Коновалов Москвада ідӧк Россияның спорт министрі Олег Матыциннең тоғасхан. Пастыхтарның ӱзӱриине сығарылған ӧӧн сурығлар санында республикада физическай культуранаң паза спортнаң айғазарға оңдайларны алғыдары, Хакасияның спорт тураларын, ол санда пустығ чабых аренаны паза ат чарызынҷа спорт манежін читіре пӱдірерге, оларға пӱдіріглерін тимге сығарарға кӧстегліг хазна программаларынҷа федеральнай бюджеттең ахча хозары полған.
- Олег Васильевич республикабысха спорт инфраструктуразын тилідерге федеральнай синде хабазар прай оңдайларны табарға тимдезін искірген, - нандырған Валентин Коновалов, федеральнай министрнең тоғазығның салтарларын идіп.
2021 чылда «Россия - спорт хазназы» чоннар аразындағы форумда Россияның спорт министерствозы паза Хакасия правительствозы хада-пірге тоғынардаңар паза хабазызардаңар чӧптезігде хол салылған.
Хакасия правительствозы физическай культуранаң паза спортнаң прайзы айғас полар оңдайлар тӧстирге кӱстенче. Республикада 2030 чылға теере физическай культураны паза спортты тилітчең стратегия тоғынча, Чон спорт кӧрімнерінің федерациязы тӧстелген, спортсменнерге паза тренерлерге хоза хабазығ кӧрімнері кирілген. Чыл сай республиканың адынаң аймах синдегі марығларда хакас спортсменнері постарын турыстыра кӧзітчелер, сыйыхтар ағылчалар.
2021 чылда азылған иң килкім спорт тураларының санында Ағбан городта стол теннизінің кіні паза чӱгӱрҷең чоллығ футбол чазызы полғаннар, Харатаста - физкультура паза хазых пиктеҷең комплекс. Тиксі алза, ирткен чылда регионда 31 наа спорт орны хозылған, нинҷе-де спорт туразы нааҷылалған.
Пӱӱл Хакасияда ідӧк спорт туралары пӱдірілче паза нааҷылалча, учреждениелернің физическай культуранаң паза спортнаң айғасчаң тиріглері паза пасха даа ниме-ноозы нааға алыстырылча.
Автор :
Хакасия пазының паза Хакасия правительствозының пресс-службазы
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде