ЭЭЗІ ЧОХ АДАЙЛАРҒА - ИСТІГ ЧУРТ
06.07.2022
Хабарлар
Санитар Анатолий КУЛИМЕЕВ
приюттың пастағы чуртағҷыларынаң
Наа пӱдіріг. Пу наада Ағбанда сылтағ чох хазырланчатхан адайларға приют азыл парған. Аны идінҷек, «Хада» кооперативтің кнезі Максим Давыдкин пӱдірген
Ағбанның Мир орамазында адайларға чабых приют азылчатханында Хакасия пазы Валентин Коновалов, регионның аал хонии паза ас-тамах министрі Сергей Труфанов аралазып, адайлар хайдағ оңдайларда чуртирын кӧргеннер. Приют промышленнай орында орныхча. Че хости алынҷа туралар пар даа полза, чуртағҷыларға адайларның ӱрізі истілбеске кирек, аның пӱдіриинде прай кирексіністер санға алылған.
Максим Давыдкиннің чооғынаң, приютха адайлар ӱр нимеске (10 кӱнге) кирілерлер. Пу тус аразына оларны сімҷібісчелер паза оларға алыныстаң прививка турғыс пирчелер. Аннаңар анда ікі мал имҷізі, оларның ӱс полысчызы тоғынча. Сылтағ чох хазырланчатхан адайларны кинолог ӱгредер. Алыспаан адайлар пу приютта чуртастары тооза чуртирлар. Че адай ноға сылтағ чох хазырланчатханын піліп алар ӱчӱн, ӧнетін комиссия тӧстелер. Хакасияның аал хонии паза ас-тамах министерствозының специалисттері кинологтарнаң паза ветеринария департаментінең хада адайлар чонға хорғыс ағылчатханын, сылтағ чох хазырланчатханын піліп алар ӧнетін оңдайлар тимнебіскеннер.
Мал имҷізі полысчыларының пірсі Анатолий Кулимеев тоғызынаңар чоохтап пирген:
- Мин адайларны кӧрчем паза мал имҷізіне полысчам. Пӱӱн пастағы кӱн тоғынчам. Адайларны кӱнде ікі хати хуруғ чииснең азырапчабыс. 100 граммда 450-ҷе килокаллорий. Пір адайға пір саңай 200-че грамм азырал пирчебіс. Пеер ағылған адайларны чуубысчабыс, анаң мал имҷізі оларны кӧрче. Адайлар вальерін кӱнде алты хати арығлапчабыс.
Пӱӱнгі кӱнге приютта ӱр нимеске алты ла адай тудылча. Оларны Харатастағы «Забота» волонтёр чӧрімі пирген.
- Пісте 150-ҷе адай паза 250-ҷе хоосха чуртапча. Олар ээзі чохтар алай чіт парғаннар. Піс оларға «паарсах холлар» тілепчебіс. Пу тоғыста прай оңдайларнаң тузаланчабыс: соцсетьтернең, Авито-зар чарлағ пирчебіс алай чаҷында пазылған чарлағларны ілчебіс. Кӱнде пір-ікі адайны кізілерге пир салзабыс, ӧрінчебіс. Кізілер кӱҷӱгестерні аларға хынчалар. Улуғ адайны аларға хыныхсыбинҷалар. Пістің, тізең, кӧбізі улуғ, ағырығ. Кізілер ағырыбысхан адайларны тастабысчалар. Піс оларны имнебісчебіс, сімҷібісчебіс.
Приютсар пирілген адайлар ағырығ полғаннар. Оларны имнеп, прививка турғысхабыс. Пу амыр адайлар. Амды оларны приютта азырирлар. Оларға ээлер табылған ползалар... - теен «Забота» фондтың устағҷызы Вера Зубарева.
Пӱӱл приютта 250-ҷе адай чуртадары кӧрілче. Оларны азырирына Хакасияның аал хонии паза ас-тамах министерствозы ахча пирер. Килер чылда 450 адайны чуртадарлар. Максим Давыдкиннің чооғынаң, ол син адайны азырирына 300 килограмм азых кирек, айда - 10 тонна. Чиисті сыбыра садар поставщик табылбаанда, идінҷек адай азыралын тимнепчеткен оборудование садызып алған, региондағы фермерлернең чӧптезіг идіп, амды адай чиизін тимнирінең айғасча. Хысхыда адайлар чуртапчатхан тура одынылар. Аның ӱчӱн приютнаң хости алынҷа котельнай пӱдірілген.
Хакасия бюджедінең пір адайны тударына кӱнде ортымахти 183 салковай пирілче. Пӱӱл пістің приютта 250 адай чуртир. Чыл сай 3600 адай вакцинация иртер паза оларны сімҷирлер.
- Приют пӱдірері - аарлығ тоғыс. Республика пу пастаға хабазар. Аал хонии министерствозы пу сурығҷа тоғыныбысхан. Приютта 600 адайға орын пар. Анзы сидіксіністі толдыразынаң чаппинча. Пістің чыл сай 3 муң азыра ээзі чох адай пол килче. Пу пастағы хаалағ, аны пӧгібізер ӱчӱн кӧп ахча киректелче. 3 муң адайға приютты пӱдірібізер паза оларны пір чыл чуртадар ӱчӱн 700 миллионча салковай кирек. Аннаңар амды пу сурығҷа тоғынчабыс. Пу чағында приют толдыра кӱзінең тоғын сығар. Че пасха саринаң, федеральнай законодательстваа алызығлар кирер сурығ халча, - теен Валентин Коновалов.
Таныхтирға кирек, приютта ӱр нимес чуртапчатхан адайларны приют19.рф сайтта кӧріп аларға чарир. Приют сылтағ чох хазырланчатхан адайларға кӧрілген дее полза, пу адайлар амырлар паза ээлерні тілепчер.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде