ПӰДІРІГЛЕР НААҶЫЛАЛЧА, ЧОНҒА - ӦРІНІС
08.07.2022
Хабарлар
Бородинодағы котельнайны кӧрчеткен туста
Тоғыс чорығы. Хакасия пазы Валентин Коновалов тоғыс чорығынаң Боград аймаандағы Бородино аалзар чӧрген
Республика устағҷызы иң пурнада аалдағы котельнайны кӧр килген. Пӱӱнгі кӱнде анда тыхтағ тоғыстары апарылча.
Хаҷан-да Совет Союзы тузында, пасха ааллардағыох чіли, Боград аймаандағы Бородино аалда уғаа улуғ паза кӱстіг совхоз полған. Андада пӱдірілген котельнай мал-хой тутчатхан пірігістің тоғынҷаң орыннарының прайзынзар чылығ читірҷең. Аннаң ідӧк школа, олған сады, Культура туразы, спорт комплексі чахсы тузаланҷаңнар. Орта чоохтаза, котельнайның кӱзі илбек полған. Че пӱӱнгі кӱнге читіре ол илееде иргілен парчатпас па. Аннаңар аны хайди даа нааҷылирға кирек полған.
- Тиксі алза, тыхтағ тоғыстарына 3 миллион салковай позыдыл парған. Оӧн тоғыстарның пірсі 1№ котельнайны тыхтабысханы полча. Чылығ таратчаң сетьтерні нааҷылирына чӧптезіг иділ парғанох. Подрядчик ол тоғысты пӱкӱлеезінең тоос салған. Ахчазы ағаа ідӧк толдыразынаң тӧлел парған, - чоохтап пирген Боград аймаа пазының ЖКХ паза пӱдіріг сурығларынҷа орынҷызы Елена Левакова.
Хайди ол аннаң андар чарытхан, 2022 чылның 1 майынаң сығара, Хакасия законына алызығлар кирілген соонда, Бородинодағы котельнай Боград аймааның холына пиріл парған. Аннаң ідӧк аалдағы социальнай объекттер тузаланчалар. Чоохтирға кирек, пу аалдағы ЖКХ системазын нааҷылирына Хакасия правительствозынаң асхынах нимес ахча позыдылча. Халғанҷы ӱс чыл аразына ла 35 миллион азыра салковай пирілген!
- Ахчанаң чахсы хабазығ иділчеткенде, салтарлар андағох чахсы - пістің котельнай ікі чыл изере пір дее сайбағ чох тоғынды, - теен Елена Валерьевна.
Валентин Коновалов полған объекттернің пірсі - спорт комплексі - ідӧк ирткен чӱс чылның 80 - 90 чылларында пӱдірілген. Бородино аал чӧбінің пазы Елена Думбровскаяның искіриинең, анда халғанҷызын он писче чыл мының алнында тыхтағ тоғыстары иділген.
- Ирткен чылда спорт комплексін нааҷылап пирер сурыныснаң Хакасия пазы Валентин Коноваловсар чон позы айланған. Ол андада піссер ідӧк тоғыс хоостыра кил парған. Мындағ спорт комплексі Боград аймаанда пір ле! Хакасия правительствозы пирген ахчаа - 5 миллион азыра салковай - канализация паза чылығ пирҷең системалар пӱкӱлеезінең алыстырыл парғаннар, спорт комплексінің хыры нааҷылалған. Пӱӱнгі кӱнде душевой кабиналар, тасхын чӧрҷең орыннар тимнелчелер, анаң залның полы, алыстырылып, сырлал парар. Наа ӱгредіг чылына спорт комплексі азыл парарға кирек, - теен Елена Валерьевна.
Бородинодағы спорт комплексінеңер хысхаҷахти чоохтаза, анда аймах, республика синіндегі спорт марығлары тӧреміл иртірілчелер. Апарылчатхан секцияларның аразында гиря спортын алынҷа адирға чарир. Тренер Александр Шепелев полча. Аның ӱгренҷілері аймах, республика, хазна синіндегі марығларда сыйыхтығ орыннарны удаа холға кирчелер. Пылтыр Бородинодағы кічіг частығ спортсменнер Крымда полғаннар, алында Татарстанзар чӧргеннер. Амды пір хызыҷах Ярославль городсар парарға тимненче. Ол пу спорт кӧрімінҷе хазна синіндегі ӱгренҷілернің спартакиадазына улуғ таллағны иртіп алған.
Паза Валентин Олегович Бородинодағы ортымах школада аалҷы полған. Чоохтирға кирек, орындағы ӱгредіг учреждениезінің туразы 1973 чылдох пӱдірілтір. Аннаңар аны ідӧк хайди даа нааҷылабызарға кирек. Орындағы ӱлгӱ хайдағ-да полызығ пирерге кӱстенче, че анзы читкіҷе нимес.
Іди халғанҷы ӱс чыл аразына школада кӧзенектернің чардығы алыстырыл парған, ӧрттең паза терроризмнең тоғыр кӱресчең системалар нааҷылалғаннар. 2020 чылда пасталығ класстардағы олғаннарға наа мебель турғызылған паза «Точка роста» программа хоостыра компьютер клазы тӧстелген.
Чуртасха кирілчеткен кибір хоостыра Хакасия пазы Валентин Коноваловтың тоғыс чорығы орындағы чоннаң чоох алысханынаң тоозылған. Ол тоғазығ Бородинодағы культура туразында ирткен. Республика устағҷызына сурығлар пирерге ідӧк чағынғы ааллар чуртағҷылары кил парғаннар - Толчадағылар паза Тайғалығдағылар.
Олар Хакасия пазына чолларны иптирінең, чуртирға истіг оңдайлар тӧстирінең, ааллардағы иргі учреждениелерні нааҷылирынаң палғалыстығ сурығлар пиргеннер. Валентин Коновалов, прайзын истіп, кирек министерство-ведомстволарға ол сурығларны Боград аймааның устағ-пастаанаң хада пӧгерге полыс пирерге чахығ пирген.
- Прай ниме муниципалитеттер ӧткінінең палғалыстығ. Пӱӱнгі кӱнде аймах синніг программалар асхынах нимес нооза. Аннаңар оларда аралас турарға, пічіктер чыырында ідӧк чапчаң хайынарға кирек, - теен Валентин Олегович.
Автор :
Александра КАРАМЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде