КУЛЬТУРАНЫ ТИЛІДЕРІ - ӦӦН ПӦГІННЕРНІҢ ПІРСІ
13.07.2022
Хабарлар
Хакасия пазы Валентин КОНОВАЛОВ паза Россияның культура министрінің орынҷызы Ольга ЯРИЛОВА
Культура. Хакас Республикада Россияның культура министрінің орынҷызы Ольга Ярилова аалҷы пол парыбысхан
РОССИЯНЫҢ КУЛЬТУРА МИНИСТРІНІҢ ОРЫНҶЫЗЫ ОЛЬГА ЯРИЛОВА ПОЗЫНЫҢ ТОҒЫС КӰНІН АҒБАН ГОРОДТАҒЫ Л.Г.УСТИНОВТЫҢ АДЫНАҢ ХАКАС НАЦИОНАЛЬНАЙ «НЫМАХ» КӦКЛӦ ТЕАТРЫНАҢ ПАСТААН. «НЫМАХ» ТЕАТР ПОЗЫНЫҢ ӦРГЕ ТУРАЗЫНДА ПӰКӰЛЕЕ ТЫХТАҒ ТОҒЫСТАРЫН ИРТІРЧЕ. АНДАҒЫ ПӰДІРІГҶІЛЕРНІҢ ЧООҒЫНАҢ, ОЛАР ПРАЙ ТОҒЫСТАРНЫ КИЛЕР ЧЫЛДА ТООС САЛАРЛАР. КӦКЛӦ ТЕАТРЫНЫҢ ТАСТЫ-ІСТІ АРИНҶА АЛЫС ПАРАР. РОССИЯНЫҢ КУЛЬТУРА МИНИСТРІНІҢ ОРЫНҶЫЗЫ ОЛЬГА СЕРГЕЕВНА ПУ ТОҒЫСХА ФЕДЕРАЛЬНАЙ БЮДЖЕТТЕҢ ПОЛЫС ПИРЕРГЕ МОЛҶААН.
Анаң министр орынӌызы Ағбандағы «Ровесник» чииттер библиотеказында полған. Библиотекада амғы тусха кирек прай ниме-ноо иділ парған. Пеер ӱгренӌілер паза хости университеттегі студенттер пілістер аларға кил парчалар. Мында книгалар хығырар оңдай тӧстел парған паза компьютернең тоғынарға чарир.
Ӧӧн тоғазығ полған Л.Р.Кызласовтың адынаң Хакас национальнай чир-суғ ӱгренӌең музейнің туразында. Пастап аарлығ аалӌыны кибір хоостыра теелбек ойынынаң удурлааннар. Аны толдырғаннар «Кӱн сузы» теелбек ӧмезінің артисттері. Чоохтирға кирек, культура министрі орынӌызынаң тоғазарға республикадағы аал-городтардағы культура тоғынӌылары килгеннер. Олар мында семинар оңдайынаң тоғынғаннар.
Москвадаң килген аалӌыны паза чыылысхан чонны чылығ сӧстернең удурлаан Хакасия пазы Валентин Коновалов. Аның чооғынаң, Россиядағы «Культура» национальнай проекттің чарадығларын Хакасияда чуртасха кирері иң кирек пӧгіннернің пірсі полча. Национальнай проект хоостыра Хакасияда культура объекттерін пӱдірерінде кӧп ниме иділ парған. Іди 2019 - 2021 чылларда Хакасияда «Культура» национальнай проекттің чарадығларын чуртасха кирер ӱчӱн федеральнай бюджеттең 149,3 миллион салковай позыдылған. 2022 чылға 251,5 миллион салковай пирері кӧрілче. Валентин Олегович Россияның культура министерствозын Хакасияа тӱзімніг полысчатхан ӱчӱн чылығ алғыстаан.
Хакасия «Культура» национальнай проектте 2019 чылдаң сығара араласча. Амғы тусха теере Алтай аймаандағы Ызых посёлокта паза Пии аймаандағы Буденовка аалда культура туралары пӱдіріл парғаннар, пӱкӱлее тыхтағ тоғыстары 24 аал клубында паза олғаннарның ікі искусство школазында толдырыл парғаннар.
Асхыс, Боград, Ағбан пилтірі паза Шира аймахтарына тӧрт автоклуб пирілген. Олған музыка школаларына наа кӧг тиріглері алылғаннар паза даа пасха полызығлар полғаннар.
Россияның культура министрінің орынӌызы Ольга Ярилова позының чооғында таныхтаан, Хакасияда национальнай проект тӱзімніг тиліпче. Мында нацпроект хоостыра креативнай индустрияларнаң палғалыстығ наа пӧліктер азылчалар. Сибирьдегі федеральнай округта пӱӱл ол оңдайнаң 7 школа тоғынып пастир. Ол пӧгінге 350 миллион салковай федеральнай бюджеттең позыдылча. Ағбан городта даа андағ школа азылар. Анда 5 студия тоғынар: кино, анимация, ӱн режиссуразы, видео паза дизайн.
Хакас Республика культура сурығларына улуғ хайығ салча. Іди килер чылға культураның 11 учреждениезінде пӱкӱлее тыхтағ тоғыстарын иртіреріне федеральнай бюджеттең ахчалығ полызығ пиреріне сурыныс пічіктері пиріл парғаннар. Ол сурыныс пӧгіл парарына ізеніс пар.
Анаң Россияның культура министрінің орынӌызы Ольга Ярилова республикадағы культура тоғынӌыларынаң алынӌа семинар тоғызын апарған.
Автор :
Илья ТОПОЕВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде