САД ПІРІГІСТЕРІ ТИЛІЗІНЕ - АХЧАЛЫҒ ХАБАЗЫҒ
13.07.2022
Хабарлар
Ӧӧркі Чӧп кнезінің орынҷызы Юрий ШПИГАЛЬСКИХ «Кӧк хайа» СНТ-ның кнезі Степан ШАНДРОҒА сертификат читірче
Хазна хабазии. Н.Ф.Катановтың адынаң Хакас хазна университедінің аал хонии институдында сад пірігістері аразында ирткен грант марииның чиңісчілеріне сертификаттар читірілген
Оӧркі Чӧп кнезінің орынӌызы Юрий Шпигальских, сад пірігістерінің кнестеріне сертификаттар читіріп, оларны чиңіснең алғыстаан.
- Садтар паза ӱӱӌіктер ӧскірчеткеннерге хазна хабазии 10 азыра чыл мының алнында пиріл сыххан. Пу тусха теере хабазығның сині чыл сай пасхалалған. Грант аларына марығда араласчылар саны хызырылча. Сылтағ - піреезі хорадығларның 10% пос ахчазын хос полбинча, пірее пірігістернің ирткен чылда алған гранты хоостыра алымнары пар. Пӱӱл, ирткен чылдағызынаң тиңнестірзе, хабазыға позыдылған прай ахча пиріл парған. Пылтыр 4 миллионҷа салковай тузаланылбин халған, - таныхтаан Юрий Шпигальских.
Аның таниинаң, халғанӌы чылларда кізілер чир тамаан кӧп саларға, чистектіг ағастар паза фрукттар ӧскірерге кӱстенчелер. Ағаа хоза, дачаларда, пӱдірініп, илееде кізі чыл ибіре чуртапча. Нименең ол палғалыстығ? Дачаларда чуртир оңдайлар тӧстелче. Хай пірее сад пірігістерінде чарытхы, суғ чыл ибіре полча, чоллар тыхталча.
- 15 чыл мының алнында дачаларда хайдағ оңдайлар полғанын чахсы оңнапчам. Ол туста кӧбізі дачаларда чарытхы чох полған. Эмектерні, оғырлап, тимір-тис чіли садыбысчаңнар. Амды прай оңдайлар тӧстелче. Кізілер чир тамаан кӧп ӧскірерге кӱстенчелер. Рыноктарда дачада ӧскірілген чир тамаа садылчатханын прайзы сизінче. Че иң ӧӧні - пістің мында фрукттар маңат ӧсчелер. Рыноктарда орындағы яблоколар илееде садылча. Чуртағҷылар посха чир тамаан ӧскіріп алчалар паза артханын садыбысчалар. Пеер Хызылчар крайының алтынзархы аймаанаң киліп, чир тамаан, садызып, машиналарнаң апарыбысчалар. Тилекейде сидік экономика кирее тузында дача участогында чир тамаан хайди даа ӧскірерге кирек. Чуртағӌылар анзын пілчелер, аннаңар дачаларында матап тоғынчалар, - теен Юрий Шпигальских хабарӌыларға.
Хакасияның аал хонии паза ас-тамах министрі Сергей Труфанов сертификаттар алғаннарны чиңіснең алғыстаан, проекттерін чуртасха маңнаныстығ кир саларға алғаан паза мындағ оңдайнаң сыбыра чыылызарға чӧп пирген. Аның таниинаң, сад пірігістерінің кнестері, чылда нинӌе-де хати ӧменең чыылызып, сидіксіністерінең алай опыттарынаң ӱлезерӌіктер.
Пӱӱл марығда 22 дача пірігізі араласхан, оларның 19-зы чиңіске турысхан. Оларға аймах пӧгіннерге тиксі 12 миллион салковай пирілген. Пір пірігіске 2 миллион салковайға сертификат читірілген, пис пірігіске - пірер миллион салковайға, пасхазына - 35 муң салковайдаң 700 муң салковайға теере. Хазна хабазии чоллар тыхтирына, суғ читірер оңдайларны тӧстиріне, чарытхы тартарына кӧрілче.
Нымырттығ посёлоктағы «Таёжный» СНТ чиңісчілер санында.
- Ахчаны чоллар тыхтирына паза Вертикальнай орамазар чарытхы тартарына хорадарбыс. Ол орамада кізілер чуртапчалар, че чарытхы чоғыл. Тірӧстер турғызарға аарлығ, аннаңар чарытхыны чир алтынӌа тартарбыс. Іди ниикке сых парар.
Пу тоғыстарға 1 миллион 300 муң салковай хорадылар. 300 муң салковайны сад пірігізі кізілерінең чыып алғабыс. Пірігіссер 911 сад участогы кірче. Пістің сад пірігізі тағда орныхча, андар машиналығ сых полбас, чазағ сығарға аар. Изелчеткен чолларда сай урылар.
Пӱӱл суғнаң сидіксіністер пар. Нымырттығ ӧзенде суғ соол парған. Піс аннаң суғ алӌаңмыс. Суғны пирӌең график алыс парған. Амды, наңмырлар чаапчатханда, сала оой полыбысхан, - теен «Таёжный» сад пірігізінің кнезі Николай Жилов.
«Кӧк хайа» сад пірігізі грант ахчазын суғ насозын паза чарытхынаң тоғынчатхан двигательлер аларына хорадар. Насос станциязын нааӌылабыссалар, иргі насостар алыстырылар. Пірігіссер 11,5 муң дача участогы кірче. Пылтыр «Таежный» СНТ марығда араласханох паза чиңісчі полған. Грант ахчазына суғ таратчаң трубалар алылған. Пӱӱл насос станциязы тиксі нааӌылалча, ол пір метрге кӧдірілген. Пылтыр, суғ тасханда, дачаларзар суғ тарадарынӌа сидіксіністер полған. Сад пірігізіне пір ай суғ пирілбеен.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде