ТУРЫСТЫРА СӦБІРЕЛЕРГЕ - ТУРЫСТЫРА СЫЙЫХ
13.07.2022
Хабарлар
Чиңісчі УЗНАЗАКОВТАРНЫҢ сӧбірезі
Сыйыхтас. Сӧбіре, кӧӧленіс паза киртініс кӱнінде Хакасияның ӧӧн городы устағ-пастаанда Ағбанның турыстыра сӧбірелеріне «Хыныс паза киртініс» медальлар паза «Турыстыра палалар ӧскірчеткен ӱчӱн» дипломнар читірілгеннер
Пастағы сыйыхнаң 7 сӧбіре таныхтатхан. Оларның санында Шутылевтар полғаннар. Вадим Владимирович паза Светлана Викторовна 27 чыл хада чуртап парирлар. Ирепчінің 13 пала - 6 оол, 7 хыс. Сӧбіре пазы тимір чолда істенче, ипчізі - Ағбан городтағы «Машенька» олған садында. Чоохтирға кирек, 2018 чылда Россия президенті Владимир Путин Шутылевтарға «Родительская слава» орден читірген.
«Хыныс паза киртініс» медальға ідӧк Олег паза Елена Пагельстер турысханнар. Олар 33 чыл мының алнында хоных хон салғаннар. Олег Игоревич, пабазыох чіли, чаа службазын таллап алған. Пӱӱнгі кӱнде ол запастағы подполковник полча, халых тоғызынаң айғасча, чааңылар сӧбірелеріне хабасча. Елена Петровна, тізең, амғы туста Хакасияның гидрометеорология кінінде инженер полып тоғынча. Ирепчінің оолғы Игорь ідӧк чаа службазында. Ол - улуғ лейтенант.
Паза Ағбан городтың устағ-пастаа 2009 чылдаң сығара городтың сӧбірелері аразында марығ иртірче. Анда тӧрт номинация кӧріл парған: «Істеніс династиязы», «Алған палаларны ӧскірчеткен сӧбіре», «Кӧп палалығ сӧбіре», «Чиит сӧбіре». Анаң Сӧбіре, кӧӧленіс паза киртініс кӱнінде полған на номинацияның чиңісчізі адалча, оларның полғанына ла 50 муң салковайға тиңнелчеткен сыйых паза «Турыстыра палалар ӧскірчеткен ӱчӱн» дипломнар читірілче.
Пӱӱл дее ол марығ турыстыра ирт парған. Пастағы номинацияда прай 21 сӧбіре араласхан. Чиңісчі, тізең, Узназаковтарның имҷілер сӧбірезі пол парған. Оларның хада-пірге істеніс стажы 258 чылға тиңнелче! Сӧбіренің имҷілер чолын имҷі-хирург, Хакасияның саблығ имҷізі Иван Михайлович Узназаков пастаан. Пӱӱнгі кӱнде оларның тӧлдең тӧлге салылчатхан чолынҷа 11 кізі парча - кем-де имңі полча, хайзыда фельдшер. Хайди таныхтапча Раиса Ивановна Узназакова, сӧбіре тӧстирі паза аны хайраллап халары - уғаа нандырығлығ кирек.
- Паза сӧбіренің иң ӧӧні палалар полча. Оларны ӧскіріп алар ӱчӱн, кӧп кӱс салылча. Пістің амды читі парха. Тӱрчедең сигізінҷізі тӧрир, - ӱлескен Раиса Ивановна.
«Алған палаларны ӧскірчеткен сӧбіре» номинацияда пу чыл тӧрт сӧбіре араласхан, чиңісчі Артём паза Людмила Калужскийлер полыбысханнар. Оларның постарының ікі пала. 2012 чылда сӧбірелерінзер Людмила Геннадьевнаның чеені Даринаны алып алғаннар.
«Кӧп палалығ сӧбіре» номинацияда пис сӧбіре араласхан, чиңісчі Ренат паза Елена Семенов ирепчі полыбысхан. Олар 18 чыл мының алнында хоных хон салғаннар, пис пала ӧскірчелер.
8 сӧбіре араласхан «Чиит сӧбіре» номинацияның чиңісчізі Василий паза Татьяна Суворовтар полыбысханнар. Олар ікі хыс ӧскірчелер. Чоохтирға кирек, пу сӧбіре уғаа чайаачы, Ағбан город синінде иртірілчеткен марығ-пайрамнарда тӧреміл араласча.
Пу сыйыхтарны сӧбірелерге Ағбан городтың депутаттар чӧбінің кнезі Альберт Тупикин паза архиепископ Ионафан читіргеннер. Олар прайзын пу чылдаң сығара хазна ӱлӱкӱннері санына киріл парған Сӧбіре, кӧӧленіс паза киртініс кӱнінең алғыстааннар паза часканаң ырыс алғааннар. Оларның алғыстастарына ідӧк Хакасия Правительствозы адынаң ӱгредіг паза наука министрінің орынҷызы Елена Конева хозылған.
- Пістің полғаныбыстың на сӧбірені, кӧӧленісті паза киртіністі хайраллап халар ондайыбыс пар. Пӱӱн мин прайзына оларны ӱр чылларға тут халарға алғапчам. Піс улуғ алғызыбыс читірчебіс сірерге палалар ӧскірчеткен, ӧскір салған ӱчӱн, оларға чахсы кӧзідім полчатхан ӱчӱн. Прай чӱреебіснең алғыстапчабыс сірерні мындағ танығлығ кӱннең! - теен Елена Павловна.
Автор :
Александра КАРАМЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде