ЧИҢІС ПІСТИ ПОЛАР
13.07.2022
Хабарлар
Георгиевскай садта пістің чааҷыларға хабазар улуғ митинг ирткен
Митинг. Ағбанда Тынағ паркында Георгиевскай садта «Ада чир-суубыстың арачылағҷыларына алғыстапчатхан тӧллерінең» монумент алнындағы ачыхта «Пос кізілерін тастабинчабыс» митинг ирткен
Мероприятие Россияның войсколары Украинаны нацизмнең позыдарынҷа паза аның тиріглерін чох идерінҷе ӧнетін чаа операциязында араласчатхан чааҷыларға хабазар пӧгіннең иртірілген. Донбасстың паза Лугансктың чоннарына, пістің армияа паза хазна президенті Владимир Путинге хабазар улуғ акция иртірер пастағнаң Хакасияның Халыхтар палатазы сыххан.
Іди киҷее Георгиевскай садтағы ачыхта чон толдыра чыылысхан. Анда чааға чарыдылған патриот сарыннары толдырылчатхан. Россияның Хазна Думазындағы прай партияларның флагтары чалбырапчатханнар. Ағаа хоза чииттер «Единая Россияның Молодая гвардиязы», Юнармияның, аймах халых пірігістерінің флагтарын тутханнар, "Zа Россию", «Пос кізілерін тастабинчабыс» транспоранттар кӧрінген. Хумартхы тас хыринда Россияның паза Хакасияның флагтары кӧдірілгеннер.
Митинг пасталғанда, ведущай чаа темазына чарыдылған кибеліс хығырған. Хайди ол таныхтаан, пу акция ікі чыл мының алнында тӧстелген Георгиевскай садта иртірілче. Амды мында чоннарны піріктірчеткен мероприятиелер иртірілче. 2014 чылда Украинада ӱлгӱ нацисттернің холына кір парған, амды олар Россияның амыр чуртазына хорғыс ағылчатханда, Россия президенті Владимир Путин, Донецк Чон Республиказының паза Луганск Чон Республиказының сурыныстары хоостыра, оларны нацисттердең арачылирға ӧнетін чаа операциязын иртірерге чарадығ алған. Ол операция 24 февральда пасталған. Піс ағаа чӧпсінчебіс. «Кӱс - сын киректе», - теен ведущай. «Мин ол чааҷының пархазыбын» сарын толдырылған соонда сӧс Хазна Думазының депутады Сергей Соколға пирілген.
- Амды пістің армиябыс Украинада Россияны, аның чуртағҷыларын арачылапча. Чарым чыл мының алнында хазна президенті Владимир Путин ӧнетін чаа операциязын пастирдаңар чарадығ алған. Украинадағы нацисттер Россиядаң тоғыр чаалазарға тимненгеннер, Донбассты паза Луганскты чаалааннар, піске арачыланарға киліскен. Хайди чоохтаан Отто Бисмарк: «Хаҷан даа Россиядаң тоғыр чааласпаңар!» Че олар, аның сӧстерін испин, пістің хазнадаң тоғыр чаалазарға сіренчелер. Амды ӧнетін чаа операциязын иртірчеткен пістің чааңыларға хабазығ киректелче, піс оларға хайди даа хабазарбыс, - теен Сергей Сокол.
Анаң микрофонзар Хакасия пазының орынҷызы Юрий Курлаев сыххан.
- Піс Россия президентіне, армиябысха хабасчабыс. Украинада пістің хада культурабыс, тархыныбыс чох иділче. Россия чааны пастабинча, ол аны чиңіснең тоосча. Хакасия чуртағҷылары прайзына полызарға тимделер, піс Донбассар гуманитарнай полызығ, чыып, ысчабыс, ам даа ызарбыс. Пістің ханыбыста амыр, ынағ чуртир сағыс салыл парған. 1941 чыл пазох кӧзіткен, хайди піс сидік туста, хада-пірге тудынып, сидіктерні тобырчабыс. Піске ӧнетін чаа операциязы тузында чуртастарын пир салған чааҷыларны халғанҷы чолға ӱдезерге киліс парча, піс олар ӱчӱн ӧс аларбыс. Минің ағамны бандеровецтер, иреелеп, ӧдір салғаннар. Пістің чаачыларыбыс ам аның ӱчӱн дее ӧс алчалар, алғыс оларға. Піс Путин ӱчӱн, Россия ӱчӱн турысчабыс! Хада-пірге ползабыс, пісті пірдеезі чиңіп полбас! - чооғын тоосхан Юрий Курлаев.
Аның соонда микрофонзар Ағбан город пазының орынҷызы Владимир Крафт сыххан.
- Мин Россия президенті Владимир Путинге, пістің хазнабыс ӱчӱн турыс чатханына чӧпсінчем. Піс ам Украинаа чаанаң кірібіспеебіс, піс анда ӧнетін чаа операциязын иртірчебіс. Ам НАТО-даң тоғыр кӱресчебіс. Запад славян чоннарын удур-тӧдір чааластырарға хачаннаң сағыс тутхан. Минсктегі чӧптезіглерні толдырарға Украина ынабаан. Западтың ӧӧн пӧгіні - Россияны, аның чонын чох идібізерге. Пістің президент сын чарадығ алған. Армиябыс пістің амыр чуртазыбыс ӱчӱн чааласча. Хайдағ даа сидіксіністерге урунзабыс, сыдазарбыс! Чааңыларыбысха киртінчебіс, оларға ізен чебіс. Іди сыбыра полчаң, іди полар хаҷан даа! - теен Владимир Крафт.
Микрофонзар «Боевое братство» пірігістің региондағы пӧлиинің кнезі Александр Векшин хығыртылған.
- «Боевое братство» пірігіс президентке, армияа хабасча. Пірігістің ікінҷі форумы ирткенде, анда президентке, пістің чааҷыларыбысха хабазар чарадығ алылған. Мин неделя сай Донбассар пос кӧңнінең чаалазарға парыбысханнарнаң чоох алысчам. Амды искіріглер чаалазии парча. Президенттің рейтингі уғаа пӧзік. Чааны піс чиңіснең тоозарбыс. Пістің ағаларыбыс нацизмні саңай чох итпин салтырлар, піс оларның киреен тоос саларбыс. Хазнада патриотизм улуғ, чиңіс пісти полар! - чоохтаан Александр Векшин.
Анаң Хакасияның Халыхтар палатазының кнезі Ольга Левченко микрофонзар сыххан.
- Пістің армияа, президентке піс хайди даа хабазарға кирекпіс. Амды ӧӧн хайығ саларға кирек чииттерні патриотизмге ӱгредеріне. Школаларнаң тоғыс апарарбыс, пу тоғысты олған садтарынаң пас тирға кирек. Пістің чаачыларыбысха чиңіс алғапчабыс, пасха хазнаның чирлері, ис-пайы піске кирек чоғыл, андағ сағыс тутпинчабыс. Піс чааҷыларыбысха хабасчабыс, мыннаң мындар хабазарбыс. Чиңіс пісти полар! - теен Ольга Левченко.
Хакасияның саблығ артизі Ольга Васильева «Россия, сағаа хынчабын!» патриот сарынын толдырған. «Хада-пірге ползабыс, пірдеезі пісті сыы пас полбас!» - искірген ведущай. Юнармеецтер, чааҷылар, Россияның улуғ флагын, тудып, чон алнынҷа апарғаннар. Мемориал тӧзінзер чахайахтар салылған. Мыннаң митинг тоозылған.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде